އއ. މާޅޮހުގައި އަނިޔާވެރި ގޮތަކަށް މަރައިލި އަބްދުއްރަހްމާން އާދަމް، 65، ގެ ހަށިގަނޑު އޮޓޮޕްސީ ހެދުމަށް އިންޑިއާއަށް މިއަދު ފޮނުވައިފި އެވެ.
ފުލުހުންގެ މީޑިއާ ގްރޫޕަށް ފޮނުވި މެސެޖެއްގައި ބުނީ އަބްދުއްރަހްމާންގެ އޮޓޮޕްސީ ހަދަން އޭނާގެ ހަށިގަނޑު ފޮނުވީ އިންޑިއާގެ ޓްރިވެންޑްރަމަށް ކަމަށެވެ.
އަބްދުއްރަހްމާން މަރުވީ ޖުލައި 11، ވަނަ ދުވަހުގެ ރޭ އޭނާ ނިދާފައި އޮއްވައި، ގޮތް ނޭނގޭ މީހަކު އޭނާގެ ބޮލަށް ދިން އަނިޔާވެރި ހަމަލާގެ ސަބަބުންނެވެ. އަބްދުއްރަހްމާން މަރުވީ އެ ރަށު ސިއްހީ މަރުކަޒުގައި ފަރުވާދެނިކޮށް ޖުލައި 12، ވަނަ ދުވަހު އެވެ.
އެ މައްސަލައިގެ ތަހުގީގަށް ފުލުހުންގެ ޓީމެއް މާޅޮހަށް ގޮސް އަންނަނީ ހަރަކާތްތެރިވަމުންނެވެ. މިގޮތުން ފުލުހުން ވަނީ އެ ރަށަށް އަރައި ފައިބާ މީހުން މޮނިޓާކޮށް، ރަށުގެ ރައްޔިތުންނާ ސުވާލު ކުރުމުގެ އިތުރުން ބައެއް ތަންތަން ބަލައި ފާސްކޮށްފަ އެވެ.
އަބްދުއްރަހްމާންގެ މަރުގެ މައްސަލައިގައި މިހާތަނަށް ފުލުހުން ހާމަކުރީ އޭނާގެ އަންހެނުންގެ ފޯނު ހިފެހެއްޓުމަށްފަހު ދޫކޮށްލި ވާހަކަ އެކަންޏެވެ. ތަހުގީގާ ގުޅިގެން މިހާތަނަށް އެއްވެސް އެއްޗެއް ހާމަކޮށްފައެއް ނުވެ އެވެ.
މީގެއިތުރުން ތަހުގީގާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ. އެކަމަކު ފުލުހުން ބުނީ އެ މައްސަލައިގައި އެކި އޭންގަލްތަކަށް ފޯކަސް ކޮށްގެން ތަހުގީގު ހިންގަމުންދާ ކަމަށެވެ.
