އިއުލާނު ނުކޮށް އަދި ބިޑިން ޕްރޮސެސް ނުހިންގައި އައިލެންޑް އޭވިއޭޝަނުން ވަގަށް މަތިންދާބޯޓެއް ވިއްްކާލި މައްސަލަ ބަލަމުންދާ ކަމަށް އެންޓި ކޮރަޕްޝަން ކޮމިޝަނުން ބަލަން ފަށައިފި އެވެ.
އެ މައްސަލަ ބަލަމުންދާކަން އޭސީސީގެ އޮފިޝަލަކު މި ނޫހަށް ޔަގީންކޮށްދިނެވެ. ނަމަވެސް އެ މައްސަލަ ބަލަން ފެށި ތާރީހެއް އަދި މިހާރު މައްސަލަ ގޮސްފައިވާ ހިސާބެއް އެ އޮފީހަކުން ނުބުނެ އެވެ.
ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަނުން އިއުލާނު ނުކޮށް ވިއްކާލީ DHC-8 MSN 591 ނަންބަރު މަތިންދާބޯޓެވެ. އެ ބޯޓު ވިއްކާލީ 3.7 މިލިއަން ޑޮލަރަށެވެ.
އިއުލާނު ނުކޮށް މަތިންދާބޯޓު ވިއްކާލި ހަބަރު މި ނޫހުގައި ޝާއިއު ކުރުމުން އައިލެންޑް އޭވިއޭޝަނުން ބުނީ އެ ބޯޓު ވިއްކާލީ ސެޕްޓެމްބަރު 22، 2022، ގައި ކޮށްފައިވާ އިއުލާނެއްގެ ދަށުން ކަމަށެވެ. އެ އިއުލާނުގެ ނަންބަރަކީ IAS/MIS/2022-2229 އެވެ. އެ ބޯޓު ވިއްކާލީ އެ އިއުލާނުގެ މުއްދަތުތައް ހަމަވެ ދެ އަހަރެއްހާ ދުވަސް ފާއިތުވި ފަހުން އޯގަސްޓު 29، 2024، ގަ އެވެ.
އެއީ ޑޭޝް މަރުކާގެ އަށް މަތިންދާބޯޓެއް ވިއްކުމަށް ކޮށްފައިވާ އިއުލާނެކެވެ. އެ އިއުލާނުގައި DHC-8 MSN 591 ނަންބަރު ބޯޓުގެ ވާހަކަ ވެސް އެބަ އޮތެވެ. އެ އިއުލާނުގެ ދަށުން ބިޑް ހުށަހަޅަންޖެހެނީ އޮކްޓޯބަރު 30، 2022، ގެ މެންދުރު 2:00 ގެ ކުރިންނެވެ. ބޯޓު ވިއްކުމަށް ނޮވެމްބަރު 20، 2022، ގެ ކުރިން ބޯޑުން ފާސް ކުރަންޖެހެ އެވެ. އަދި ބޯޓު ވިއްކުމުގެ އެގްރިމެންޓުގައި ނޮވެމްބަރު 30، 2022، ގައި ސޮއިކުރަންޖެހެ އެވެ.
އެ މައްސަލައިގައި ކަން ހިނގާފައިވާ ގޮތުގެ ފުރިހަމަ ޖަވާބެއް ދިނުމަށް ޑޮކިއުމެންޓުތައް ބަލަމުންދާ ކަމަށް ވެސް އައިލެންޑް އޭވިއޭޝަނުން ބުންޏެވެ.
މޯލްޑިވިއަން އިން DHC-8 MSN 591 ނަންބަރު ބޯޓު ވިއްކާލީ 3،730،000 ޑޮލަރަށެވެ. ބޯޓު ގަތީ އޮސްޓްރޭލިއާގެ ކުންފުންޏެއް ކަމަށްވާ އެއާފްލައިޓް ޔުނިޓް ޓްރަސްޓް އިންނެވެ. އެ ކުންފުނީގެ ޓްރަސްޓީއެއްގެ ގޮތުގައި ހަރަކާތްތެރިވެ، މަތިންދާބޯޓު ގަތުމުގެ މުއާމަލާތް ހިންގީ އެއާ ފްލައިޓް ޕީޓީވައި އެލްޓީޑީ އެވެ.
