މާލޭގެ މަގުމަތީގައި ގުރޫޕް ހަދައިގެން ތިބި ބަޔަކު ބަލައި ފާސްކުރުމަށް ހުރަސްއަޅައި، ފުލުހަކަށް ހަމަލާދިން މައްސަލައެއްގައި ތިން މީހަކު ހައްޔަރުކޮށްފި އެވެ.
ފުލުހުން ބުނި ގޮތުގައި މިކަން ހިނގާފައިވަނީ މި މަހުގެ 23 ވީ އަންގާރަ ދުވަހުގެ ހަވީރު 16:15 އެހައިކަންހާއިރު، އިއްޒުއްދީން މަގާއި ގަނދަކޯޅި މަގު ގުޅޭ ކަންމަތީގައެވެ.
އެ ސަރަހައްދުގައި ގުރޫޕް ހަދައިގެން ތިބި ބަޔަކު ފެނުމުން، އެމީހުންގެ އަމަލުތައް ހުރި ގޮތުން ޖިނާއީ ކުށެއް ކުރަން އުޅޭ ކަމަށް ތުހުމަތުކުރެވިގެން ބަލައި ފާސްކުރަން އުޅުމުން ފުލުހުންގެ ދައުރު އަދާކުރުމަށް ހުރަސްއަޅައި ފުލުހުންނަށް އިންޒާރު ދިން ކަމަށާއި އެއަށް ފަހު ފުލުހަކަށް ހަމަލާދީ މާރާމާރީ ހިންގި ކަމަށް ފުލުހުން، މީޑިއާ އަށް ފޮނުވި މެސެޖެއްގައި ބުނެފައިވެ އެވެ.
މި މައްސަލައާ ގުޅިގެން ހައްޔަރުކުރީ ޏ. ފުވައްމުލައް، މިސްކިތްމަގު، ކެމީ، އަހުމަދު ރަޒީން، 22، އާއި، އެރަށު ފުނާޑު، ނަމަން، ނާފިއު އިބްރާހިމް، 30، ގެ އިތުރުން ގދ. ވާދޫ، އިރާކުވިލާ، މުހައްމަދު ލުވޭޒް 19، ކަމަށް ފުލުހުން ބުނެ އެވެ.
މި ތިން މީހުންނަކީވެސް ޖިނާއީ ކުށުގެ ރެކޯޑު އޮންނަ މީހުން ކަމަށް ފުލުހުން ބުނެ އެވެ.
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުހައްމަދު ލުވޭޒް 15 ދުވަހަށް، އަހުމަދު ރަޒީން 5 ދުވަހަށް އަދި ނާފިއު އިބްރާހިމް 2 ދުވަހުގެ މުއްދަތަށް ބަންދުކުރުމަށް ކޯޓުން ވަނީ އަމުރުކޮށްފައެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
