މި އަހަރު އަމަލުކުރަން ފެށި ޒަކާތު ގަނޫނުގެ ދަށުން އެކުލަވާލި ޒަކާތު ކައުންސިލްގެ ފުރަތަމަ ބައްދަލުވުން މިއަދު ބާއްވައިފި އެވެ.
ޒަކާތު ކައުންސިލްގެ ރައީސް، އިސްލާމިކް މިނިސްޓަރު ޑރ. މުހައްމަދު ޝަހީމް ރިޔާސަތު ބެލެހެއްޓެވި އެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ ޒަކާތާ ބެހޭ ގާނޫނުގައި ބަޔާންކޮށްފައިވާ ގޮތަށް، މޯލްޑިވްސް ޒަކާތު ހައުސްގެ މަސައްކަތްތައް ހަރުދަނާކަމާއެކު ކުރިއަށް ގެންދިޔުމާ ގުޅޭ ގޮތުންނެވެ.
ޒަކާތު ހައުސްގެ މަސައްކަތްތައް ނަތީޖާ ނެރެވޭނެ ފަދަ، ދެފުށް ފެންނަ އަދި ނިޒާމީ ގޮތެއްގައި މަސައްކަތް ކުރިއަށް ގެންދިއުމަށް ޓަކައި އިދާރީ ގޮތުންނާއި ހިންގުމުގެ ގޮތުން ކުރަންޖެހޭ މުހިންމު ކަންކަމާ ގުޅޭގޮތުން ވެސް އެ ބައްދަލުވުމުގައި މަޝްވަރާކުރި އެވެ.
ޒަކާތު ކައުންސިލަކީ ދީނީ އަދި މާލީ މުހިންމު މުއައްސަސާތަކުގެ މަންދޫބުން ހިމެނޭ ގޮތަށް އެކުލަވައިލެވިފައިވާ ނުވަ މެންބަރުންގެ މައްޗަށް އެކުލެވޭ ކައުންސިލެކެވެ.
އެ ކައުންސިލުގައި ހިމެނެނީ އިސްލާމިކް މިނިސްޓްރީ، ފަތުވާ މަޖިލިސް، ފިނޭންސް މިނިސްޓްރީ، އެމްއެމްއޭ އަދި މީރާގެ މަންދޫބުންގެ އިތުރުން ރައީސް މުހައްމަދު މުއިއްޒު އައްޔަންކުރައްވާފައިވާ ޒަކާތާބެހޭ މާހިރުންނެވެ.
ޒަކާތު ކައުންސިލުގެ މަސްއޫލިއްޔަތަކީ މޯލްޑިވްސް ޒަކާތު ހައުސްއަށް ބޭނުންވާ އިސްތިރާޖީ ލަފަޔާއި އިރުޝާދު ދިނުމެވެ. ހާއްސަކޮށް އިދާރީ ހިންގުމާއި، ސިޔާސަތުތައް ކަނޑައެޅުމާއި، ގައުމީ ޒަކާތުގެ ނިޒާމު ސުޕަވައިޒްކޮށް ބެލެހެއްޓުމުގެ ކަންކަމުގަ އެވެ.
