މޯލްޑިވްސް ޖާނަލިސްޓު އެސޯސިއޭޝަންގެ ރައީސް، އަހުމަދު ނާއިފްއަށް މަރުގެ އިންޒާރު ދީފި އެވެ.
ދައުރު ނޫހުގެ އެޑިޓަރެއްގެ މަގާމު ވެސް ފުރުއްވާ ނާއިފް މަރާލާނެ ކަމަށް ބުނެ އިންޒާރު ދީފައި ވަނީ ފޭސްބުކް މެސެންޖާ މެދުވެރިކޮށެވެ. ހުސެއިން މެސީގެ ނަމުގައި ހިންގާ ފޭސްބުކް އެކައުންޓަކުން ކުރި ޕޯސްޓެއްގައި އިންޒާރުދީ ބުނެފައި ވަނީ ކ. ގުރައިދޫއަށް އަރައިފި ނަމަ، ވަކިވަކި ކޮށްލާފައި ވިއްކާލާނެ ކަމަށެވެ.
އެކަމާ ގުޅިގެން އަދަދު އާ ވާހަކަދައްކަވަމުން ނާއިފް ވިދާޅުވީ އިންޒާރުގެ މެސެޖުތައް އަންނަން ފެށީ ސަރުކާރު މުވައްޒަފުން ހެދުން އެޅުމުގެ މިންގަނޑާ މެދު ދައުރު ނޫހުގެ ޕޮޑްކާސްޓެއްގައި ދެއްކި ވާހަކަ އާއި ސިޓީ ހޮޓާތަކުން ވެސް ވަކި ހުއްދައެއް ނަގައިގެން ފަތުރުވެރިންނަށް ބަނގުރާ ވިއްކޭ ގޮތް ހަދަންޖެހޭ ކަމަށް ބުނެ ފާޅުކުރި ހިޔާލަކާ ގުޅިގެން ކަމަށެވެ.
"[ފޭސްބުކް މެސެންޖާއިން] އިންޒާރުގެ މެސެޖުތައް ފޮނުވަނީ، އެ މައްސަލަ މިހާރު ވާނެ ފުލުހުންނަށް ވެސް ހުށަހަޅާފައި،" ނާއިފް ވިދާޅުވި އެވެ.
އެކިއެކި އެކައުންޓުތަކުން އިންޒާރުގެ މެސެޖުތައް ލިބެމުންދާކަން ފާހަގަކުރައްވައި ނާއިފް ވިދާޅުވީ އެންމެ ކަންބޮޑުވަނީ އިންޒާރު ދެނީ ކޮންބައެއްކަން ފުލުހުންނަށް ނުހޯދޭތީ ކަމަށެވެ. އަދި، އޭގެ ސަބަބެއް ކަމަށް ބެލެވެނީ އެފަދަ އަމަލުތަކަށް ހިތްވަރު ދިނުމުގައި ސަރުކާރުގެ ސޯޝަލްމީޑިއާ އެކްޓިވިސްޓުން އުޅުން ކަމަށް ނާއިފް ވިދާޅުވި އެވެ.
"ކަންބޮޑުވަނީ އެ މީހުންނަށް [ފުލުހުންނަށް] އެކަން ނުހޯދޭތީ، ކޮންމެ ފަހަރަކު ބޮޑީ ގާޑެއް ލާފައި ދޫކޮށްލަނީ، އަސްލު އެހެން އެ ވަނީ ސަރުކާރުގެ ސޯޝަލްމީޑިއާ އެކްޓިވިސްޓުން ވެސް މި ފިއުލް ކުރުމުގައި ބައިވެރިވޭ، އެއީ ދެން ވަރަށް ބޮޑު ކަންބޮޑުވުމެއް،" ނާއިފް ވިދާޅުވި އެވެ.
ނާއިފް ވިދާޅުވީ މަރުގެ އިންޒާރު ދިން މައްސަލަ ފުލުހަށް ހުށަހެޅުމާއެކު، އެ މުއައްސަސާއިން ސެކިއުރިޓީގެ ހިދުމަތް މިހާރު ފަށާފައިވާ ކަމަށެވެ. މީހެއްގެ ފުރާނައަށް ގެއްލުމެއް ދޭނެ ކަމަށް ބުނެ ދޭ އިންޒާރަކާ ގުޅިގެން ސެކިއުރިޓީގެ ހިދުމަތް ދެނީ އެ މީހަކަށް އޮތް ނުރައްކަލުގެ ބޮޑުކުޑަ މިންވަރު ވަޒަންކުރުމަށް ފަހު އެވެ.
މިއީ ނާއިފްއަށް މަރުގެ އިންޒާރު ދިން ތިންވަނަ ފަހަރެވެ. މީގެ ކުރިން 2023 ގައި ދައުރު ނޫހުގައި ޝާއިއުކުރި ރިޕޯޓަކާ ގުޅިގެން ވެސް އޭނާއަށް މަރުގެ އިންޒާރު ދިނެވެ. އެ މައްސަލަ މަޖިލީހަށް ވެސް އޭރު ހުށަހެޅި އެވެ. ނަމަވެސް އެ އިންޒާރު ދިނީ ކާކުކަން ދެނެނުގަނެވޭތީ ކަމަށް ބުނެ އެ ފަހަރު ވެސް ފުލުހުން މައްސަލަ ފައިލް ކުރީ އެވެ.
އޭގެފަހުން މިދިޔަ އަހަރު ފާސްކުރި ކޮންޓްރޯލް ގާނޫނާ ދެކޮޅަށް ނޫސްވެރިން މުޒާހަރާ ކުރި ދުވަސްވަރު ވެސް ނާއިފްއަށް މަރުގެ އިންޒާރު ދިނެވެ. އެ މައްސަލަ ވެސް ފުލުހުންނަށް އޭރު ހުށަހެޅި އެވެ. ނަމަވެސް، އެ މައްސަލައިގައި ވެސް އެއްވެސް މީހަކަށް ފިޔަވަޅެއް ފުލުހުން އަޅައިފައެއް ނުވެ އެވެ.
