ރޭ ހުޅުމާލޭގައި ފުލުހުންނަށް އަތުނުވާން ނުރައްކާތެރިކޮށް ކާރު ދުއްވި މައްސަލައިގައި ހައްޔަރުކުރީ ހ. ފިލިމާގެ، އައިކް ހައިޝަމް ހަސަން، 18 ކަމަށް ފުލުހުން ބުނެފި އެވެ.
ފުލުހުން ބުނީ ބާރު ސްޕީޑުގައި ދުއްވި އެ ކާރު މާޑުކުރަން އެންގުމުން މަޑުނުކޮށް ހުޅުމާލޭ ފޭސް 1 އަދި 2 ގެ އެކި މަގުތަކުގައި ދުއްވި ކަމަށާއި، އެ ކާރުން ފުލުހުންގެ ސައިކަލެއްގައި ޖައްސައި ވައްޓައިލި ކަމަށެވެ.
އެ ހާދިސާގައި ފުލުހުންގެ ސައިކަލުގައި ތިބި ފުލުހުންނަށް ލިބުނު އަނިޔާތަކަށް ހުޅުމާލެ ހޮސްޕިޓަލުގައި ފަރުވާ ދިނުމަށްފަހު ދޫކޮށްލާފައިވާ ކަމަށެވެ.
މި މައްސަލައިގައި އައިކްއާ އެކު ކާރުގައި އިން އަންހެނަކު ވެސް ހައްޔަރުކުރި އެވެ. އެކަމަކު ފުލުހުން ވަނީ އެ އަންހެން ކުއްޖާ ފަހުން ދޫކޮށްލާފަ އެވެ.
ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި ފުލުހުންނަށް އަތުނުވާން ބާރު ސްޕީޑުގައި ނުރައްކާތެރިކޮށް އައިކް ކާރު ވަނީ ދުއްވާފަ އެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި މި އަހަރުގެ 1700 އަށް ވުރެ ގިނަ މަގުމަތީގެ އެކްސިޑެންޓުތައް ހިނގާފައިވެ އެވެ.
