ދިރާގު ދިވެހި ޕްރިމިއާ ލީގު ތާވަލުގެ ފުލުގައި އޮތް ޓީސީ ސްޕޯޓްސް ކްލަބުން 1-1 އިން އެއްވަރުކޮށް، ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނުން ހުރިހާ މެޗަކުން މޮޅުވެ، ދަމަހައްޓަމުން އައި ސައްތަ އިން ސައްތަ ރެކޯޑަށް ނިމުން ގެނެސްފި އެވެ.
މާޒިޔާ އިން ވަނީ މި ފަހަރުގެ ޗެރިޓީ ޝީލްޑް މެޗާ އެކު، ލީގުގައި މި މެޗުގެ ކުރިން ކުޅުނު 10 މެޗުން ވެސް މޮޅުވެފަ އެވެ. އެކަމަކު، ޓީސީ އަތުން މޮޅުނުވެވި، މާޒިޔާ އަށް ލީގުގެ އެއް ވަަނައިގައި ނެގުނީ ހަ ޕޮއިންޓުގެ ލީޑެކެވެ. އެއް ވަނައިގައި އޮތް މާޒިޔާ އަށް 11 މެޗުން 31 ޕޮއިންޓް ލިބިފައިވާއިިރު، ދެ ވަނައިގައި އޮތް އޮޑި ސްޕޯޓްސް ކްލަބަށް ވަނީ 10 މެޗުން 25 ޕޮއިންޓް ލިބިފަ އެވެ. އޮޑިން މާދަމާ ހަވީރު ޔުނައިޓެޑް ވިކްޓަރީ ބަލިކޮށްފިނަމަ، މާޒިޔާގެ ލީޑު ތިން ޕޮއިންޓަށް ކުޑަވާނެ އެވެ.
މިއަދު ހަވީރު ކުޅުނު މި މެޗަށް މާޒިޔާ އިން ޓީމު ލިސްޓު ހުށަހެޅި ފަހުން މެޗު ފެށުމުގެ ކުރިން، ދެ ބަދަލެއް ގެންނަން ޖެހުނެވެ. އެ ގޮތުން، އާއިލީ ޒިންމާގެ ކަމެއްގައި، އަހުމަދު އައިހަމް (ފަތޯ) ގެ ބަދަލުގައި، ހަސަން ޝިފާޒް (ޑުންގާ) ފުރަތަމަ އެގާރަ އަށް ލާން ޖެހުނުއިރު، ސްޕެއިނުގެ ފޯވާޑް، ސާޖިއޯ މެންޑީ އަށް ދިމާވި އަނިޔާއަކާ ހެދި އޭނާގެ ބަދަލުގައި، މުހައްމަދު އިލާން އިމްރާން ވަނީ މެޗު ފަށަން ޖެހިފަ އެވެ.
ވިއްސާރައިގެ ތެރޭގައި ކުޅުނު މި މެޗުގެ ފުރަތަމަ ހާފުގައި މާޒިޔާ އާއި ޓީސީން ވެސް ގޯލާ ސީދާކޮށް ހަމަލާ ފޮނުވާލައިފައިވެ އެވެ. އެ ގޮތުން، ޓީސީގެ ގާނާ ފޯވާޑް، ޕްރިންސް ބޯޑު ފޮނުވާލި ބޯޅަ މާޒިޔާގެ ކީޕަރު ހުސެއިން ޝަރީފް މަތަކުރި އެވެ. އަނެއްކޮޅުން، މާޒިޔާގެ ހަމްޒާ މުހައްމަދު (ހަމްޕު) ދިން ބޯޅައަކަށް ހުސްކޮށް އަރައި، އިލާން ފޮނުވާލި ބޯޅަ ޓީސީގެ ކީޕަރު، ނައިޖީރިއާގެ އެމަނުއަލް ޑެނިއަލް ވަނީ މަތަކޮށްފަ އެވެ.
މެޗުގައި މާޒިޔާ އަށް އުނދަގޫ ހާލަތެއް ދިމާވީ ފުރަތަަމަ ހާފުގެ އިތުރު ވަގުތުގެ ތެރޭގައި، އެ ޓީމުގެ އިބްރާހިމް އައިސަމް އަށް ސީދާ ރަތެއް ދެއްކުމުންނެވެ. އައިސަމް އަށް ރަތެއް ދެއްކީ ޓީސީގެ ހުސެއިން ޝަރީފް (ހުސީ) އަށް ނުރައްކާތެރި ފައުލެއް ކުރުމުންނެވެ.
ކުޅުންތެރިއަކު މަދުކޮށް ކުޅެ ވެސް ދެ ވަަނަ ހާފުގައި މާޒިޔާ އިން އެޓޭކަށް އިސްކަންދިނެވެ. ނަތީޖާ އަކަށްވީ މެޗުގެ 57 ވަނަ މިނިޓްގައި މާޒިޔާ އިން ލަނޑެއް ޖަހައި، ލީޑުނެގުމެވެ. އެ ގޮތުން، ހަމްޕު އޭރިއާތެރެއިން ހުސްކޮށްލާފައި ދިން ބޯޅައަކަށް އަރައި، މާޒިޔާ އަށް މި ލަނޑު ޖަހައިދިނީ، ނާއިޒު ހަސަން (ދާދު) އެވެ.
އޭގެ ފަހުން މާޒިޔާ އިން ދެ ވަަނަ ލަނޑެއް ޖަހަން ކުރި މަސައްކަތުގައި ހަމްޕު އަށް ދެ ފުރުސަތެއް ލިބުނެވެ. އެ ގޮތުން، ހަމްޕު ފޮނުވާލި އެއް ހަމަލާ ޓީސީ ޑިފެންޑަރުން ބްލޮކްކުރިއިރު، އަނެއް ޝޮޓް އަމާޒުވީ ކީޕަރު ޑެނިއަލް އަތަށެވެ.
މާޒިޔާ މޮޅުވާން ދަނިކޮށް ޓީސީން އެއްވަރުކުރީ އިތުރު ވަގުތުގެ ފަސް ވަނަ މިނިޓްގަ އެވެ. އެ ގޮތުން، މާޒިޔާގެ އޭރިއާތެރެއިން ޓީސީގެ ނައިޖީރިއާ ފޯވާޑް، އިބްރާހިމް ޖިމޯ، ފޮނުވާލި ބޯޅަ ކީޕަރު ހުސެއިން އަތުގައި ޖެހިފައި ރީބައުންސަށް ނުކުތް ވަގުތު ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިގެން ޓީސީގެ ލަނޑު ޖެހީ، އަހުމަދު މާއިޝް ރަޝީދު (މާއި) އެވެ.
ޓީސީން މިއަދުގެ މެޗަށް ނުކުތްއިރު އޮތީ 10 ޓީމު ވާދަކުރާ ލީގުގެ ފުލުގަ އެވެ. އެކަމަކު، މި މެޗުން ލިބުނު ޕޮއިންޓާ އެކު، 11 މެޗުން ހަ ޕޮއިންޓް ހޯދައި ޓީސީ ވަނީ ލީގުގެ ނުވަ ވަނަ އަށް ޖެހިލައިފަ އެވެ. މިއީ، ދެ ވަނަ ފަހަރަށް ޓީސީގެ ކޯޗުކަމާ ހަވާލުވި މުހައްމަދު އާތިފް (އާތީ)ގެ ކޯޗުކަމުގައި އެ ޓީމުން ކުޅުނު ތިން މެޗުގެ ތެރެއިން ހޯދި ފުރަތަމަ ޕޮއިންޓެވެ.
