މީގެ ދެ ދުވަސްކުރިން ފެނަކަ ކޯޕަރޭޝަން ލިމިޓެޑުގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމުން ވަކިކުރި މުހައްމަދު ޖިހާދުއަށް އެ ކުންފުނީގެ ޗީފް އިންފޮމޭޝަން އޮފިސަރު (ސީއައިއޯ) ގެ މަގާމު މިއަދު ދީފި އެވެ.
ފެނަކައިގެ ސީއައިއޯގެ މަގާމު ޖިހާދުއަށް ދިންކަން އަންގައި އެ ކުންފުނިން މިއަދު ނެރުނު އިންޓާނަލް ސާކިއުލާއެއްގައި ވަނީ މަސައްކަތްތައް ރާވައި ހިންގުމުގައި އޭނާއަށް ފުރިހަމަ އެއްބާރުލުން ދިނުމަށް އެދިފަ އެވެ. އެ ސާކިއުލާގައި ސޮއިކޮށްފައި ވަނީ މި ވަގުތު ފެނަކައިގެ އެކްޓިން މެނޭޖިން ޑިރެކްޓަރުގެ މަގާމުގައި ހުންނެވި، އާދަމް ތައުފީގު އެވެ.
ޖިހާދު މަގާމުން ވަކިކުރީ، މިދިޔަ ހޯމަ ދުވަހު އެވެ. އޭނާއާއެކު ފެނަކައިގެ ޗީފް ރިސޯސަސް އޮފިސަރު (ސީއާރްއޯ)، އަބްދުالله ޝަނޫން އާއި އެ ކުންފުނީގެ މެނޭޖިން ޑިރެކްޓަރު، މުހައްމަދު ނަޖާހު ވެސް މަގާމުން ވަކިކުރި އެވެ. އެ ބަދަލުތައް ގެނައީ މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބާއި ޑަބްލިއުޑީސީގެ އިންތިހާބު އަދި ދެ އިންތިހާބު އެއްކޮށްލަން ފެނޭތޯ ނެގި ފެންނަ ނުފެންނަ ވޯޓުން ސަރުކާރަށް ލިބުނު ބައްޔާއެކު އެވެ.
ޖިހާދުއަކީ ފެނަކައިން ހިންގި ބާ ޖެނެރޭޓަރުތަކެއް ގަތުމުގެ ބޮޑު ހިޔާނާތުގެ ބައިވެރިވި ކަމުގެ ތުހުމަތު ކުރެވޭ އެކަކެވެ. އެ ހިޔާނާތާ ގުޅޭ ތަހުގީގީ ރިޕޯޓެއް މީގެ ކުރިން އަދަދު އިން ޝާއިއު ކޮށްފައިވާނެ އެވެ.
ރޯދަމަހު ކަނުއަނދިރީގައި ތިބެންޖެހުމުގެ ހަގީގަތް: ބޮޑު އަގުގައި ފެނަކައަށް ބާ ޖެނެރޭޓަރުތަކެއް ގަތުމުގެ ހިޔާނާތް!
މިއީ ފައިބެ އަހަރު ދިވެހީން ތަހަންމަލު ކުރާންޖެހުނު ތުރާލުގެ ފަހަތުގައި ފޮރުވިފައިވާ ނާގާބިލުކަމާއި ހަރާންކޯރުކަމުގެ އެންމެ ބޮޅެއް. ފެނަކައިން ހިންގި މި ޖަރީމާއިން ރިޝްވަތުގެ މުޑުދާރު ފައިސާ ވެރިންގެ ޖީބަށް މިލިއަނުން ވަދެފައިވާ ކަމަށް ބެލެވޭ.
ފެނަކައިގެ މަގާމަކަށް ޖިހާދު އެންމެ ފުރަތަމަ އައްޔަނުކުރީ ޖެނުއަރީ 12، 2025 ގަ އެވެ. އެއީ ފެނަކައިގެ މެނޭޖިން ޑިރެކްޓަރުކަމާ މުހައްމަދު ނަޖާހު ހަވާލުވެވަޑައިގަތުމަށްފަހު އަލަށް އުފެއްދެވި، ސީއާރުއޯގެ މަގާމަށެވެ. އެއަށްފަހު، ހަމަ އެ ދުވަހު ނަޖާހު ނެރުނު އިންޓާނަލް މެމޯއަކުން ވަނީ ޕްރޮޖެކްޓްސް ޑިޕާޓްމެންޓާއި ޕްރޮކިއުމެންޓް ޑިޕާޓްމެންޓުގެ އިތުރުން ލޮޖިސްޓިކްސް ޑިޕާޓްމެންޓު އަދި ރިޕެއާ އެންޑް މެއިންޓެނެންސްގެ އެންމެހައި ކަންކަން ޖިހާދުއާ ހަވާލުކޮށްފަ އެވެ.
އެއަށްފަހު، ރާއްޖޭގެ އެކި ކަންކޮޅަށް ކަރަންޓު ދިނުމަށް ބޭނުންވާ ޖެންސެޓުތައް ހޯދުމަށް އޭރު، ފެނަކައިގެ ޓެކްނިކަލް ކޮންސަލްޓެންޓުގެ މަގާމުގައި ހުންނެވި (ފަހުން ޑީއެމްޑީ) މުހައްމަދު އާރިފް އާއި ޖިހާދު އިންޑިއާއަށް ދަތުރެއް ކުރެއްވި އެވެ.
ކުރިން ފެނަކައިގެ ކުރީގެ މެނޭޖިން ޑިރެކްޓަރު، އަބްދުالله މުއާޒު މަގާމުން ވަކިކުރުމުގެ ކުރިން ހޯދަން އިއުލާނު ކޮށްފައި އޮތް 46 ޖެންސެޓުގެ ޕްރޮކިއުމެންޓު ރިކުއެސްޓުތައް ބާތިލު ކުރުމަށް ޖިހާދު އެންގެވި އެވެ. އަދި، ރާއްޖޭގެ 14 އަތޮޅެއްގެ 24 ރަށަކަށް ރޯދަމަހުގެ ކުރިން ޖެންސެޓުތަކެއް ހޯދުމަށް އެމާޖެންސީ ޕްރޮކިއުމެންޓް ރިކުއެސްޓެއް ކުރުމަށް ފެނަކައިގެ އޮޕަރޭޝަން ސާވިސް ޑިޕާޓްމެންޓުގެ ވެރިޔާ، އަހުމަދު އިބްރާހިމްއަށް ޖެނުއަރީ 28، 2025 ގައި ފޮނުވި އީމެއިލްގައި އެންގި އެވެ.
އެތައް ފަހަރެއްގެ މަތިން އުސޫލު ބަދަލުކޮށް، އާ ޖެނެރޭޓަރުތަކެއްގެ ނަމުގައި ބާ ޖެނެރޭޓަރުތަކެއް ގެނައުމުގެ އެ ހިޔާނާތް ހިންގީ އެ އީމެއިލްގައި އެންގި ގޮތަށް، އެމާޖެންސީ ޕްރޮކިއުކެންޓް ރިކުއެސްޓެއް ނެރެގެންނެވެ.
ފެނަކައިގެ ޗީއެފްއޯގެ މަގާމަށް ޖިހާދު އައްޔަނުކުރީ ސެޕްޓެމްބަރު 1، 2025 ގަ އެވެ. އޭނާ އެ މަގާމަށް އައްޔަނުކުރީ، އެ މަގާމުގައި އެހައިތަނަށް ހުންނެވި، އަބްދުالله ވަހީދު އިސްތިއުފާ ދެއްވުމުންނެވެ.
