ސަރުކާރަށް އިންތިހާބުގައި ކުރިމަތިވި ބޮޑު ނާކާމިޔާބީއާ ގުޅިގެން ގެންނަމުންދާ ބަދަލުތަކުގެ ތެރެއިން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯގެ މަގާމުގައި ހުންނެވި މުހައްމަދު ރިޝްވާން އެ މަގާމުން އިސްތިއުފާ ދިނުމަށް އަންގައިފި އެވެ.
އަދަދު ނޫހަށް މައުލޫމާތު ލިބިފައިވާ ގޮތުގައި މާދަމާގެ ވަގުތެއްގައި ރިޝްވާން އެ މަގާމުން އިސްތިއުފާ ދެއްވާނެ އެވެ. އޭނާ ވެގެންދާނީ ފެނަކަ ކޯޕަރޭޝަންގެ މެނޭޖިން ޑިރެކްޓަރުކަމުން މުހައްމަދު ނަޖާހު އަަށްފަހު ސަރުކާރު ހިއްސާވާ ކުންފުންޏަކުން ވަކިކުރާ ދެވަނަ ވެރިޔާއަށެވެ.
ރިޝްވާން އެމްޕީއެލްއާ ހަވާލުވީ ފެބްރުއަރީ 2025، ގަ އެވެ. އޭނާއަށް މަގާމުގައި ހޭދަކުރެވިފައިވަނީ ގާތްގަނޑަކަށް 14 މަސްދުވަހެވެ.
ރައީސް އަބްދުﷲ ޔާމީންގެ ސަރުކާރުގައި އައިޖީއެމްއެޗްގެ ޑެޕިއުޓީ ސީއީއޯގެ މަގާމު އަދާ ކުރެއްވި ރިޝްވާން ވަނީ ކުރިން އެ ހޮސްޕިޓަލުގެ ޑެޕިއުޓީ ޑިރެކްޓާ އޮފް އޮޕަރޭޝަންސްގެ މަގާމު ވެސް އަދާކުރައްވައިފަ އެވެ.
ރައީސް މުހައްމަދު ނަޝީދު ސަރުކާރުގައި ރިޝްވާން ވަނީ ޑެޕިއުޓީ ކޮމިޝަނާ އޮފް ޕޮލިސްގެ މަގާމު އަދާ ކުރައްވާފަ އެވެ. އެ މަގާމުން އޭނާ ފަހުން އިސްތިއުފާ ދެއްވީ އެވެ.
އެމްޕީއެލްގެ އެމްޑީއަކަށް ރިޝްވާން އައްޔަނުކުރީ އެ މަގާމުގައި އޭރު ހުންނެވި މުހައްމަދު ވަޖީހު އިބްރާހިމް ވަކިކުރުމަށް ފަހުގަ އެވެ. ވަޖީހު އެ މަގާމުން ވަކިކުރީ ރައީސް މުހައްމަދު މުއިއްޒު އާއި ރައްޔިތުންގެ މަޖިލީހުގެ ރައީސް އަބްދުއްރަހީމްއާ މައްސަލަ ޖެހުނު ދުވަސްވަރުގަ އެވެ.
މި ސަރުކާރުގައި އެމްޕީއެލްގެ ތިންވަނަ ސީއީއޯގެ މަގާމަށް އައްޔަނުކުރާނީ ވަކި މީހެއް މިހާތަނަށް އެނގިފައެއް ނުވެ އެވެ.
