ލަންޑަން (އޭޕްރީލް 5) - އިނގިރޭސި ދެ ވަނަ ޑިވިޝަނުގައި ވާދަކުރަމުން އަންނަ ސައުތެމްޓަން އިން އެފްއޭ ކަޕް ކުއާޓާ ފައިނަލުގައި، 2-1 އިން އާސެނަލް ބަލިކޮށް، އެ ޓީމު މުބާރާތުން ކަޓުވާލައިފި އެވެ.
އިނގިރޭސި ދެ ވަނަ ޑިވިޝަން، ޗެމްޕިއަންޝިޕްގެ ހަތް ވަނައިގައި މި ވަގުތު އޮތް ސައުތެމްޓަނުން ވަނީ ރޭގެ މެޗުގައި އަމިއްލަ ދަނޑުގައި ކުޅެ، އިނގިރޭސި ޕްރިމިއާ ލީގުގެ އެއް ވަނައިގައި އޮތް އާސެނަލަށް ލީޑެއް ވެސް ލިބުނަ ނުދީ މެޗުން މޮޅުވެފަ އެވެ. މިއީ، އެފްއޭ ކަޕްގެ ސެމީ ފައިނަލުގައި،2021 ވަނަ އަަހަރުގެ ފަހުން ސައުތެމްޓަނުން ވާދަކުރާ ފުރަތަމަ ފަހަރެވެ.
ސައުތެމްޓަން ދަނޑުގައި ރޭ ކުޅުނު މެޗުގައި، އެ ޓީމުން ވަނީ 35 ވަނަ މިނިޓްގައި ލަނޑު ޖަހައި، ލީޑުގައި އޮވެ، ފުރަތަމަ ހާފު ނިންމާލައިފަ އެެވެ. މިއީ، ސައުތެމްޓަން އޭރިއާ ތެރެއިން، އާސެނަލްގެ ބެން ވައިޓް ހެދި ގޯހެއްގެ ފައިދާނަގައި، ސައުތެމްޓަންގެ ރޮސް ސްޓެވާޓް ކާމިޔާބުކުރި ގޯލެކެވެ.
އާސެނަލުން ނަތީޖާ ހަމަހަމަކުރެވޭތޯ ގިނަ ގޮތްގޮތުން މަސައްކަތްތަކެއް ކުރިއިރު، ބަދަލުތަކެއް ގެނެސްގެން ވެސް މަސައްކަތް ފެށި އެވެ. އެ ގޮތުން، އާސެނަލަށް މެޗުގެ ނަތީޖާ އެއްވަރުކޮށްދިނީ 68 ވަނަ މިނިޓްގައި ސްވިޑެންގެ ފޯވާޑް ވިކްޓަ ޔޯކެރޭޝް އެވެ. ފަހަކަށް އައިސް ލަނޑު ޖެހުމުގެ ރަނގަޅު ފޯމެއްގައި ހުރި ޔޯކެރޭޝް މި ލަނޑު ޖެހީ، އޭރިއާތެރެއިން ކައި ހަވާޓްޒް ނަގައިދިން ބޯޅައަކަށް އަރަ އެވެ.
ނަތީޖާ ހަމަހަމަވުމާ އެކު، އާސެނަލަށް ކުޅުމުގެ ކޮންޓްރޯލް ކޮންމެ ވެސް ވަރަކަށް ލިބިގެންދިޔަ ނަމަވެސް، ދެން ވެސް މެޗުގައި ތަފާތެއް ދެއްކީ ސައުތެމްޓަން އިންނެވެ. އެ ގޮތުން، މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައި ހުއްޓައި، ދެ ވަނަ ލަނޑު ޖަހައިގެން ސައުތެމްޓަނުން އަލުން ލީޑުނެގި އެވެ. މި ލަނޑު އެ ޓީމަށް ޖަހައިދިނީ، އާސެނަލްގެ އޭރިއާތެރެއިން ތިރީ ކަނަށް ބޯޅަ ފޮނުވާލައިގެން ޝެއާ ޗާލްސް އެވެ.
ސީޒަނުގެ ހަތަރު ތަށްޓަށް ވެސް ވާދަކުރަމުން އައި އާސެނަލަށް މި ވަނީ 10 ވަރަކަށް ދުވަސް ތެރޭ ދެ މުބާރާތް ގެއްލިފަ އެެވެ. އިނގިރޭސި ލީގު ކަޕް ފައިނަލުގައި މެންޗެސްޓާ ސިޓީ އަތުން ބަލިވިއިރު، އެފްއޭ ކަޕުން ވެސް ކެޓީ އެވެ. އާސެނަލަށް ދެން އޮތީ އިނގިރޭސި ޕްރިމިއާ ލީގާއި ޗެމްޕިއަންސް ލީގެވެެ. އާސެނަލުން އެންމެ ފަހުން ހޯދި ތަށްޓަކީ، 2020 ވަަނަ އަހަރުގެ އެފްއޭ ކަޕް އެެވެ.
