އޮޕަރޭޝަން އަލިމަގުގެ ދަށުން މިދިޔަ ހޮނިހިރު ދުވަހު މާލޭގައި ހިންގި އޮޕަރޭޝަނެއްގައި ބައިކިލޯއަށްވުރެ ގިނަ މަސްތުވާތަކެއްޗާއެކު މީހަކު ހައްޔަރުކޮށްފި އެވެ.
ފުލުހުން ބުނީ މަސްތުވާތަކެތި ގެންގުޅެ، ބޭނުންކޮށް އަދި އެ ތަކެތީގެ ވިޔަފާރިކުރާކަމަށް ތުހުމަތުކުރެވޭ މި މައްސަލައާ ގުޅިގެން ހައްޔަރުކުރީ ލ. ހިތަދޫ، ހަފުލާ، އަލީ މުފާވިޒް، 21، ކަމަށެވެ.
އޭނާ ހައްޔަރުކޮށް، މާލޭގައި އޭނާ ދިރިއުޅޭ އެޕާޓްމަންޓް ބަލައި ފާސްކުރިއިރު މަސްތުވާތަކެތި ކަމަށް ބެލެވޭ 614 ގްރާމްގެ ތަކެއްޗާއި 125،000 އަށްވުރެ ގިނަ ރުފިޔާ ފެނިފައިވާ ކަމަށް ފުލުހުން ބުންޏެވެ.
މައްސަލައާ ގުޅިގެން އަލީ މުފާވިޒްގެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން ފަސް ދުވަހުގެ މުއްދަތެއް ވަނީ ދީފަ އެވެ.
މިދިޔަ ހަފްތާގައި ފުލުހުން ހުޅުމާލޭގައި ހިންގި އޮޕަރޭޝަނެއްގައި ވެސް ވަނީ ބައިކިލޯގެ ޑްރަގާއެކު މީހަކު ހައްޔަރުކޮށްފަ އެވެ. އެ މައްސަލައިގައި ހައްޔަރުކުރީ ހމ. ސިފްކޯހިޔާ 0801 ބީ / މާލެ، އިބްރާހީމް އަމްރު ތައުފީގު، 22، އެވެ.
