ދިވެހިންގެ ތެރޭގައި ވިޔަފާރިކުރަން މަގުބޫލު ބައެއް ސައިޓުތަކަށް ފައިސާ ދައްކާ ކޮންމެ ފަހަރަކު 30 ޕަސެންޓުގެ ފީއެއް ނަގަން ބޭންކް އޮފް މޯލްޑިވްސް (ބީއެމްއެލް) އިން ނިންމުމަކީ ސަރުކާރުން ޑޮލަރުގެ މައްސަލަ ހައްލުނުކުރެވުމުގެ ބުރަ ރައްޔިތުން އުފުލަން ޖެއްސުން ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.
ފައްޔާޒް އެކްސް ގައި ކުރެއްވި ޕޯސްޓެއްގައި ވިދާޅުވީ ބީއެމްއެލް އިން ނަގަން ނިންމި ފީ އާއެކު ދޭހަވަނީ ޕީއެންސީގެ ސަރުކާރުގެ އިގްތިސާދީ އަދި ފޮރިން އެކްސްޗޭންޖްގެ ސިޔާސަތުތައް ފެއިލްވެ، އެ ބުރަ ރައްޔިތުން އުފުލަން ޖެހޭ މަންޒަރު ކަމަށެވެ.
"ރަސްމީ މަލްޓިޕަލް އެކްސްޗޭންޖް ރޭޓް ސިސްޓަމެއް ތަންފީޒު ކުރުމުގެ މަރުހަލާއަށް އަޅުގަނޑުމެން ދިޔުމަކީ މިހާރު އޮތް ޕީއެންސީ ސަރުކާރު ފެއިލްވެފައިވާކަން ދޭހަކޮށްދޭ ކަމެއް،" އޭނާ ވިދާޅުވި އެވެ.
މިދިޔަ އެމްޑީޕީ ސަރުކާރުގެ އިކޮނޮމިކް މިނިސްޓަރުކަން ފުރުއްވި ފައްޔާޒް ވިދާޅުވީ ބީއެމްއެލް އިން ނަގާ 30 ޕަސަންޓުގެ ފީގެ ސަބަބުން އެކްސްޗޭންޖް ރޭޓު މަތިވެ، ރުފިޔާއަށް ޑޮލަރު ބަދަލު ކުރުމުގެ ޕެރެލަލް މާކެޓު ރަސްމީ ވެގެންދާނެ ކަމަށް ބެލެވޭ ކަމަށެވެ.
އިއާދަނުކުރެވޭވަރުގެ ގެއްލުމެއް ނުލިބެނީސް ވިޔަފާރީގެ ދާއިރާގައި ހަރަކާތްތެރިވާ ގާބިލު އަދި ފަންނީ ބޭފުޅުންނާއި މަޝްވަރާކޮށް އެ ބޭފުޅުންގެ ލަފާ ހޯއްދަވައިގެން އަވަސް ފިޔަވަޅުތަކެއް ސަރުކާރުން އަޅަން ވެސް ފައްޔާޒް ވަނީ ގޮވައިލައްވާފަ އެވެ.
ސަރުކާރުން 30 ޕަސަންޓުގެ ފީއެއް ނަގަން ނިންމި ސައިޓުތަކުގެ ލިސްޓުގައި މި ވަގުތަށް ހިމެނެނީ ޓީމޫ، ޝީއިން، އަލިބާބާ، އަލީ އެކްސްޕްރެސް، ލަޒާޑާ އަދި އީބޭ އެވެ. މި ހުރިހާ ސައިޓުތަކަކީ، ވަކިން ހާއްސަކޮށް ޝީއިން އާއި ޓީމޫއަކީ، ގިނަ ދިވެހިން މިހާރު ވިޔަފާރިކުރާ ސައިޓުތަކެކެވެ.
ބީއެމްއެލްއިން މި ބަދަލުތައް ގެނައިއިރު، ބޭންކަށް ލިބޭ ގިނަ އަދަދެއްގެ ޑޮލަރުތަކެއް މިހެން ހުންނަ ބޭރުގެ މަދު ސައިޓުތަކަކަށް ދައްކަން ޖެހުމަކީ ޑޮލަރު ތާށިކަމަށް ބާރުދޭ ކަމެއްގެ ގޮތުގައި އެ ބޭންކުން ވަނީ ފާހަގަކޮށްފަ އެވެ.
