ބ. ގޮއިދޫގައި ކެންސަރު ބަލި އިތުރުވާ މައްސަލަ ހެލްތު މިނިސްޓްރީއާ ގުޅިގެން ބަލަން ފަށާފައިވާ ކަމަށް މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާއިން ބުނެފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ ވިދާޅުވީ ގޮއިދޫގައި ކެންސަރު ބަލި ގިނަވާ މައްސަލަ މިނިސްޓްރީއާ ގުޅިގެން އެމްއެފްޑީއޭއިން ޓެސްޓުތަކެއްކޮށް ދިރާސާތަކެއް ކުރުމުގެ މަސައްކަތް ކުރަމުންދާ ކަމަށެވެ.
"ބ. ގޮއިދޫގެ މައްސަލައަށް އެމްއެފްޑީއޭއިން މިހާރު ދަނީ އެބޭފުޅުން ޓެސްޓު ކުރައްވަމުން އަދި ރިސާޗް ހައްދަވަމުން. އެއީ ކިހިނެއްވެގެން ހިނގާ ކަމެއްތޯ ބެލުމަށް. އެހެންވީމަ އެކަމުގައި އަޅުގަނޑުމެން ހަމަ އެމްއެފްޑީއޭއަށް އެއްބާރުލުންދީ އަޅުގަނޑުމެންނާ އެކީގައި މަސައްކަތް ކުރަމުންދަނީ،" މާރިޔާ ވިދާޅުވި އެވެ.
ގޮއިދޫގައި ކެންސަރު ބަލި އިތުރުވާ މައްސަލަ ފެންމަތިވީ މިދިޔަ އަހަރުގެ ޑިސެމްބަރު މަހުގެ ތެރޭގައި ސަހުލާ ވަޖީހު ނަމަކަށް ކިޔާ މީހަކު މިނިސްޓަރު މާރިޔާ އަދި ހެލްތު މިނިސްޓަރު އަބްދުﷲ ނާޒިމަށް ފޮނުވި ސިޓީ ސޯޝަލް މީޑިއާގައި އާންމުކުރުމުންނެވެ.
އެ ސިޓީގައި އޭނާ ބުނީ މިދިޔަ ދެތިން އަހަރު ތެރޭގައި ގޮއިދޫގެ ނުވަ މީހަކަށް ކެންސަރު ބަލި ޖެހި، ތިން މީހަކު މަރުވެފައިވާ ކަމަށެވެ.
އޭނާ ބުނީ ފުޅާ ދާއިރާއެއްގައި ދަނޑުވެރިކަން ކުރާ ގޮއިދޫގެ 95 ޕަސަންޓު ދަނޑުބިންތައް ބިދޭސީންގެ އަތްމައްޗަަށް ދޫކޮށްލާފައިވާއިރު، އެ ދަނޑުތަކުގައި ހައްދާ ތަރުކާރީ އާއި މޭވާއަކީ އިންސާނުންގެ ފުރާނައަށް ނުރައްކަވާ މިންވަރަށް ޕެސްޓިސައިޑްސް އަދި އެނޫން ކެމިކަލްތަކުން ތަގައްޔަރުވެފައިވާ ތަކެތި ކަމަށެވެ.
މީގެއިތުރުން ގޮއިދޫއަކީ ދިރިއުޅުމުގެ ވައްޓަފާޅިއާއި އާދަކާދަތަކަށް ބަލާއިރު އާބާދީގެ ނިސްބަތުން ދުންފަތުގެ އިސްތިއުމާލުކުރާ އަދި ދުފާ މީހުން ގިނަ ރަށެއްކަން އޭނާ ފާހަގަކުރި އެވެ.
މާރިޔާ ވިދާޅުވީ ޕެސްޓިސައިޑް ގާނޫނެއް އޮތަސް، އެއްވެސް ޕޮލިސީއެއް ހެދިފައި ނުވާ ކަމަށެވެ.
ނަމަވެސް މިދިޔަ އަހަރު މިނިސްޓްރީން ޕެސްޓިސައިޑަށް ޕޮލިސީއެއް އެކުލަވާލުމުގެ މަސައްކަތް ފަށާފައިވާ ކަމަށާއި އެ ޕޮލިސީ ވަރަށް އަވަހަށް ތަންފީޒުވާނެ ކަމަށް އުންމީދުކުރައްވާ ކަމަށް މިނިސްޓަރު ވިދާޅުވި އެވެ.
