އެފްއޭއެމްގެ ހިޔާނާތުގެ މައްސަލައާ ގުޅިގެން ހެކިބަސް ނެގުމަށް ކޯޓަށް ހާޒިރު ނުކުރެވިގެން އުޅޭ އެ އެސޯސިއޭޝަންގެ އެކައުންޓްސް ޑިޕާޓްމަންޓްގެ ކުރީގެ ހެޑް، މުހައްމަދު އަގީލް ފިލައިގެން ތައިލެންޑުގެ ބެންކޮކްގައި އުޅެނިކޮށް ހައްޔަރުކޮށްފި އެވެ.
އަދަދު އަށް އެނގިފައިވާ ގޮތުގައި ފީފާއިން އެފްއޭއެމްއަށް ފޮނުވި 1.2 މިލިއަން ޑޮލަރަށް ބައްސާމް ހިޔާނާތްތެރިވެ، އެ ފައިސާ ބޭނުންކުރި ކަމަށް ބުނާ މައްސަލައާ ގުޅިގެން އަގީލްގެ ހެކިބަސް ނެގުމަށް ކޯޓަށް ހާޒިރު ނުކުރެވިގެން ބެލި ބެލުމުން އޭނާ ރާއްޖޭގައި ނެތްކަން ފުލުހުންނަށް އެނގުނެވެ.
ފިލައިގެން ބެންކޮކުގައި އުޅެނިކޮށް އެ ގައުމުގެ ފުލުހުން އޭނާ މީގެ ދެ ހަފްތާއެއްހާ ދުވަސް ކުރިން ހައްޔަރުކުރީ ރާއްޖެއިން އިންޓަޕޯލް ރެޑްނޯޓިސްއެއް ނެރެފައިވަނިކޮށް ކަމަށް މި ނޫހަށް ވަނީ އެނގިފަ އެވެ.
މިގޮތުން އަގީލް މިވަގުތު ބެންކޮކް ފުލުހުންގެ ބެލުމުގެ ދަށުގައި ހުރިއިރު، އޭނާ ރާއްޖެ ގެނައުމުގެ މަސައްކަތް ދަނީ ކުރަމުންނެވެ. އެކަމުގެ މައުލޫމާތު އެނގޭ މީހަކު އަދަދު އަށް ބުނީ އޭނާ ކުރިއަށް އޮތް ދުވަސްތަކުގައި ތައިލެންޑުން ޑީޕޯޓްކޮށް ރާއްޖެއަށް ފޮނުވާނެ އެވެ.
ފީފާއިން އެފްއޭއެމްއަށް ފޮނުވި ފައިސާއަށް ބައްސާމްގެ މައްސަލައާ ގުޅިގެން އަގީލް ކޯޓަށް ހާޒިރު ނުކުރެވިގެން ގިނަ އަޑުއެހުންތަކެއް ކެންސަލް ކުރަން ޖެހުނެވެ. އެ މައްސަލައިގައި ބައްސާމްގެ މައްޗަށް ހިޔާނާތާއި މަނީ ލޯންޑްރިންގެ ދައުވާކުރި އެވެ.
އަގީލް ބަންދުކޮށްގެން ކޯޓަށް ހާޒިރުކުރަން ކްރިމިނަލް ކޯޓުން އަމުރެއް ނެރުނު ފަހުން ވެސް ބޭއްވި އަޑުއެހުމަށް އޭނާ ހާޒިރު ކުރެވިފައެއް ނުވެ އެވެ. އޭނާ ހައްޔަރުކޮށްގެން ކޯޓަށް ހާޒިރު ނުކުރެވުނު ސަބަބެއް ފުލުހުން އޭރު ހާމައެއް ނުކުރެ އެވެ.
އެފްއޭއެމްގެ ހިޔާނާތުގެ މައްސަލައިގައި އަގީލްގެ މައްޗަށް މަނީ ލޯންޑާ ކުރުމަށް އެހީތެރިވުމުގެ ކުށުގެ ދައުވާ ވެސް އޮތީ އުފުލާފަ އެވެ. އެ މައްސަލައިގެ އަޑުއެހުމެއް މީގެ ކުރިން ތާވަލުކޮށްފައިވާއިރު، އެ އަޑުއެހުމަށް ވެސް އޭނާ ހާޒިރު ކުރެވިފައެއް ނުވެ އެވެ.
އެފްއޭއެމްގެ ހިޔާނާތުގެ މައްސަލައިގައި ބައްސާމްގެ މައްޗަށް މިހާތަނަށް ތިން ހުކުމެއް ވަނީ އިއްވާފަ އެވެ. އެއީ ހަތަރު އަހަރުގެ ހުކުމަކާއި، ފަސް އަހަރުގެ ހުކުމެއްގެ އިތުރުން 23 އަހަރުގެ ހުކުމެކެވެ. އެގޮތުން އޭނާ މިހާރު ދަނީ ޖުމްލަ 32 އަހަރުގެ ޖަލު ހުކުމެއް ތަންފީޒުކުރަމުންނެވެ.
މީގެއިތުރުން އެއް މައްސަލައިގައި ބައްސާމް ވަނީ 44 މިލިއަން ރުފިޔާ އިން ޖޫރިމަނާވެސް ކޮށްފަ އެވެ.
