އެސްޖޭ ކޮންސްޓްރަކްޝަނުން ހުޅުމާލެ ފޭސް ދޭއްގައި އިމާރާތްކުރާ މިސްކިތް ނުނިމި ދިގުލައިގެންދާ ސަބަބުން އެ ކުންފުނިން ސާފުކޮށްދީފި އެވެ.
އެސްޖޭ ކޮންސްޓްރަކްޝަނުން އިސްލާމިކް މިނިސްޓަރު ޑރ. މުހައްމަދު ޝަހީމަށް ފޮނުވި ސިޓީއެއްގައި އެ ކުންފުނިން މިސްކިތް އެޅުމަށް ކޮށްފައިވާ މަސައްކަތްތަކާއި މިނިސްޓްރީގެ ފަރާތުން އެއްބާރުލުން ނުލިބޭކަން ފާހަގަކޮށްފައިވެ އެވެ.
އެސްޖޭއިން ބުނީ މިސްކިތް އިމާރާތްކުރުމުގެ އެއްބަސްވުން އާ ކުރަން ޖޫން 24، 2025، ގައި މިނިސްޓްރީއާއެކު ބޭއްވި ބައްދަލުވުމެއްގައި ދެފަރާތުން އެއްބަސްވުމަށްފަހު، ބައްދަލުވުމުގައި ވައުދުވި ގޮތަށް މިނިސްޓްރީން އަމަލުކޮށްފައިނުވާތީ، އެ އެއްބަސްވުން އެކީގައި ބާތިލުވެފައިވާ ކަމަށެވެ.
އެ ބައްދަލުވުން މިނިސްޓްރީއާއެކު ބޭއްވުނީ އެއްބަސްވުމުގެ މުއްދަތު ހަމަވެ، މުއްދަތު އާ ނުކޮށް، އޮންނަތާ 341 ދުވަސް ފާއިތުވެގެން ދިޔައިރުވެސް މިނިސްޓްރީގެ ހަބަރެއް ނުވެގެން އެސްޖޭއިން އެދިގެންކަން ފާހަގަކޮށް އެ ކުންފުނިން ބުނީ މިނިސްޓްރީއާއެކު ޖޫން 24، ގައި ބޭއްވި ބައްދަލުވުމުގެ ޔައުމިއްޔާ ވެސް ނެތް ކަމަށް ބުނެ ޔައުމިއްޔާ ހިއްސަކޮށްފައި ނުވާ ކަމަށެވެ.
"މައްސަލާގައި ކަންހިގާފައިވާ ގޮތަކީ މިކުންފުނިން އެއްބަސްވުމުގެ މުއްދަތު އިތުރުކުރުމަށް އެތަށް ފަހަރަކު އީއޯޓީއަށް އެދުމުންވެސް އީއޯޓީ އެޕްރޫވް ނުކުރުމުން މަސައްކަތް މެދުކަޑާލުމުން، 24 ޖޫން 2025 ގައި ބައްދަލުވުމެއް ބޭއްވުމަށްފަހު އެއްބަސްވުން އައުކުރުމަށް ދެފަރާތުން އެއްބަސްވެފައި، ބައްދަލުވުމުގައި ވައުދުވި ފަދައިން މިނިސްޓްރީން އަމަލުކޮށްފައިނުވާތީ، އެކަށީގެންވާ މުއްދަތެއްގައި އެއްބަސްވުން އައުނުކުރުމުގެ ސަބަބުން އެއްބަސްވުން އެކީގައި ބާތިލުވެފައިވުން،" އެސްޖީއިން ބުންޏެވެ.
މިސްކިތް އެޅުމަށް އެސްޖޭއާ ހަވާލުކޮށްފައި އޮތް މަޝްރޫއު ނިންމަން ހަވާލުކުރީ ޖުލައި 18، 2024، ގަ އެވެ. އެ މުއްދަތުގެ ކުރިން މިނިސްޓްރީން މިސްކިތުގެ ކުރެހުމަށް ގިނަ ބަދަލުތަކެއް ގެނެސްފައިވާއިރު، އޭގެއިން އެއްވެސް ބަދަލެއް ވެސް އެއްބަސްވުމަށް އިތުރުނުކުރާ ކަމަށް އެސްޖޭއިން ބުންޏެވެ.
މިގޮތުން އެސްޖެއިން ބުނީ މިނިސްޓްރީގެ ހަބަރެއް ނުވެ އެތައް ދުވަހެއް ފާއިތުވެފައިވާތީ، އެތައް ދުވަހެއް މަޝްރޫ ކުރިއަށް ނުގެންދެވި މަޑުޖެހިގެންދިޔަ ކަމަށެވެ. އޭގެއިތުރުން މަޝްރޫއުގެ މަސައްކަތުގެ އަޕްޑޭޓްތައް މިނިސްޓްރީން ނުބަލާ ކަމަށާއި ފޮނުވާ ސިޓީތަކަށް ވެސް ޖަވަބު ނުދޭކަން އެސްޖޭއިން ފާހަގަކުރި އެވެ.
އެ ކުންފުނިން ބުނީ މިނިސްޓްރީން މަޝްރޫއަށް ސަމާލުކަން ނުދޭކަން އެނގެނީ ނޮވެމްބަރު 15، 2023، ގައި ފޮނުވި ސިޓީއަށް މެއި، 20، 2025، ގައި ޖަވާބު ދިނުމުން ކަމަށެވެ. މިނިސްޓްރީން އެ ސިޓީއަށް ޖަވާބުދިންއިރު މަޝްރޫއު ޖުލައި 18، 2024، ގައި ނިމިފައިވާކަން ކުންފުނިން ފާހަގަކުރި އެވެ.
