މިއަދު ފުލުހަށް ހާޒިރުވާން އަންގައި ކުރިއަށް އޮތް ލޯކަލް ކައުންސިލް އިންތިހާބުގައި ހުޅުމާލެ އުތުރަށް އެމްޑީޕީގެ ޓިކެޓުގައި ވާދަކުރާ، ފާތިމަތު ޒަހިއްޔާ (ޒާޔާ) އަށް ފުލުހުންގެ މުއައްސަސާއިން ފޮނުވި ޗިޓު ކެންސަލްކޮށްފި އެވެ.
ޒާޔާ ފުލުހަށް ހާޒިރު ވާން އެންގީ އޭނާ ސޯޝަލްމީޑިއާގައި ކުރި ޕޯސްޓަކާ ގުޅިގެން ބަޔާން ނެގުމަށް ކަމަށް ބުނެ އެވެ. އޭނާއަށް އިއްޔެ ފުލުހުން ފޮނުވި ޗިޓުގައި ބުނެފައި ވަނީ މިއަދުގެ މެންދުރުފަހު 2:00 އަށް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވުމަށެވެ.
ނަމަވެސް، އެ މައްސަލައިގައި ބަޔާން ނެގުމަށް ފަހުގެ ތާރީހެއްގައި ފުލުހަށް ހާޒިރުވާން އަންގާނެ ކަމަށް ބުނެ ރޭގެ 8:20 ހާއިރު ފުލުހުން ވަނީ އޭނާއަށް ފޯނުން ގުޅައި ޗިޓު ކެންސަލްވިކަން އަންގައިފަ އެވެ.
ޒާޔާއަށް ފޮނުވި ޗިޓު ފުލުހުން ކެންސަލް ކޮށްފައި މި ވަނީ، މީގެ އެތައް މަހެއް ކުރީގެ މައްސަލައެއްގައި ބަޔާން ނެގުމަށް ކަމަށް ބުނެ އިންތިހާބެއް ބޯމަތިވެފައި ވަނިކޮށް ފުލުހަށް ހާޒިރު ކުރަން ޗިޓު ފޮނުވުމުން، އެކަމަށް ވަރަށް ބޮޑަށް އާންމުންގެ ފާޑުކިޔުން އަމާޒުވެފައި ވަނިކޮށެވެ.
އެ މައްސަލައިގައި މީގެ ކުރިން ވެސް ފުލުހުން ވަނީ އޮކްޓޫބަރު 7، 2025 ގައި ކޯޓު އަމުރެއްގެ ދަށުން އޭނާގެ ފޯނު ހިފަހައްޓައިފަ އެވެ. އެ ކޯޓު އަމުރުގައި ބުނެފައިވަނީ ޒާޔާގެ ފޯނު ހިފެހެއްޓީ އޭނާގެ ފޭސްބުކް އެކައުންޓުން "ފުލުހުންނަށް އިންޒާރުދީ" ކުރި ޕޯސްޓަކާއި ގުޅިގެން ކަމަށެވެ.
ކޯޓު އަމުރުގައި އެ ޕޯސްޓު ކުރި ތާރީހާއި ގަޑި ހިމަނާފައިވެ އެވެ. އެ ޕޯސްޓުގައި ލިޔެފައިވަނީ "17 ނޮވެންބަރަށް ތައްޔާރު ވުމަށް ކަނޑޫދޫ މިރުހުން ސްޕްރޭ ތައްޔަަރުކުރަން ފަށައިފިން. ހަމަ ޖެހީ ޖެހީ" މިފަދައިންނެވެ. އަދި ފުލުހުންގެ ފޭސްބުކް ޕޭޖު ޓެގުކޮށްފައިވެ އެވެ.
ޒާޔާގެ ފޯނު ފުލުހުންގެ ބެލުމުގެ ދަށުގައި އޮއްވައި އޮކްޓޫބަރު 12، ގައި ވަނީ އޭނާގެ ޒާތީ ވީޑިއޯތަކެއް ސޯޝަލްމީޑިއާގައި ލީކު ކޮށްލައިފަ އެވެ. ޒާޔާގެ ޒާތީ ދެ ވީޑިއޯއެއް ލީކު ކޮށްލީ ކާކުކަން ނޭނގޭ އެކްސް އެކައުންޓަކުންނެވެ. ނަމަވެސް ގިނަ ބަޔަކު އެ އެކައުންޓު ރިޕޯޓު ކުރަން ފެށުމުން އެ އެކައުންޓު ވަނީ މަދު ވަގުތުކޮޅެއްގެ ތެރޭގައި އެކްސްއިން ރިމޫވް ކޮށްފަ އެވެ.
އެ ވީޑިއޯތައް ލީކުވުމުން، ޖެހިގެން އައި އޮކްޓޫބަރު 13، ވަނަ ދުވަހު ފުލުހުން ވަނީ ޒާޔާގެ ފޯނު ދޫކޮށްލައިފަ އެވެ.
އޭގެ ފަހުން އޮކްޓޫބަރު 3، ގައި ކުރި މުޒާހަރާއާ ގުޅިގެން ވެސް އެ މަހުގެ 21 ވަނަ ދުވަހު އޭނާ ފުލުހަށް ހާޒިރުކުރި އެވެ. އެ ދުވަހު އޭނާ ފުލުހަށް ހާޒިރުކުރީ އެމްޑީޕީން ކުރިއަށް ގެންދިޔަ މުޒާހަރާގެ ސީސީޓީވީ ފުޓޭޖް ކޮމްޕެރިސަން ސާމްޕަލް ހެދުމަށް ބޭނުންވާ ފޮޓޯ ނެގުމަށާއި އެ މައްސަލައާ ގުޅިގެން ބަޔާން ނެގުމަށް ކަމަށް ބުނެ އެވެ.
