ދެކުނު އޭޝިއާގެ ފުޓްބޯޅަ ފެޑެރޭޝަން، ސާފްގައި ހިމެނޭ ގައުމުތަކަށް ފުޓްބޯޅައިގެ މުސްތަގުބަލު ރަނގަޅުކަން، ދާދި ފަހުން ނިމިގެންދިޔަ 20 އަހަރުން ދަށުގެ މުބާރާތުން ފެނުނު ކަމަށް މުބާރާތުގެ ޗެމްޕިއަންކަން ހޯދި ބަންގްލަދޭޝްގެ ކޯޗު، އިނގިރޭސިވިލާތުގެ މާކް ކޮކްސް ބުނެފި އެވެ.
ގަލޮޅު ދަނޑުގައި މިދިިޔަ ހުކުރު ދުވަހުގެރޭ ކުޅުނު ފައިނަލުގައި، ޕެނަލްޓީ ޖަހައިގެން 4-3 އިން އިންޑިއާ ބަލިކޮށް، ބަންގްލަދޭޝް އިން ވަނީ 20 އަހަރުން ދަށުގެ ސާފް ޗެމްޕިއަންޝިޕްގެ ޗެމްޕިއަންކަން ދިފާއުކޮށްފަ އެވެ. މިއީ، ސާފްގެ 19 އާއި 20 އަހަރުން ދަށުގެ މުބާރާތްތަކުގައި ބަންގްލަދޭޝް އިން ޖެހިޖެހިގެން ވާދަކުރާ ތިން ވަނަ ފައިނަލެވެ. ބަންގްލަދޭޝް އިން 2024 ވަނަ އަހަރު ކުޅުނު 20 އަަހަރުން ދަށުގެ މުބާރާތް ކާމިޔާބުކުރީ ފައިނަލުގައި ނޭޕާލް ބަލިކޮށްފަ އެވެ. އަދި، އިންޑިއާ އިން މިދިޔަ އަހަރު ބޭއްވި 19 އަހަރުން ދަށުގެ މުބާރާތް ކާމިޔާބުކުރީ ޕެނަލްޓީ ޖަހައިގެން ބަންގްލަދޭޝް ބަލިކޮށްފަ އެވެ. އެކަމަކު، މި ފަހަރު ޕެެނަލްޓީގައި ކުރި ލިބުނީ ބަންގްލަދޭޝް އަށެވެ.
މި މުބާރާތަށް ކުޑަތަންވެފައި ވަނިކޮށް، ބަންގްލަދޭޝްގެ ކޯޗަކަށް ގެނައި ކޮކްސް އަށް ވަނީ މުބާރާތުގެ ގްރޫޕް ސްޓޭޖުގައި 1-1 އިން އިންޑިއާއާ އެއްވަަރުވި މެޗުގައި ރަތް ކާޑެއް ދައްކައިފަ އެވެ. އެހެންވެ، ސެމީ ފައިނަލަށް އޭނާ ސަސްޕެންޝަނުގައި ހުރިއިރު، ބެންޗުން ޓީމަށް ކޯޗުކޮށްދިނީ އެސިސްޓަންޓް ކޯޗު، އެސިސްޓަންޓް ކޯޗު އަތީގުއްރަހްމާން މީޝޫ އެވެ.
"މިއީ އަހަރެމެން އާއިލާއެއްގެ ގޮތުގައި ކުރި މަސައްކަތެއް، މި ޓީމުގެ ކޮންމެ މީހަކީ ވެސް މި ކާމިޔާބީގެ ބައިވެރިއެއް. ކުޅުންތެރިން، ކޯޗުން އަދި މި ޓީމަށް ތަރުހީބު ދޭން ދަނޑަށް އައި ސަޕޯޓަރުން، އަދި އަމިއްލަ ގައުމުގައި ތިބެ ތަރުހީބު ދިން މީހުން ވެސް މީގަ ހިމެނޭ،" ކޮކްސް ބުންޏެވެ.
އޭނާ ބަންގްލަދޭޝް ޓީމާ ހަވާލުވީ މި މުބާރާތަށް ކަމަށާއި އުންމީދަކީ، ކުރިއަށް އޮތް އޭއެފްސީ 20 އަހަރުން ދަށުގެ ކޮލިފައިންގައި ވެސް ބަންގްލަދޭޝް ރަނގަޅު ނަތީޖާތަކެއް ނެރުން ކަމަށް ކޮކްސް ވަނީ ބުނެފަ އެވެ.
"އަހަރެމެން ފައިނަލުގައި މި މޮޅުވީ ސާފްގައި އެ ފަދަ ދެ ވަަނައެއް ނެތް އިންޑިއާ އަތުން ޕެނަލްޓީ ޖަހައިގެން ވިޔަސް. އަހަރެމެން ކުރި މަސައްކަތަށް އެ ކާމިޔާބީ ހައްގު،" ކޮކްސް ބުންޏެވެ.
"ސާފްގެ މުސްތަގުބަލު މި މުބާރާތުން ފެނިއްޖެ، ސާފް އަށް ބޭނުންވޭ ވަރުގަދަ ބޫޓާން އެއް، ވަރުގަދަ ނޭޕާލް އެއް، ވަރުގަދަ ސްރީ ލަންކާ އެއް، ވަރުގަދަ ރާއްޖެ އެއް ވެސް، މި ޓީމުތައް މިހާރު ހުރި ވަރަށް ވުރެން ވެސް ރަނގަޅުކުރެވޭނެ ކަން ވެސް ފެނިއްޖެ،"
އޭނާ އަކީ ސޯޝަލް މީޑިއާގައި ދެކެވޭ ވާހަކަތަަކަށް މާ ބޮޑު ސަމާލުކަމެއް ދޭ މީހެއް ނޫން ކަމަށާއި ކޮންމެ ކަމެއްގައި ވެސް ފާޑުކިޔުންތައް ހިމެނޭނެ ކަމަށް ކޮކްސް ވަނީ ބުނެފަ އެވެ. އަދި، އުންމީދަކީ ބަންގްލަދޭޝްގެ ފުޓްބޯޅައިގައި މިހާރު މި އޮތް އުންމީދާ އެއްގޮތަށް ރަނގަޅު މަސައްކަތްތަކެއް ކޮށްގެން، މިހާރު މި އަރަމުން އަންނަ ޖީލަށް ރަނގަޅު މިސްރާބަކުން ކުރިއަށްދިއުމުގެ ފުރުސަތު ތަނަވަސްކޮށްދޭނެ ކަމަށް ކަމުގައި ކޮކްސް ވަނީ ބުނެފަ އެވެ.