"2025 ވަނަ އަހަރު ސެޕްޓެމްބަރު މަހު 02 ވަނަ ދުވަހު މިނިސްޓަރު ސައިޓަށް ވަޑައިގެންފައި ގުއްބުގެ ސައިޒު އަދަދާއި ހިލާފަށް ބޮޑުވުމުން މެއިންޓެނެންސް ކުރުމަށް ދަތިވާނެތީ، ގުއްބު އަލުން ރީޑިޒައިން ކޮއްދިނުމަށް މިކުންފުނީގައި އެދުމުން މިނިސްޓްރީން އެދިލެއްވި ފަދައިން ރީޑިޒައިންކޮށް މިނިސްޓްރީއަށް ހުށަހަޅާފައިވާނެ. އަދި އަދާއި ހަމައަށްވެސް މިނިސްޓަރ ސައިޓަށް ވަޑައިގެން ދެއްވި އިރުޝާދު ލިޔުމުން މިކުންފުންޏަށް ލިބިފައިނުވޭ. އަދި ޓްރޯވިން އެޕްރޫވަލް ލިބިފައިވެސްނުވޭ،" އެ ކުންފުނިން ބުންޏެވެ.
ނަމަވެސް އެސްޖެއިން ބުނީ މިނިސްޓްރީއާއެކު ހެދި އެއްބަސްވުން ބާތިލުވެފައިވީ ނަމަވެސް، އެ ކުންފުނިން ދަނީ މިސްކިތުގެ ކުރެހުމުން މަދުވާ ކުރެހުންތައް އަމިއްލައަށް ކުރަހައި، މިނިސްޓްރީއަށް ހުށަހަޅަމުން ކަމަށެވެ. ނަމަވެސް މިނިސްޓްރީން އެޕްރޫވް ލިބެންދެން، މަސައްކަތް މަޑުނުޖައްސާ މިހާރު ކުރަމުންދާ ކަމަށް އެ ކުންފުނިން ބުންޏެވެ.
މީގެއިތުރުން ިނިސްޓްރީއަށް ޑިޕެންޑުނުވެ މަސައްކަތް ކުރިޔަށްދާތީ އޭގެ ހެޔޮ ނަތީޖާ ސައިޓުން މިހާރު ފެންނާނެ ކަމަށް އެ ކުންފުނިން ބުންޏެވެ. އެ ކުންފުނިން ބުނީ މަޝްރޫއުގެ މަސައްކަތް ކުރިއަށް ނުގެންދެވި ހުއްޓުނީ އިސްލާމިކް މިނިސްޓްރީގެ އައިރު ޒިންމާދާރުކަމުންނެވެ.
އެސްޖޭގެ ޑިރެކްޓަރު ޝިހާދު އިބްރާހިމަށް ވަޓްސްއަޕުން މެސެޖުކޮށް "30 މިލިއަން ރުފިޔާ ކާލާގެން އަމިއްލަ ވިޔަފާރި ތިކުރަނީ" ކަމަށް ބުނެ މެސެޖުކޮށްފައިވާތީ، އަދި އެސްޖޭއިން ރިސޯޓެއް ތަރައްގީކުރާ ކަމަށް ނޫހެއްގައި ލިޔެފައިވާ ހަބަރެއްގެ ސްކްރީންޝޮޓާއެކު މެސެޖުކޮށްފައިވާތީ، އެ ފައިސާ ކެއިގޮތް ސާފުކޮށްދިނުމަށް ވެސް މިނިސްޓަރަށް ފޮނުވި ސިޓީގައި އެސްޖޭއިން އެދިފައިވެ އެވެ.
މީގެއިތުރުން މިސްކިތް އެޅުމުގެ އެއްބަސްވުމުގެ ދަށުން މިނިސްޓްރީން އަދާކުރަންޖެހޭ ޒިންމާތަށް އަދާކުރެވިފައިވާ މިންވަރު އަންގައިދޭ ޓައިމްލައިނާއި މިދިޔަ އަހަރު ޖޫން، އޮކްޓޯބަރު އަދި ޑިސެމްބަރު ބޭއްވުނު ބައްދަލުވުންތަކުގެ ޔައުމިއްޔާ ފޯރުކޮށްދިނުމަށް ވެސް އެސްޖޭއިން އެދިފައިވެ އެވެ.
އެސްޖޭއިން ވަނީ މިހާތަނަށް ރާއްޖެގައި 11 މިސްކިތް ބިނާކޮށް، އެއް އިސްލާމީ މަރުކަޒު އަޅައިފަ އެވެ. އެ ކުންފުނިން ފޭސް ދޭއްގެ މިސްކިތުގެ މަސައްކަތް ފެށިފަހުން ފެށި ހއ. ދިއްދޫ 75 ރޯހައުސް އަދި ލ. ގަމު 100 ހައުސިން ޔުނިޓްގެ މަސައްކަތް ވަނީ 95 ޕަސަންޓް ނިންމާފަ އެވެ.
މީގެ އިތުރުން އއ. ރަސްދޫ، ޅ. ކުރެންދޫ އަދި ސ. ފޭދޫ ގައި މިކުންފުނިން ދަނީ ހައުސިން މަޝްރޫއު ހުއްޓުމެއްނެތި ކުރަމުންނެވެ.