ބޯޓު ވިއްކާލީ 3.7 މިލިއަން ޑޮލަރަށް ނަމަވެސް އައިލެންޑް އޭވިއޭޝަނަށް އޮކްޓޯބަރު، 2024، ގައި ޖަމާވީ 3.05 މިލިއަން ޑޮލަރެވެ. އެއީ އައިލެންޑް އޭވިއަޝަންގެ ނަމުން ބޯޓު ވަކި ކުރެވެންދެން ހިފެހެއްޓި 500،000 ޑޮލަރާއި އެސްކްރޯ އެޖެންޓުގެ ފީ ނެގުމަށްފަހު ޖަމާ ކުރި އަދަދެވެ.
މި ނޫހަށް ލިބުނު ލިޔެކިޔުންތަކުގައި އޭޖެންޓަށް ދެއްކި ފީގެ ސީދާ އަދަދު އެނގެން ނެތް ނަމަވެސް އައިލެންޑް އޭވިއޭޝަނަށް ޖަމާވި ފައިސާ އާއި އެ ކުންފުނީގެ ނަމުން ބޯޓު ވަކި ކުރެވެންދެން ހިފެހެއްޓި 500،000 ޑޮލަރު ކެނޑުމުން އަންނަ އަދަދަކީ 177،585 ޑޮލަރެވެ.
މަތިންދާބޯޓު ވިއްކަން ހެދި އެގްރިމެންޓުގެ ދަށުން އެސްކްރޯ ފީ ދައްކަންޖެހެނީ ބޯޓު ގަންނަ ކުންފުންޏާއި ބޯޓު ވިއްކާ ކުންފުނިން ހަމަހަމައަށް ބަހާލައިގެންނެވެ. މޯލްޑިވިއަން އިން އެޖެންޓު ފީގެ ގޮތުގައި ދެއްކި ކަމަށް ބެލެވޭ 177،585 ގެ ދެ ގުނައަކީ 355،170 ޑޮލަރެވެ.
އައިލެންޑް އޭވިއޭޝަނުން އިއުލާނު ނުކޮށް މަތިންދާބޯޓެއް ވިއްކާލި މައްސަލަ މަރުކަޒީ ބޭންކުގެ ފައިނޭންޝަލް އިންޓެލިޖެންސް ޔުނިޓުން ވަނީ ތަހުގީގުކޮށްފަ އެވެ. އެ ތަހުގީގުގެ ލިޔެކިޔުން ވެސް އަދަދު އަށް ވަނީ ލިބިފަ އެވެ. އެ ޔުނިޓުން ސުވާލު ކުރުމުން އައިލެންޑް އޭވިއޭޝަނުން ބުނީ އިއުލާނު ނުކޮށް ބޯޓު ވިއްކާލީ، ވިއްކަން އިއުލާނު ކުރި ބޯޓު، ވިއްކާލެވޭނެ ހާލަތަކަށް ގެންދިޔުމަށް ކުރަންޖެހޭ ހަރަދުތައް ބޮޑުވާތީ ކަމަށެވެ.
އެކަމަކު، އެ ބުނާ ބާ ބޯޓު ވިއްކަން ޖުލައި، 2025، ގައި ވެސް އައިލެންޑް އޭވިއޭޝަނުން ވަނީ އިއުލާނެއްކޮށްފަ އެވެ. އެ ބޯޓު ވިއްކަން ޖެނުއަރީ، 2025، އިން ފެށިގެން ޖުމުލަ ހަ އިއުލާނެއް ކޮށްފައިވާ ކަން ގެޒެޓުގައި ހުރި މައުލޫމާތުތަކުން އެނގެ އެވެ.
