ސަރުކާރުން ގާއިމްކުރާ އިންޑޯ ފުޓްސަލް ކޮމްްޕްލެކްސްގެ މަސައްކަތް މި މަސް ތެރޭ ފެށޭނެ ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ސްޕޯޓްސް މިނިސްޓްރީން ގިނަ ދުވަސްތަކަކަށް ފަހު، އިއްޔެ ވަނީ އެ ވުޒާރާގެ މަސައްކަތްތަކާ ބެހޭގޮތުން މައުލޫމާތު ދިނުމަށް ނޫސްވެރިންގެ ބައްދަލުވުމެއް ބާއްވައިފަ އެވެ. ރައީސް އޮފީހުގައި ބޭއްވި އެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ރާފިއު ވިދާޅުވީ، ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ރާއްޖޭން ހޯދައި، ހާސިލްކުރި ބޮޑު ކާމިޔާބަށް ފަހު، ފުޓްސަލްގެ އިންޑޯ ޕިޗެއް ނެތްކަމުގެ ޝަކުވާތައް ގިނަވެފައިވާ ކަމަށެވެ.
"ފޭސް 2 ގައި ހެދޭ ފުޓްސަލް އިންޑޯ ކޮމްޕްލެކްސްގެ މަސައްކަތް އިރާދަކުރެއްވިއްޔާ ވަރަށް އަވަހަށް އަޅުގަނޑުމެންނަށް ފެށިގެންދާނެ. އެކަމަށް ބޭނުންވާ ހުރިހާ ކަމެއް މިހާރު މިވަނީ ނިމިފައި. ބަޖެޓާއި، އެކަން ކުރެވޭނެ ފަރާތްތަކާއި މި ހުރިހާ ކަމެއް މިވަނީ އަޅުގަނޑުމެންނަށް ހަމަޖެހިފައި. ﷲ އިރާދަކުރެއްވިއްޔާ މި މަސް ތެރޭގައި އެ މަސައްކަތް އަޅުގަނޑުމެންނަށް ފެށިގެންދާނެ،" ރާފިއު ވިދާޅުވި އެވެ.
އޭނާ ވިދާޅުވީ މި އަހަރުގެ ފުރަތަމަ ދެ މަސް ތެރޭ ރާއްޖޭގެ ކުޅިވަރަށް ލިބުނު އެންމެ ބޮޑު ކާމިޔާބީގެ ތެރޭގައި ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ހިމެނޭ ކަމަށެެވެ.
ރައީސް ޑރ. މުހައްމަދު މުއިއްޒު، ރިޔާސީ ބަޔާނުގައި ވިދާޅުވީ، ބައިނަލްއަގުވާމީ ފެންވަރުގެ މެޗުތައް ކުޅެވޭނެ ފުޓްސަލް ކޮމްޕްލެކްސެއްގެ މަސައްކަތް އަންނަ އޭޕްރީލް މަހު ފެށޭނެ ކަމަށެވެ.
އެ ގޮތުން، މުއިއްޒު ވިދާޅުވީ، އިންޓަނޭޝަނަލް މެޗުތައް ބޭއްވޭ ފެންވަރުގެ އިންޑޯ ފުޓްސަލް ސްޓޭޑިއެމް އެއް ހިމެނޭހެން އިތުރު ހަތަރު އިންޑޯ ޓްރެއިނިން ޕިޗާއެކު ސްޓޭޓް އޮފް ދި އާޓް މަލްޓި ސްޓޯރީ ފުޓްސަލް ކޮމްޕްލެކްސަކާއި އިންޓަނޭޝަނަލް މެޗުތައް ބޭއްވޭ ފެންވަރުގެ އިންޑޯ ނެޓްބޯޅަ ސްޓޭޑިއެމް އެއް ހިމެނޭހެން އިތުރު ހަތަރު އިންޑޯ ޓްރެއިނިން ޕިޗާ އެކު ސްޓޭޓް އޮފް ދި އާޓް މަލްޓި ސްޓޯރީ ނެޓްބޯޅަ ކޮމްޕްލެކްސެއް ހުޅުމާލޭގައި ޢިމާރާތްކުރުމުގެ މަސައްކަތް އަންނަ އޭޕްރީލް މަހު ފެށޭނެ ކަމަށެވެ.
ދިޔަ ސަރުކާރުގެ ކުޅިވަރާ ބެހޭ މިނިސްޓަރު، އަހުމަދު މަހުލޫފް، ރައްޔިތުންގެ މަޖިލީހުގައި ވާހަކަ ދައްކަވަމުން ދައުރު ނިމުމުގެ ކުރިން ފުޓްސަލް އިންޑޯއެއް އަޅާނެ ކަމަށް ވިދާޅުވި އެވެ. އެކަމަކު، ދައުރު ނިމުނުއިރު، އެ އަށް އަމަލީ ސިފައެއް ނާދެ އެވެ. އަދި، މި ސަރުކާރު ފެށިގެން ހަފްތާ 14 ގެ ތެރޭގައި، ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) އާއި އެޗްޑީސީ އަދި، ފިނޭންސް މިނިސްޓްރީން ފުޓްސަލް/ނެޓްބޯލް ކޮމްޕެލްކްސްގެ ބިމާ ގުޅޭ އެއްބަސްވުމެއް ވެސް ހެދި އެވެ.
އެ ގޮތުން، ސަރުކާރުގެ ދެ މިނިސްޓްރީ އާއި އެޗްޑީސީން، 24 ފެބްރުއަރީ 2025 ގައި، ނެޓްބޯލް އާއި ފުޓްސަލް ކޮމްޕްލެކްސްގެ ބިން ހަވާލުކުރުމުގެ އެއްބަސްވުމުގައި ސޮއިކުރިއިރު، "އަދަދު ސްޕޯޓްސް" އިން ހުށަހެޅި މައުލޫމާތު ހޯދާ ލިބިގަތުމުގެ ހައްގު (އާރްޓީއައި)ގެ ޖަވާބުގައި، ނޮވެމްބަރު 16 ވަނަ ދުވަހު، މިނިސްޓްރީން ބުނެފައިވަނީ، ނެޓްބޯޅަ އާއި ފުޓްސަލް ކޮމްޕެލްކްސްގެ، "މަސައްކަތް ނުފަށާ،" ކަމަށެވެ.
ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ކުޅުނު ހުރިހާ މެޗަކުން މޮޅުވެގެން ރާއްޖޭގެ ގައުމީ ފިރިހެން ފުޓްސަލް ޓީމުން ހޯދިއިރު، އެ ޓީމުން އެނބުރި މާލެ އައިއިރު، ބޭއްވި އުފާފާޅުކުރުމުގައި ރައީސް މުއިއްޒު ބައިވެރިވެވަޑައިގަންނަވާނެ ކަމަށް ސްޕޯޓްސް މިނިސްޓްރީން އިއުލާނުކުރި އެެވެ. އެކަމަކު، ގައުމީ ފުޓްސަލް ޓީމާ ރައީސް ބައްދަލުވެސް ކުރައްވާފައިނުވެ އެވެ.
