މުދަލާއި ހިދުމަތުން ޓެކްސް ނެގުމުގެ ގާނޫނަށް (ޖީއެސްޓީ ގާނޫނަށް) މިދިޔަ އަހަރު ގެނައި ބަދަލުގެ ދަށުން، ޓޫރިޒަމް ވިޔަފާރިތަކުން ނަގާ ޓީޖީއެސްޓީ 17 ޕަސެންޓަށް ބޮޑު ވާނެ އެވެ.
ރައްޔިތުންގެ މަޖިލީހުން ޓީޖީއެސްޓީ ގޮތުގައި ނަގާ އަދަދު ބޮޑުކުރީ، ސަރުކާރަށް އާމްދަނީ އިތުރުކުރަން ޓޫރިޒަމް ސިނާއަތާ ގުޅުން ހުރި ބައެއް ގާނޫނުތަކަށް ބަދަލުގެނައި ދުވަސްވަރު ގެނައި ބަދަލެއްގެ ދަށުންނެވެ. ޓީޖީއެސްޓީގެ އިތުރުން އެއާޕޯޓު ޑިޕާޗާ ޓެކްސް އާއި އެއާޕޯޓު ޑިވެލޮޕްމަންޓް ފީ އާއި ގްރީން ޓެކްސް ވެސް އެއިރު ބޮޑު ކުރި އެވެ.
ޓީޖީއެސްޓީ ބޮޑުކުރުމުން މި އަހަރު 219 މިލިއަން ރުފިޔާ އިތުރަށް އާމްދަނީގެ ގޮތުގައި ލިބޭނެ ކަމަށް ސަރުކާރުން ލަފާކުރެ އެވެ. އަދި އަންނަ އަހަރު 330 މިލިއަން ރުފިޔާ އާއި 538 މިލިއަން ރުފިޔާ އިތުރަށް ލިބޭނެ ކަމަށް ވެސް ސަރުކާރުން ލަފާކުރެ އެވެ.
ޓެކްސް ބޮޑުކުރުމުގެ ބިލު މަޖިލީހަށް ބަލައިގަތް އިރު، ސަރުކާރާއި މަޖިލިސް ކޮންޓްރޯލް ކުރާ ޕީއެންސީގެ މެންބަރުން ވަނީ މި ބަދަލު ގެންނަން ޖެހޭ ކަމަށް ބުނެފަ އެވެ. އަދި މިއީ ޓޫރިޒަމް ވިޔަފާރިވެރިން ނުރުހުނަސް ގެންނަން ޖެހޭ ބަދަލެއް ކަމަށް، މަޖިލީހުގެ މެޖޯރިޓީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެފައި ވެ އެވެ.
ޓީޖީއެސްޓީ އާއި ޓޫރިސްޓުންނާ ގުޅުން ހުރި އެހެނިހެން ޓެކްސްތައް ބޮޑުކުރުމާ ދެކޮޅު ހެދީ އިދިކޮޅު އެމްޑީޕީންނެވެ. އެ ބިލަށް މަޖިލީހުގައި ބަހުސްކުރި އިރު އެ ޕާޓީ ތަމްސީލުކުރާ މެންބަރުން ވަނީ ސަރުކާރުން މި ބަދަލުތައް ގެންނަނީ ހަރަދުތައް ކުޑަކުރަން ނުކުޅެދި، މާލީ ސިޔާސަތުތައް ފެއިލްވުމުން ކަމަށް ބުނެ ޓެކްސްތައް ބޮޑުކުރުމާ ދެކޮޅު ހަދައިފަ އެވެ.
"އަޅުގަނޑަށް ހަމަ ޔަގީން ކަށަވަރު ޓެކްސް ބޮޑު ކުރުމާ ގުޅިގެން މި ރާއްޖެއަށް އަންނަ ޓުއަރިސްޓުންގެ އަދަދު، އެރައިވަލްސްތައް ބޮޑުތަނުން މަދުވެގެންދާނެ. މީގެ ފައިދާ ކުރާނީ ކައިރި ހުރި އަވައްޓެރި ގައުމުތަކަށް އިއްޒަތްތެރި ރައީސް. އެބޭފުޅުން އެ އަތް ޖަހަނީ މިހާރު،" މަޖިލީހުގެ މައިނޯރިޓީ ލީޑަރު އިބްރާހިމް ނާޒިލް ވިދާޅުވި އެވެ.
