ފެނަކަ ކޯޕަރޭޝަން ލިމިޓެޑުގެ ޗީފް ފައިނޭންޝިއަލް އޮފިސަރު (ސީއެފްއޯ) ގެ މަގާމަށް އާ ބޭފުޅަކު މިއަދު އައްޔަނުކޮށްފި އެވެ.
ފެނަކައިގެ ސީއެފްއޯގެ މަގާމަށް އައްޔަނު ކޮށްފައި ވަނީ މުހައްމަދު ޖިހާދު އެވެ. އޭނާ އެ މަގާމަށް އައްޔަނު ކުރުމުން އެކަމަށް މަރުހަބާ ކިޔައި އެ ކުންފުނިން ވަނީ ސޯޝަލް މީޑިއާގައި ޕޯސްޓެއް ހިއްސާކޮށްފަ އެވެ.
ޖިހާދުއަކީ ފެނަކައިގެ ޗީފް ރިސޯސް އޮފިސަރު (ސީއާރްއޯ) ގެ މަގާމުގައި ހުންނެވި ބޭފުޅާ އެވެ. ފެނަކައިގެ ޕްރޮޖެކްޓްސް ޑިޕާޓްމެންޓާއި ޕްރޮކިއުމެންޓް ޑިޕާޓްމެންޓުގެ އިތުރުން ލޮޖިސްޓިކްސް ޑިޕާޓްމެންޓު އަދި ރިޕެއާ އެންޑް މެއިންޓެނެންސްގެ އެންމެހައި ކަންކަން ހިންގަމުން ދިޔައީ އޭނާގެ ބެލުމުގެ ދަށުންނެވެ. ނަމަވެސް އެ މަގާމުން އޭނާ ވަކިކުރި ކަމެއް އަދި ނޭނގެ އެވެ.
ފެނަކައިގެ ސީއެފްއޯގެ މަގާމުގައި މީގެ ކުރިން ހުންނެވީ އަބްދުالله ވަހީދު އެވެ. އޭނާ އެ މަގާމުން އިސްތިއުފާ ދެއްވީ މިއަދު އެވެ. ނަމަވެސް އޭނާ އިސްތިއުފާ ދެއްވި ސަބަބެއް ނޭނގެ އެވެ.
ފެނަކައިގެ ސީއެފްއޯގެ މަގާމު ބަދަލު ކޮށްފައި މިވަނީ ކީއްވެ ކަމެއް އެ ކުންފުނިން ހާމައެއް ނުކުރެ އެވެ. މިކަމާ ބެހޭ ގޮތުން މައުލޫމާތު ހޯދުމަށް ފެނަކައަށް ގުޅުމުން ފޯނަށް ޖަވާބެއް ނުދެ އެވެ.
ސީއެފްއޯގެ މަގާމަކީ އެ ކުންފުނީގެ މާލީ އެންމެހައި ކަންކަން ބެލެހެއްޓުމުގެ އެންމެ އިސް ފަރާތެވެ. ކުންފުނީގެ ޗެކުތަކުގައި ސޮއި ކުރުމާއި އެ ނޫން ވެސް ކުންފުނީގެ މާލީ ކަންކަމާ ގުޅޭ ހުރިހާ ކަމެއް ބެލެހެއްޓުމެވެ.
