އުމްރާގެ އަޅުކަމަށް މައްކާއަށް ގެންގޮސްދޭނެ ކަމަށް ބުނެ އަލް އަބްރާރު ނަމަކަށް ކިޔާ ކުންފުންޏަކުން 100 އެއްހާ ދިވެހިންނަށް ބޮޑު ލަނޑެއް ދީފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް ވިދާޅުވީ އަލް އަބްރާރް ކުންފުނި މެދުވެރިކޮށް އުމްރާއަށް ނުފުރިގެން އުޅޭ މައްސަލަ މިނިސްޓްރީގެ ސަމާލުކަމަށް އައީ އިއްޔެ ކަމަށެވެ. އެކަމާ ގުޅިގެން ބަލަން ޖެހޭ ކަންކަން ބަލަން ފަށާފައިވާ ކަމަށް މިނިސްޓަރު ވިދާޅުވި އެވެ.
ޝަހީމް ވިދާޅުވީ އުމްރާއަށް ނުފުރި ރަށްރަށުން އައި މީހުން ވެސް ހާސްކަމުގެ ތެރޭގައި ތިބި ކަމަށާއި ނުފުރުނު މީހުންގެ ތެރެއިން 28 މީހަކު އަމިއްލައަށް ހަރަދުކުރާ ގޮތަށް ހައްޖު ކޯޕަރޭޝަން މެދުވެރިކޮށް މިހާރު އުމްރާއަށް ފުރުވާފައިވާ ކަމަށެވެ.
"ދެން މޯލްޑިވްސް ހައްޖު ކޯޕަރޭޝަނާ ވާހަކަ ދައްކައިގެން އެތަނުން ވެސް ޖާގަތައް ފުލްވެފައި ހުރީ ހޮޓަލުގައިވެސް. އެހެންނަމަވެސް 28 މީހުންނަށް ޖާގަ ޕްރޮވައިޑް ކޮށްދީފިން މޯލްޑިވްސް ހައްޖު ކޯޕަރޭޝަނުން އުމްރާވެރިން ހަރަދުކުރާ ގޮތަށް،" މިނިސްޓަރު ވިދާޅުވި އެވެ.
އަދަދު އަށް އެނގިފައިވާ ގޮތުގައި އަލް އަބްރާރު ކުންފުނިން އުމްރާއަށް ގެންދާނެ ކަމަށް ބުނި 100 އެއްހާ މީހުންނަށް ޓިކެޓެއް ވެސް ނަގާފައެއް ނުވެ އެވެ. އަދި އުމްރާވެރިންގެ ވިސާގެ ކަންކަން ވެސް ކުންފުނިން ހަމަޖައްސާފައިނުވާކަން އެނގިފައިވެ އެވެ.
އުމްރާއަށް ގެންދާނެ ކަމަށް ބުނެ ކޮންމެ އަހަރަކު ވެސް ބައެއް ގްރޫޕްތަކުން މީހުންނަށް ލަނޑުދޭ މައްސަލަ އިސްލާމިކް މިނިސްޓްރީން ތަހުގީގު ކުރެ އެވެ. ބައެއް މައްސަލަތައް ފުލުހުންނަށް ހުށަހަޅައި ބައެއް ގްރޫޕްތަކުގެ ލައިސަންސް ވެސް ހިފަހައްޓާފައި އެބަހުއްޓެވެ.
ރާއްޖޭގައި ހައްޖާއި އުމްރާއާ ބެހޭ ހާއްސަ ގާނޫނެއް ނޯންނައިރު، މީހުންނަށް ލިބޭ މިފަދަ ލަނޑުތަކާ ގުޅިގެން އެޅޭނެ މާ ހަރުކަށި ފިޔަވަޅުތަކެއް ކަނޑައެޅިފައެއް ނޯވެ އެވެ. އޭގެއިތުރުން ފައިނޭންޝަލް ގެރެންޓީއެއް ނެތި ވެސް އުމްރާއަށް މީހުން ގެންދެވެ އެވެ.