އެމްޑީޕީގެ އިތުރުން ޓޫރިޒަމް ވިޔަފާރިތަކުން ވެސް ވަނީ މި ބަދަލުގެ ސަބަބުން މިހާރު ވެސް އަގު ބޮޑު މަންޒިލެއްގެ ގޮތުގައި މަޝްހޫރު ވެފައި އޮތް ރާއްޖެ އަންނަން ޓޫރިސްޓުން ފަސް ޖެހިދާނެ ކަމަށް ބުނެފައިވެ އެވެ. ޓޫރިޒަމް ވިޔަފާރިތައް ތަމްސީލުކުރާ ޖަމިއްޔާ، މޯލްޑިވްސް ޓޫރިޒަމް އިންޑަސްޓްރީސް (މަޓީ) އިން ވަނީ އެ ސިނާއަތުގެ ހުރި ކަންބޮޑުވުންތައް ހިއްސާކޮށް މަޖިލީހަށް ސިޓީއެއް ވެސް ފޮނުވާފަ އެވެ.
"ހުށަހެޅިފައިވާ ޓެކްސްތަކުގެ އިތުރުކުރުމުގެ މިންވަރާއި މި އިސްލާހުތައް ތަންފީޒުކުރަން ހުށަހަޅާފައިވާ ކުރު މުއްދަތުގެ ތާވަލުތަކާ ގުޅިގެން އަޅުގަނޑުމެންގެ މެންބަރުންނާއި ފަތުރުވެރިކަމުގެ ދާއިރާގެ އެތައް ބައިވަރު ސްޓޭކްހޯލްޑަރުންގެ ބޮޑެތި ކަންބޮޑުވުންތައް އަޅުގަނޑުމެންނާ ދަނީ ހިއްސާކުރަމުން،" މަޓީގެ ސިޓީގައި ބުންޏެވެ.
ސަރުކާރުން ޓޫރިޒަމް ދާއިރާގެ ޓެކްސްތައް ބޮޑުކުރީ، އެއްވެސް ޓެކުހެއް ބޮޑު ނުކުރާނެ ކަމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދާ ހިލާފަށެވެ. މިކަމަށް ފާޑުކިޔުން އަމާޒު ވާން ފެށުމުން ސަރުކާރުން ވަނީ އޭރު ވީ ވައުދުގެ މާނަ ބަދަލުކޮށް، ވައުދުވީ އާންމު ރައްޔިތުންގެ އަތުން ނަގާ އެއްވެސް ޓެކުހެއް ބޮޑު ނުކުރަން ކަމަށް ބުނަން ފަށައިފަ އެވެ.
ޓޫރިޒަމް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މި އަހަރު ރާއްޖެއަށް އެއް މިލިއަނަށް ވުރެ ގިނަ ޓޫރިސްޓުން ޒިޔާރަތްކޮށްފި އެވެ. މިއީ މިދިޔަ އަހަރުގެ އެ މުއްދަތަށް ވުރެ ގާތްގަނޑަކަށް ނުވަ ޕަސެންޓު އިތުރު އަދަދެކެވެ.
ސަރުކާރުން އަމާޒު ހިފާފައި ވަނީ މި އަހަރު ރާއްޖެއަށް 2.3 މިލިއަން ޓޫރިސްޓުން ގެނައުމަށެވެ. މިއީ މިދިޔަ އަހަރަށް ވުރެ ތިން ލައްކަ ޓޫރިސްޓުން އިތުރު އަދަދެކެވެ. މިދިޔަ އަހަރަކީ ތާރީހުގައި ފުރަތަމަ ފަހަރަށް ދެ މިލިއަން ޓޫރިސްޓުން ޒިޔާރަތްކުރި އަހަރެވެ.
