ޕެންޝަން އޮފީހުގެ ބައިވެރިވުމާއެކު ގާނޫނާ ހިލާފަށް ސަރުކާރުން ފައިސާ ޗާޕު ކުރަން މަސައްކަތް ކުރަމުންދަނިކޮށް އެ އޮފީހުގެ ޗެއާމަން އަހުމަދު އިނާޒް މިއަދު އިސްތިއުފާ ގުޅިގެން އެމްޑީޕީގެ ކުރީގެ ޗެއާޕާސަން، ފައްޔާޒް އިސްމާއިލް އާއި އަމިއްލަ ގޮތުން މޭޔަރުކަަމަށް ވާދަކުރައްވާ، އިސްމާއިލް ޒަރިޔަންދު މަރުހަބާ ދަންނަވައިފި އެވެ.
މަގާމުން އިސްތިއުފާ ދެއްވަމުން އިނާޒް މިއަދު ވިދާޅުވީ، 2.4 ބިލިއަން ރުފިޔާގެ ބޮންޑެއް މެދުވެރިކޮށް ސަރުކާރުން ފައިސާ ޗާޕު ކުރަން މަސައްކަތް ކުރުމަކީ "އިގްތިސާދަށް މި ހާލަތުގައި ގެއްލުން ބޮޑު ނިންމުމެއް" ކަމަށެވެ.
"އެމްއެމްއޭ މެދުވެރިކޮށް މި މުއާމަލާތަށް ފައިސާ ހޯދުމަކީ އިގްތިސާދަށް މިހާލަތުގައި ގެއްލުން ބޮޑު ނިންމުމެއްކަމަށް ޓެކްނިކަލީ ގަބޫލްކުރެވޭތީ ޕެންޝަން އެޑްމިނިސްޓްރޭޝަން އޮފީހުގެ ބޯޑު ގެ ޗެއާޕާސަން ކަމުން މިއަދުން ފެށިގެން އަޅުގަނޑު އިސްތިއުފާ ދީފިން،" ކުރިން ފިނޭންސް މިނިސްޓަރަކަށް ވެސް ހުންނެވި އިނާޒް ވިދާޅުވެފައިވެ އެވެ.
އިނާޒުގެ ނިންމުމަށް މަރުހަބާ ދަންނަަވައި އެކްސްގައި ފައްޔާޒް ކުރެއްވި ޕޯސްޓެއްގައި ވިދާޅުވީ ކެރުންތެރިކަމާއި ނަޒާހާތްތެރިކަން އަދިވެސް ދިރިދެމި އޮތީމާ އުފާކުރައްވާ ކަމަށެވެ.
"ތިމާ އަމިއްލައަށް ގަބޫލުކުރާ ހަމަތައް ހިފެހެއްޓުމަށްޓަކައި ތެދުވިތެދުވުމަށްޓަކައި އިނާޒްއަށް ޝުކުރު ދަންނަވަން، ހުދުމުހުތާރުކަމާ ދެކޮޅަށް ތެދުވާނެ ގިނަ މީހުން އެބަ ބޭނުންވޭ،" ފައްޔާޒް ކުރެއްވި ޕޯސްޓުގައި ވިދާޅުވި އެވެ.
އެ ޕޯސްޓުގައި ފައްޔާޒް ވަނީ މި ސަރުކާރުގެ މާލީ ސިޔާސަތަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން މިދިޔަ އަހަރު ލިބޭނެ ކަމަށް އަންދާޒާކުރި ހިލޭ އެހީގެ ތެރެއިން ލިބުނީ އެންމެ 15 ޕަސެންޓު ނަމަވެސް، މުވައްޒަފުންގެ މުސާރަ އާއި އިނާޔަތްތަކަށް ހިނގާ ހަރަދު މިދިޔަ އަހަރު އެކަނިވެސް އެއް ބިލިއަން ރުފިޔާއަށްވުރެ އިތުރުވިކަމަށް އެ ޕޯސްޓުގައި ފައްޔާޒް ވިދާޅުވި އެވެ.
އޭގެ އިތުރުން ދައުލަތަށް ލިބޭ އާމްދަނީ އިތުރުވި ނަމަވެސް، ދައުލަތުން ކުރާ ހަރަދު އިތުރުވަމުންދާ ކަމާއި ވިޔަފާރިވެރިންނަށް ދޭންޖެހޭ ފައިސާ ނުދީ ހިފަހައްޓާފައި ހުރި މައްސަލަ އަދި، ތަރައްގީގެ މަޝްރޫއުތައް ހުއްޓި ޑޮލަރުގެ އަގު އިންތިހާއަށް އުފުލުމުންދާ މައްސަލަ ފައްޔާޒް ފާހަގަކުރައްވާފައިވެ އެވެ.
ޕެންޝަން އޮފީސް މެދުވެރިކޮށް ފައިސާ ޗާޕު ކުރުމާއި 14 ޕަސެންޓަށްވުރެ ބޮޑު އިންޓްރެސްޓުގައި ލޯނު ނަގަން ކުރާ މަސައްކަތާ ގުޅިގެން ވެސް ފައްޔާޒް ކަންބޮޑުވުން ފާޅުކުރައްވާފައިވެ އެވެ.
އެކަމާ ގުޅިގެން ޒަރިޔަންދު ކުރެއްވި ޕޯސްޓުގައި ވިދާޅުވީ ނޭޝަނަލް ބަޖެޓިންގައި މަސައްކަތް ކުރި ދުވަސްވަރު އިނާޒްގެ ދަށުން މަސައްކަތް ކުރުމުގެ ފުރުސަތު އޭނާއަށް ލިބުނު ކަމަށާއި އިގުތިސާދީގޮތުން ހެޔޮ ބަދަލު އަންނާނެ ފަދަ ނިންމުންތައް ނިންމުމަށްޓަކައި އިނާޒް އޭރު ވެސް ކުރެއްވި މަސައްކަތް ތަޖުރިބާ ކުރެވުނު ކަމަށެވެ.
"މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނިންމި ނިންމުމާ ގުޅިގެން، ޕެންޝަން ބޯޑުން އިސްތިއުފާ ދެއްވުމަށް ތިޔަ ނިންމެވި ނިންމެވުމަށް އަޅުގަނޑު ފުރިހަމައަށް އިހުތިރާމު ކުރަން. ތިޔަ ސާބިތުކޮށްދެއްވި ނަޒާހާތްތެރިކަމާމެދު ފަހުރުވެރިވަން. ތިޔަ ބޭފުޅާއަށް އޮތް އިތުބާރު އަދިވެސް އެގޮތުގައި ދެމި އެބަ އޮތް،" ޒަރިޔަންދު ކުރެއްވި ޕޯސްޓުގައި ވިދާޅުވި އެވެ.
