ނިޝާން އިއްޒުއްދީންގެ އިއްޒަތުގެ ވެރިކަން އިއްޔެ އެރުވި، ދިވެހި ދައުލަތަށް ގިނަ އަހަރުތަކެއް ވަންދެން ހިދުމަތް ކުރެއްވި ހަސަން ސާބިރު ރަސްމީ އިއްޒަތުގައި ފަސްދާނުލައިފި އެވެ.
ސާބިރުގެ މޫނުދެއްކުން އޮތީ އިސްލާމީ މަރުކަޒުގަ އެވެ. އޭނާގެ މައްޗަށް ކަށު ނަމާދު ކުރުން އޮތީ އަސުރު ނަމާދަށްފަހު އިސްލާމީ މަރުކަޒުގަ އެވެ. އަދި ފަސްދާނުލީ ގަލޮޅު ސަހަރާގަ އެވެ.
ސާބިރު، 73، އަވަހާރަވީ ޓްރީ ޓޮޕް ހޮސްޕިޓަލުގައި މިއަދު ހެނދުނުގެ ވަގުތެއްގަ އެވެ. އެނގިފައިވާ ގޮތުގައި ސާބިރު ގެންދެވީ ކެންސަރުގެ އާލާސްކަންފުޅަށް ފަރުވާ ހޯއްދަވަމުންނެވެ. އަވަހާރަވީއިރު، ދުނިޔޭގައި ސާބިރުގެ ދެ ބޭފުޅުން އެބަ ތިއްބެވި އެވެ. އެއީ އަންހެން ބޭފުޅަކާއި ފިރިހެން ބޭފުޅެކެވެ.
ސާބިރު އަވަހާރަވުމުގެ ހިތާމައިގައި ދިވެހި ގައުމީ ދިދަ ތިން ދުވަސްވަންދެން ބައިދަނޑިއަށް ތިރިކުރަން ރައީސުލްޖުމްހޫރިއްޔާ މުހައްމަދު މުއިއްޒު ވަނީ ނިންމަވައިފަ އެވެ.
އެމަނިކުފާނު ސަރުކާރުގެ ވަޒީފާއަކަށް އެންމެ ފުރަތަމަ ވެންނެވީ ފެބްރުއަރީ 7، 1973، ގަ އެވެ. އޭގެ ފަހުން، ފަތުރުވެރިކަމުގެ ދާއިރާ އާއި ފިޝަރީޒް އަދި ދަނޑުވެރިކަމުގެ ދާއިރާއިން ސާބިރު ވަނީ ގައުމަށް ހިދުމަތްތަކެއް ކޮށްދެއްވައިފަ އެވެ.
ކުރީގެ ރައީސް މައުމޫން އަބްދުލްގައްޔޫމްގެ ކެބިނެޓުގައި 1993 ވަނަ އަހަރު ފިޝަރީޒް މިނިސްޓަރުގެ ގޮތުގައި އަދި 1998 ވަނަ އަހަރު ޓުއަރިޒަމް މިނިސްޓަރުގެ ގޮތުގައި ހިމެނުއްވި އެވެ. އޭގެ ފަހުން 2003 ވަނަ އަހަރު އިއުލާނު ކުރެއްވި ކެބިނެޓުގައި ވެސް ޓުއަރިޒަމް މިނިސްޓަރަކަށް ހަމަޖެއްސެވީ ސާބިރެވެ.
ރާއްޖެއަށް އަންނަ ފަތުރުވެރިން ގިނަ ކުރަން އެކި ގޮތްގޮތުން ސާބިރު މަސައްކަތްކޮށްދެއްވި އެވެ. އެގޮތުން، "ސަނީ ސައިޑް އޮފް ލައިފް" މޮޓޯ މުޅި ދުނިޔެއަށް އިސްތިހާރު ކުރުމުގައި އެމަނިކުފާނުގެ ރޯލު ބޮޑެވެ. އަދި ޗައިނާގެ ފަތުރުވެރިން ރާއްޖެ އަންނަ މިންވަރު ގިނަ ކުރެއްވުމަށް ވެސް ވަރަށް ބުރަކޮށް މަސައްކަތް ކުރެއްވި އެވެ.
ސާބިރު ވަނީ 2000 ވަނަ އަހަރުން ފެށިގެން 2005 ވަނަ އަހަރާ ހަމައަށް ރައްޔިތުންގެ މަޖިލީހުގެ އއ. އަތޮޅުގެ މެންބަރުކަން ކުރައްވައިފަ އެވެ. ގާނޫނުއަސާސީ އިސްލާހު ކުރުމުގެ މަސައްކަތުގައި ވެސް ސާބިރު ބައިވެރިވެވަޑައިގަތެވެ.
ސާބިރު ވަނީ ހާރިޖީ ދާއިރާގައި ވެސް މަސައްކަތް ކުރައްވައިފަ އެވެ. އެގޮތުން، އިނގިރޭސިވިލާތަށް ދިވެހިރާއްޖެއިން ކަނޑައަޅާ ސަފީރުގެކަމުގެ މަގާމާއި ސިންގަޕޫރު ސަފީރުކަމުގެ މަގާމާއި ޔޫރަޕިއަން ޔޫނިއަނަށް ކަނޑައަޅާ ސަފީރު ކަމުގެ މަގާމާއި ޖަޕާނު ސަފީރުކަމުގެ މަގާމުގައި އަދާ ކުރެއްވި އެވެ.
ދިވެހިރާއްޖެއަށް 2004 ވަނަ އަހަރު ސުނާމީއެއް އެރުމުން، ރާއްޖެއަށް ކޮންމެހެން ބޭނުންވި ބޭރުގެ އެހީ ހޯއްދެވުމަށް ސާބިރު އިސް ދައުރެއް އަދާ ކުރެއްވި އެވެ. އަދި ސިންގަޕޫރުގައި 2008 ވަނަ އަހަރު އަވަހާރަވި ކުރީގެ ރައީސް އިބްރާހިމް ނާސިރުގެ ހަށިކޮޅު މާލެ ގެނައުމުގައި ވެސް ސާބިރު އެހީތެރިވެދެއްވި އެވެ.
