ފަނޑިޔާރުކަން ފިޔަވައި، ފަނޑިޔާރުންނަށް ކުރެވިދާނެ އެހެނިހެން މަސައްކަތްތައް ކަނޑައެޅުމުގެ ބާރު ޖުޑީޝަލް ސާވިސް ކޮމިޝަނަށް ލިބޭ ގޮތަށް ގާނޫނު އިސްލާހު ކުރަން ހުށަހަޅައިފި އެވެ.
ފަނޑިޔާރުންނަށް ކުރެވޭނެ ކަންކަމާއި ނުކުރެވޭނެ ކަންކަން ބަޔާންކޮށްފައި އޮންނަނީ ފަނޑިޔާރުންގެ ގާނޫނުގެ 44 ވަނަ މާއްދާގަ އެވެ. ފަނޑިޔާރުންނަށް ކުރެވޭނެ ކަންކަން ކަނޑައެޅުމުގެ ބާރު އެ މާއްދާއިން ޖޭއެސްސީއަކަށް ނުލިބެ އެވެ.
ނަަމަވެސް ސަރުކާރުން ގެންނަން ބޭނުންވާ އިސްލާހުގައި ބުނެފައި ވަނީ ފަނޑިޔާރުންގެ މިނިވަންކަމާއި މުސްތަގިއްލު ކަމަށް އަދި މަސައްކަތްތަކަށް ބުރޫނާރާނެ ކަމަށް "ޖުޑީޝަލް ސާވިސް ކޮމިޝަނުން ކަނޑައަޅާ" މަސައްކަތްތައް ކުރުން ހުއްދަވާނެ ކަމަށެވެ.
ފަނޑިޔާރުންގެ ގާނޫނަށް ގެންނަ އިސްލާހުތައް ހުށަހެޅީ ސަރުކާރުގެ ފަރާތުން ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ. ފަނޑިޔާރުންނަށް ކުރެވޭނެ މަސައްކަތްތައް ކަނޑައެޅުމުގެ އިތުރުން ބައެއް އެހެން ބޮޑެތި ބަދަލުތައް ވެސް އެ ގާނޫނަށް ގެންނަން ވަނީ ހުށަހަޅައިފަ އެވެ.
އޭގެ އިތުރުން، ފަނޑިޔާރުންނަށް ލިބިދޭ ބައެއް ބާރުތައް އުނި ކުރަން ވެސް ސަރުކާރުން ބޭނުންވެ އެވެ. އޭގެ ތެރޭގައި ކޯޓުތައް ހިންގުމަށް ބޭނުންވާ ގަވާއިދު ހެދުމުގައި އިސްކޮށް ހަރަކާތްތެރިވުމަކީ ފަނޑިޔާރުންގެ މަސްއޫލިއްޔަތެއް ކަމަށް ގާނޫނުގައި ބުނާ ބައި އުނި ކުރުން ހިމެނެ އެވެ.
ޖުޑީޝަލް ސާވިސް ކޮމިޝަނަށް ބޮޑު ބާރެއް ދިނުމަށް މަސައްކަތް ކުރާއިރު، އެ ކޮމިޝަނުން ދާދި ފަހުން ވަނީ ގާނޫނާ ހިލާފަށް ސުޕްރީމް ކޯޓުގެ ދެ ފަނޑިޔާރަކު ވަކި ކުރަން މަޖިލީހަށް ފޮނުވައިފަ އެވެ.
ޖުޑީޝަލް ސާވިސް ކޮމިޝަން އެކުލެވިގެންވާ ގޮތުން އެ ކޮމިޝަނުގެ ބާރު މިހާރު އޮންނަނީ ސަރުކާރުގެ އަތްމަތީގަ އެވެ. ކޮމިޝަނުގައި ހިމެނެނީ، ރައްޔިތުންގެ މަޖިލީހުގެ ރައީސް އާއި އެ ކޮމިޝަނުން އައްޔަން ކުރާ މެންބަރަކާއި ބަންޑާރަނައިބާއި ރައީސުލްޖުމްހޫރިއްޔާ އައްޔަން ކުރާ މެންބަރަކާއި އާންމުންގެ ތެރެއިން މަޖިލީހުން ކަނޑައަޅާ މެންބަރަކާއި ވަކީލުން އިންތިހާބު ކުރާ މެންބަރަކާއި ސުޕްރީމް ކޯޓާއި ހައި ކޯޓާއި ދަށު ކޯޓުން އިންތިހާބު ކުރާ ތިން މެންބަރުންނެވެ.
ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރާއި އަޒްމިރާލްދާގެ މައްޗަށް ތުހުމަތުތަކެއް އުފަންކޮށް މައްސަލަ ބެލީ ކޮމިޝަނުގެ އިޖުރާއަތުތަކާ ހިލާފަށެވެ. ޖޭއެސްސީ އިން ކުރިއަށް ގެންދިޔަ ތަހުގީގު ގާނޫނާ ހިލާފު ކަމަށް މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ވެސް ވިދާޅުވި އެވެ. މަޖިލީހުން ނިންމީ އެ ދެ ފަނޑިޔާރުން ވަކި ކުރުމަށެވެ.
ސުޕްރީމް ކޯޓުގެ ފަނޑިޔާރުންތަކެއްގެ މައްސަލަ ބަލަން ފެށީ، ސިޔާސީ ޕާޓީތަކުން ބޭނުންވެއްޖެ ހާލަތެއްގައި ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭނެ ގޮތަށް ގާނޫނުއަސާސީ ބަދަލު ކުރި މައްސަލަ ބަލަން ފެށުމުންނެވެ.
ތުހުމަތުތަކެއް އުފަން ކުރުމަށްފަހު ފަނޑިޔާރުން ސަސްޕެންޑު ކުރީ އެ މައްސަލަ އަޑުއެހުމެއް ތާވަލުކޮށް މައްސަލަ ބަލަން ފަށަން ކުޑަތަންވެފައި އޮއްވަ އެވެ. އޭގެ ކުރިން، ސުޕްރީމް ކޯޓުން ދެ ފަނޑިޔާރަކު ގާނޫނާ ހިލާފަށް ވަކި ކުރަން މަޖުބޫރުވާނޭ ބިލެއް ވެސް މަޖިލީހުން ފާސް ކުރި އެވެ. އެކަމަކު އެ ބިލު ތަސްދީގުނުކޮށް ވަނީ އަނބުރާ ފޮނުވާލައިފަ އެވެ.
