މާލޭގައި ހިންގި ހާއްސަ އޮޕަރޭޝަނެއްގެ ތެރެއިން ގަލޮޅު ގެއެއް ބަލައި ފާސްކޮށް ހަތަރު ކިލޯއަށްވުރެ ގިނަ މަސްތުވާތަކެއްޗާއެކު މީހަކު ހައްޔަރުކޮށްފި އެވެ.
ފުލުހުން ބުނީ އެ މައްސަލައިގައި ހައްޔަރު ކޮށްފައި ވަނީ މުއާވިޔަތު އަހުމަދު، 30، ގއ. ނިލަންދޫ، މާޑު ކަމަށެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 15 ދުވަހު ބަންދުގައި ބަހައްޓަން އަމުރު ކޮށްފައިވާ ކަމަށް ފުލުހުން ބުންޏެވެ.
ފުލުހުންގެ ކައުންޓާ ނާކޮޓިކްސް އިންޓެލިޖެންސް އާއި ޑްރަގް އެންފޯސްމެންޓު ޑިޕާޓުމެންޓް ގުޅިގެން ކުރިއަށް އިއްޔެ ކުރިއަށް ގެންދިޔަ އެ އޮޕަރޭޝަނުގައި ގަލޮޅުގައި ހުރި ދެ ގެއެއް ބަލައި ފާސްކުރި ކަމަށް ފުލުހުން ބުންޏެވެ. މަސްތުވާތަކެތި ފެނުނީ އޭގެތެރެއިން އެއް ގެއިންނެވެ.
ނަމަވެސް އެ ގެއިން ފެނުނީ މަސްތުވާތަކެތީގެ ކޮން ބާވަތެއް ކަމެއް ފުލުހުން ހާމައެއް ނުކުރެ އެވެ. އަދި ލަފާކުރެވޭ ސީދާ ބަރުދަނެއް ވެސް ފުލުހުން ހާމައެއް ނުކުރެ އެވެ.
އެ މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
