މިއަދު ބޭއްވި ލޯކަލް ކައުންސިލް އިންތިހާބާއި ޑަބްލިއުޑީސީގެ އިންތިހާބު އަދި ހިޔާލު ހޯދުމުގެ އާންމު ވޯޓުގައި ދިވެހި ރައްޔިތުން ސަރުކާރުގެ ސިޔާސަތުތަކަށް ނޫނެކޭ ބުނެފައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ލޯކަލް ކައުންސިލް އިންތިހާބު ބޮޑު ތަފާތަކުން ކާމިޔާބު ކުރާނެ ކަމަށް ބެލެވެނީ އެމްޑީޕީ އެވެ. ދިވެހިރާއްޖޭގެ ފަސް ސިޓީގެ މޭޔަރުގެ މަގާމަށް ވެސް ހޮވުނީ އެމްޑީޕީގެ ކެންޑިޑޭޓުންނެވެ.
މިރޭ ކުރެއްވި ޓްވީޓެއްގައި ސޯލިހު ވަނީ އެމްޑީޕީގެ އިންތިހާބީ މޭޔަރުންނާއި، ކައުންސިލަރުންނާއ، ޑަބްލިއުޑީސީގެ މެންބަރުންނަށް މަރުހަބާ ވިދާޅުވެފަ އެވެ. އަދި އެމްޑީޕީގެ ކެންޑިޑޭޓުންނަށް ވޯޓު ދެއްވި ހުރިހާ ރައްޔިތުންނަށް ސޯލިހު ޝުކުރު އަދާކުރެއްވި އެވެ.
"ރައްޔިތުން މިއަދު މިވަނީ ސަރުކާރުގެ ސިޔާސަތުތަކަށް ނޫނެކޭ ބުނެފަ. ރައްޔިތުން މި އަދު އެބުނީ ސަރުކާރު ކުރިއަށްދާ މިސްރާބު ބަދަލުކުރަން ޖެހިއްޖެ ވާހަކަ،" ސޯލިހު ވިދާޅުވި އެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ނެގި ވޯޓުގައި ވެސް ރައްޔިތުން ބުނީ ނޫނެކޭ އެވެ. މިއީ، ދެ އިންތިހާބު އެއްކޮށްލަން ވަކާލާތު ކުރި ސަރުކާރަށް މުޅި ރާއްޖެއިން ލިބުނު ބޮޑު ބައްޔެކެވެ.
"ސަރުކާރުން ލަސްނުކޮށް ކުރަންވީ ކަމަކީ ރައްޔިތުންގެ އަޑު އަހައި ރައްޔިތުން އެދޭގޮތަށް ސިޔާސަތުތަކަށް ބަދަލު ގެނައުން،" ސޯލިހު ވިދާޅުވި އެވެ.
