ޔޫއޭއީގައި ހުންނަވާ ދިވެހި ސަފީރު މުހައްމަދު ހުސައިން ޝަރީފު (މުންދު) އާއި، ޖެނީވާގައި ހުންނަވާ ދާއިމީ މަންދޫބު ޑރ. ސަލްމާ ރަޝީދު މިއަދު މަގާމުން ވަކިކޮށްފިއެވެ.
މި ދެ ބޭފުޅުން މަގާމުން ވަކިކޮށްފައި މިވަނީ، ސަރުކާރު ހިންގާ ޕީއެންސީއަށް ވޯޓު ނުދިނުމަށް ގޮވާލައި، ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ވާހަކަދައްކަވާ އޯޑިއޯއެއް ލީކުވެފައިވާ ދަނޑިވަޅެއްގައެވެ. މުންދުއަކީ އަސްމާގެ ދަރިކަލުންނެވެ. އަދި ސަލްމާއަކީ އަސްމާގެ ކޮއްކޮއެވެ.
ލީކުވި އޯޑިއޯގައި އަސްމާ ރަޝީދު ވަނީ ސަރުކާރާއި ޕީއެންސީއަށް ވަރަށް ބޮޑަށް ފާޑުވިދާޅުވެފައެވެ. އެގޮތުން، ނިމިދިޔަ ލޯކަލް ކައުންސިލް އިންތިހާބާއި ރެފެރެންޑަމްގައި ޕީއެންސީގެ ކެންޑިޑޭޓުންނަށް ވޯޓު ނުދިނުމަށް އޭނާ ވަނީ ބާރުއަޅުއްވާފައެވެ.
ސަރުކާރުގެ އިސް އޮފިޝަލަކު ވިދާޅުވި ގޮތުގައި، މުންދު އާއި ސަލްމާ މަގާމުން ވަކިކުރީ ލޯކަލް ކައުންސިލް އިންތިހާބުން ޕީއެންސީ ބަލިވެފައި ވަނިކޮށް، އަސްމާގެ އޯޑިއޯއެއް ލީކުވުމާ ގުޅިގެންނެވެ.
"މައިގަނޑު ސަބަބަކީ އެ އޯޑިއޯ،" އޭނާ ވިދާޅުވިއެވެ.
މީގެ އިތުރުން އޭނާ ވިދާޅުވީ، ފިޝަރީޒް މިނިސްޓްރީގެ ސްޓޭޓް މިނިސްޓަރު އައިންތު ހުސައިން ޝަރީފު ވެސް މަގާމުން ވަކިކުރާނެ ކަމަށް ބެލެވޭ ކަމަށެވެ.
އޭނާ ފާހަގަކުރެއްވި ގޮތުގައި، އަސްމާގެ އޯޑިއޯއާ ގުޅިގެން ފިޔަވަޅު އަޅާއިރު، މަޖިލިސް މެންބަރުންނާއި މިނިސްޓަރުން މަސައްކަތް ކުރެއްވި ދާއިރާތަކުން ސަރުކާރަށް ނާކާމިޔާބީއާ ކުރިމަތިވެފައިވާތީ، އެ ބޭފުޅުންނާ މެދުވެސް ފިޔަވަޅު އަޅަންޖެހެއެވެ.
"ހަމައެކަނި އަސްމާގެ މައްސަލައެއް ނޫން މިއުޅެނީ. އެހެން ބޭފުޅުންވެސް އެބަތިއްބެވި ސަރުކާރުގެ ސިޔާސަތާ ދެކޮޅަށް މަސައްކަތް ކުރެއްވި ބޭފުޅުން،" އޮފިޝަލް ވިދާޅުވިއެވެ.
