ކިންޝާޝާ، ކޮންގޯ (އޭޕްރީލް 6) - އެމެރިކާ، މެކްސިކޯ އަދި ކެނަޑާގައި ޖޫން މަހު ފަށާ ފީފާ ވޯލްޑް ކަޕްގައި ވާދަކުރާ ކޮންގޯގެ ޓީމާ އެކު، އެ ގައުމުގެ މަޝްހޫރު ފުޓްބޯޅަ ސަޕޯޓަރު، "ލުމުމްބާ" ހިމަނަައިދޭން ކޮންގޯ ޓީމުން އެ ގައުމުގެ ރައީސް، ފީލިކްސް ޝިސެކޭޑީ ގާތުގައި އެދިއްޖެ އެވެ.
ކޮންގޯ އިން ވޯލްޑް ކަޕަށް ދަތުރުކުރީ އިންޓަ ކޮންޓިނެންޝިއަލް ޕްލޭއޮފްގައި ޖެމެއިކާ އަތުން 1-0 އިން މޮޅުވެގެންނެވެ.
އުތުރު އެމެރިކާގެ ފުޓްބޯޅައިގައި ވަރުގަދަ ޖެމެއިކާއާ ދެކޮޅަށް ކޮންގޯ އިން ކުޅުނު މެޗުގެ ފުރިހަަމަ ވަގުތު ހަމަވިއިރު ދެ ޓީމު އޮތީ ލަނޑެއް ނުޖެހި އެއްވަރުވެފަ އެވެ. ނަތީޖާ ނެރެން ކުޅުނު އިތުރު ވަގުތުގެ ދެ ހާފުގެ ތެރެއިން ފުރަަތަމަ ހާފުގައި ކޮންގޯ އިން ވަނީ ލަނޑެއް ޖަހައިފަ އެވެ. މެޗުގައި ފެނިގެންދިޔަ ހަމައެކަނި ލަނޑު ޖެހީ 100 ވަނަ މިނިޓްގައި އެކްސެލް ޓުއަންޒޭބޭ އެވެ.
މިއީ، ކޮންގޯގެ ނަމުގައި އެ ޓީމުން ކުޅޭނެ ފުރަތަމަ ވޯލްޑް ކަޕެވެ. އެ ކަމުގެ އުފާފާޅުކުރަން ކޮންގޯ އިން ބޭއްވި އުފާފާޅުކުރުމުގެ ތެރޭގައި، އެ ޓީމުގެ ކެޕްޓަން، ޗަންސެލް އެމްބެމްބާ، ސަޕޯޓަރުންނާ އެކު ބޭއްވި އިވެންޓްގައި ވާހަކަ ދައްކަމުން ބުނެފައިވަނީ، ކޮންގޯގެ މަޝްހޫރު ސަޕޯޓަރު "ލުމުމްބާ" އަކީ އެ ޓީމުގެ ރަމްޒެއް ކަމަށެވެ. އަދި، ސަރުކާރާއި ރައީސް ފީލިކްސް އަށް ޓީމުގެ ފަރާތުން އެމްބެމްބާ ފޮރުކޮށްދިން މެސެޖަކީ، ވޯލްޑް ކަޕަށް ކޮންގޯ އިން ފޮނުވާ ޑެލިގޭޝަނުގެ ތެރޭގައި، "ލުމުމްބާ" ހިމެނުމަށެވެ.
"ވަރަށް ބޮޑު ރަމްޒެއް އެއީ (ލުމުމްބާ އަކީ)، ހަގީގަތުގައި ކޮންގޯ ކުޅޭ މެޗުތަކަށް ދުނިޔޭގެ ނަޒަރު ހުއްޓޭ އެއް ސަބަބަކަށް ވެފައި މި އޮތީ ލުމުމްބާ. މާނަ އަކީ ކޮންގޯގެ ރަމްޒަކަށް އޭނަ ވެއްޖެއޭ. އެހެންވީމަ، އެ ސަޕޯޓް ކުރިއަށްގެންދަން އަހަރެމެން ވެސް ބޭނުން،" އެމްބެމްބާ ބުންޏެވެ.
މި އަހަރު މޮރޮކޯގައި ކުރިއަށްދިޔަ، އެފްރިކަން ކަޕް އޮތް ނޭޝަންސްގެ ތެރޭގައި، ކޮންގޯ ކުޅޭ ގިނަ މެޗުތަކުގައި ޓީވީ ކެމެރާތައް އެންމެ ބޮޑަށް ފޯކަސް ކުރާ އެއް ސަޕޯޓަރަކީ، "ލުމުމްބާ" އެެވެ. މުބާރާތް ހޯސްޓްކުރި މޮރޮކޯގެ ސަޕޯޓަރުން ވަނީ "ލުމުމްބާ" މެޗުގައި ސަޕޯޓަރުންގެ ތެރޭގައި ކޮޅަށް ހުންނަ ގޮތަށް ހުއްޓިގެން ހުރެ، އޭނާގެ ހަރަކާތް ނަކަލުކުރަން މަސައްކަތްކޮށްފަ އެވެ.
ކޮންގޯ އިން މި ފަަަހަރުގެ ވޯލްޑް ކަޕްގައި ވާދަކުރާނީ 48 ޓީމު ކުޅޭ ވޯލްޑް ކަޕްގެ ގްރޫޕް ކޭ ގަ އެވެ. އެ ގްރޫޕްގައި އޮތީ ޕޯޗުގަލް، ކޮލަމްބިއާ އަދި އުޒްބެކިސްތާން އެވެ.
ކޮންގޯ އިން ވޯލްޑް ކަޕްގައި ކުޅޭ ފުރަތަަމަ މެޗުގައި ޖޫން 17 ވަނަ ދުވަހު، އެމެރިކާގެ ހޫސްޓަންގައި ކުޅޭ މެޗުގައި ކުޅޭނީ ޕޯޗުގަލްއާ ދެކޮޅަށެެވެ. ދެ ވަނަ މެޗު މެކްސިކޯގައި ކުޅެން އޮތްއިރު ނުކުންނާނީ ކޮލަމްބިއާއާ ދެކޮޅަށެވެ. އަދި، ގްރޫޕްގެ ފަހު މެޗުގައި، ޖޫން 27 ވަނަ ދުވަހު އުޒްބެކިސްތާނާ ކުޅޭނީ އެމެރިކާގަ އެވެ.
