ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ޔުނައިޓެޑް ވިކްޓަރީ (ޔޫވީ) 2-1 އިން ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން ލީގުގެ އެއް ވަނައިގައި ހަމަޖެހިލައިފި އެވެ.
މި މޮޅާ އެކު، މާޒިޔާ އަށް ވަނީ 13 މެޗުން 37 ޕޮއިންޓް ލިބިފަ އެވެ. ދެ ވަނައިގައި އޮތް އޮޑި ސްޕޯޓްސް ކްލަބަށް 12 މެޗުން ވަނީ 28 ޕޮއިންޓް ލިބިފަ އެވެ. ތިން ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބަށް ވަނީ 12 މެޗުން 23 ޕޮއިންޓް ލިބިފަ އެވެ.
އާ އަހަރަށް ލީގު ބްރޭކަކަށް ދިއުމަށް ފަހު، މިއަދު އަލުން ފެށިއިރު، މާޒިޔާ އިން ޔުނައިޓެޑް ވިކްޓަރީ އަތުން ހޯދީ އުނދަގޫ މޮޅެކެވެ. މެޗުގެ 30 ވަނަ މިނިޓްގައި މާޒިޔާ އިން ލީޑުނެގީ ހަމްޒާ މުހައްމަދު (ހަމްޕު) ޖެހި ގޯލުންނެވެ. މިއީ، ޔުނައިޓެޑް ވިކްޓަރީގެ ކީޕަރު، އަލީ އާދެލް މުސްތަފާ އަލީ ހެދި ގޯހަކުން ހަމްޕު ޖެހި ލަނޑެކެވެ. ކީޕަރު މުސްތަފާ އަށް ލިބުނު ބޯޅައެއް ފޮނުވާލުން ލަސްކޮށްލުމުގެ ފައިދާނަގައި، ހަމްޕު ވަނީ އެ ބޯޅަ ހޯދައި ގޯލަށް ފޮނުވާލައިފަ އެވެ.
މާޒިޔާ އިން ދެ ވަނަ ލަނޑު ޖެހީ މެޗުގެ 82 ވަނަ މިނިޓްގައި ނާއިޒު ހަސަން (ދާދު) އެވެ. މިއީ ކޯނަރެއްގައި މާޒިޔާގެ ޕޯޗުގީސް ޑިފެންޑަރު، ލުއިސް އަލްމައިޑާ ފޮނުވާލި ބޯޅައެއްގައި ގޯލު ރޮނގުމަތިން ތަނަވަސްވި ފުރުސަތެއްގައި ދާދު ޖެހި ގޯލެކެވެ.
އިތުރު ވަގުތުގެ ހަ ވަނަ މިނިޓްގައި ޔުނައިޓެޑް ވިކްޓަރީން މެޗުގައި ޖެހި ހަމައެކަނި ލަނޑު ކާމިޔާބުކުރީ އެ ޓީމުގެ މިސްރު ފޯވާޑް މުހައްމަދު ސާމިރު އެވެ. އޭރިއާބޭރުން އޭނާ ފޮނުވާލި ބޯޅަ ގޯލަށް ވަނީ މާޒިޔާގެ ކީޕަރު، އިޔާން އަބްދުލް އަލީމް (ޗިކީ) އަތްދަށުން ގޮހެވެ.
