މިދިޔަ އަހަރު ގއ. ވިލިނގިލީގައި މާބަނޑު އަންހެނެއްގެ ހާލު ދެރަވެގެން ހޮސްޕިޓަލަށް ގެންގޮސް ސިޒޭރިއަން ހެދިފަހުން، އިތުރަށް ހާލަތު ގޯސްވެ، އެމަޖެންސީގައި މާލެ ނުގެނެވިގެން އުޅުމުގެ ތެރޭގައި ދެމައިން ވެސް ނިޔާވި މައްސަލައިގައި ދައުވާ ނުކުރަން ޕްރޮސެކިއުޓާ ޖެނެރަލް އޮފީސް (ޕީޖީ) އިން ނިންމައިފި އެވެ.
ފުލުހުން މައްސަލަ ފައިލްކޮށް އާއިލާއަށް ފޮނުވި ލިޔުމުގައި ބުނީ އެ މައްސަލަ ޕީޖީއަށް ހުށަހެޅުމުން، މައްސަލައިގައި ޖިނާއީ ދައުވާއެއްކޮށް ކުށް ސާބިތުވެދާނެ ކަމެއް ނުފެންނާތީ ޑިކްލައިންކޮށްފައިވާ ކަމަށެވެ.
"ޕްރޮސެކިއުޓާ ޖެނެރަލް އޮފީހަށް މައްސަލަ ހުށަހެޅުމުން، މައްސަލައިގައި ޖިނާއީ ދައުވާއެއްކޮށް ކުށް ސާބިތުކުރެވިދާނެ ކަމަށް ނުފެންނާތީ މައްސަލަ ޑިކްލައިންކޮށްފައިވޭ. އެހެންކަމުން، މި މައްސަލަ ފައިލްކުރެވިފައިވާ ވާހަކަ ދެންނެވިން،" ފުލުހުން ބުންޏެވެ.
ބަނޑަށް އަށް މަހުގެ ޝިއުނާ ވަހީދު، 35، ވިލިނގިލީ ހޮސްޕިޓަލަށް ގެންދިޔައީ ނޭވާލާން އުނދަގޫވެގެންނެވެ. ޖެހިގެން އައި ދުވަހު ވެސް ހާލު ރަނގަޅު ނުވެގެން ސިޒޭރިއަން ހެދުމަށްފަހު އަށް މަހުގެ ދަރިފުޅުނު ނެގި އެވެ،. އެއަށްފަހު ދެމެއިންގެ ހާލު ރަނގަޅު ނުވެގެން މާލެ ގެންނަން މަސައްކަތް ކުރަނިކޮށް ނިޔާވީ ކޫއްޑޫ އެއާޕޯޓުގެ ރަންވޭ މަތީގަ އެވެ.
ޝިއުނާގެ ފިރިމީހާ އަދަދު އަށް ބުނީ މައްސަލަ ފައިލް ކުރުމުން ދާނެ ތަނެއް ހަދާނެ ގޮތް ވެސް ހުސްވެފައިވާ ކަމަށެވެ. އޭނާ ބުނީ ކިތަންމެ ދޮރެއްގައި ތެޅިޔަސް މިކަމުގައި އިންސާފު ލިބޭނެ ކަމަށް ގަބޫލުނުކުރާ ކަމަށެވެ.
"ދާނެ ތަނެއް ހަދާނެ ގޮތެއް ވެސް ދެން ނޭގޭ. ކިތަންމެ ދޮރެއްގައި ތެޅިޔަސް އިންސާފު ލިބޭނެ ކަމަށް ގަބޫލެއް ނުކުރަން. ކުށަކަށްވީ ފަރުވާ ހޯދުން. ހޮސްޕިޓަލަށް ދިޔުން. އެކަމަކު އެނގޭ ފްލައިޓް އައުން ލަސްވިކަމާއި ފަރުވާ ދިނުން ލަސްވިކަން،" އޭނާ ބުންޏެވެ.
އެ މައްސަލައިގައި ފުލުހުން ޖިނާއީ ތަހުގީގެއް ހިންގާފައިވަނީ އެކަމުގައި އިހުމާލުވެފައިވާ ފަރާތެއްވާނަމަ ގާނޫނީ ފިޔަވަޅު އެޅުމަށް ހޯމްލޭންޑް ސެކިއުރިޓީ މިނިސްޓަރު ފުލުހުންނަށް އެންގުމުންނެވެ.
"[މި] ހާދިސާގައި އެއްވެސް ފަރާތެއްގެ އިހުމާލެއްވޭތޯ ޖިނާއީ ތަހުގީގެއް ހިންގާ އިހުމާލުވެފައިވާ ފަރާތެއްވާނަމަ އެފަރާތެއް ނުވަތަ ފަރާތްތަކެއްހޯދާ ގާނޫނީ ފިޔަވަޅު އެޅުމަށް ސަރުކާރުގެ ފަރާތުންވަނީ ދިވެހި ފުލުހުންނަށް އަންގާފަ،" އިހުސާން ކުރިން ވިދާޅުވި އެވެ.
މި ހާދިސާގައި ބައެއްގެ އިހުމާލު އޮތް ކަމަށް ޝިއުނާގެ އާއިލާއިން ބުނެ އެވެ. އެ އާއިލާއިން ބުނީ ވިލިނގިލީ ހޮސްޕިޓަލާއި އެއާ އެމްބިއުލޭންސުގެ އިހުމާލު ވެސް އެކަމުގައި އޮތް ކަމަށެވެ.
ޝިއުނާ ނިޔާވުމުގެ ކުރިން އޮކްސިޖެން ލެވެލް އިންތިހާއަށް ދަށްވިއިރު ވެސް ހޮސްޕިޓަލުން އެކަން ސީރިއަސްކޮށް ނުނަގާ ކަމަށް އާއިލާއިން ބުނެ އެވެ.
އޭގެއިތުރުން ދެމައިން ބަލައި ފޮނުވި އެއާ އެމްބިއުލޭންސްގައި އޮކްސިޖަން އާއި އެހެނިހެން ސާމާނު ހަމައަށް ނެތް ކަމަށް ވެސް އާއިލާއިން ފާހަގަކޮށްފައިވެ އެވެ.
ދެމެއިން މަރުވި މައްސަލައިގައި އިންސާފު ގާއިމުކުރުމަށް ގޮވާލައި ވިލިނގިލީގައި އިހުތިޖާޖުވެސް ކުރި އެވެ.
