އިގުތިސޯދީ ހާލަތު މެނާޖުކުރާނެ ގޮތުގެ ޕްލޭނެއް އޮތް ކަމަށް މި ސަރުކާރުން ބުނުމަށް ފަހު، ކުއްލިއަކަށް ޓެކްސްތައް ބޮޑުކުރަން ޖެހުނީ ސަރުކާރުގެ ފައިނޭންސިން ސްޓްރެޓަޖީ ފެއިލް ވުމުން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
ދައުލަތުގެ މާލީ ހާލަތު ގޯސްވަމުންދާ މައްސަލައިގައި އެމްޑީޕީގެ އިކޮނޮމިކް ކޮމިޓީން ބޭއްވި ނޫސްވެރިންގެ ބައްދަލުވުމެއްގައި އަމީރު ވިދާޅުވީ، ސަރުކާރާ ހަވާލުވުމުގެ ކުރިން ޓްރާންސިޝަން މަރުހަލާގެ ތެރޭގައި ކުރެވުނު މަޝްވަރާތަކުގައި، މިދިޔަ އަހަރުގެ ސަޕްލިމެންޓަރީ ބަޖެޓަށާއި މި އަހަރުގެ ބަޖެޓަށް 600 މިލިއަން ޑޮލަރު ފައިނޭންސިން ހަމަޖެހިފައިވާ ކަމުގެ ޔަގީންކަން ދިން ކަމަށެވެ.
"އޭރު ސަރުކާރުގެ ޓްރާންސިޝަން ކޮމިޓީގެ ބޭފުޅުން، މިހާރުގެ ފިނޭންސް މިނިސްޓަރު އިސްވެ ހުންނަވައިގެން ޓްރާންސިޝަން ކޮމިޓީގައި ވެސް އަޅުގަނޑުމެން ވާހަކަ ދައްކާފައި، 200 މިލިއަން ޑޮލަރު 2023 ވަނަ އަހަރު އަޅުގަނޑުމެން ހުށަހެޅި ސަޕްލިމެންޓަރީ ބަޖެޓަށް ފައިސާ ހޯދާނެ ކަމަށް ވިދާޅުވި. 2024 ވަނަ އަހަރުގެ ބަޖެޓަށް 400 މިލިއަން ޑޮލަރު ހޯދާނެ ކަމަށް އެ ބޭފުޅުން ފާހަގަކުރި،" އޭނާ ވިދާޅުވި އެވެ.
ސަރުކާރުން މިހެން ބުންޏަސް އެ މަގުން އެއްވެސް ކަމެއް ނުހިނގާ ކަމަށް އިޝާރާތްކުރައްވަމުން އަމީރު ވިދާޅުވީ އޭރު ފެހި ސިގްނަލްތަކާއި އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ އެހީ ހޯދަން ނުޖެހޭނެ ކަމަށް ބުނި ކަމަށެވެ. ނަމަވެސް މިއަދު މި ފެންނަނީ މުޅި ދުނިޔޭގައި ސިޓީ ހިފައިގެން ހިނގައިގެން އެއްވެސް ގައުމަކުން ފައިނޭންސިން ނުހޯދުނު މަންޒަރު ކަމަށް އޭނާ ވިދާޅުވި އެވެ.
ހަމަ އެހެންމެ، އިއުލާން ކޮށްގެން އަމިއްލަ ފަރާތަކުން ވެސް އެއްވެސް ފައިސާއެއް ނުލިބޭ ކަމަށް އަމީރު ވިދާޅުވި އެވެ. އަދި، އޭނާ ގަބޫލުކުރައްވާ ގޮތުގައި، އަންނަ އަހަރުގެ ބަޖެޓަށް ބޭނުންވާ އެއްވެސް ފައިސާއެއް ނުހޯދޭނެ ކަމަށް ވެސް އޭނާ ވިދާޅުވި އެވެ.
ސަރުކާރުގެ ފައިނޭންސިން ޕްލޭން ފެއިލް ވުމުން ޓެކްސް ބޮޑުކޮށްގެން ހަރަދުތައް ހަމަޖައްސަން ސިޔާސަތުތައް ބަދަލުކުރަން ނިންމިޔަސް، ހަރަދުތައް ކުޑަނުކޮށް ޓެކްސް ބޮޑުކުރުމާ އެމްޑީޕީން ދެކޮޅެވެ. މިކަން ހާމަކުރައްވަމުން އަމީރު ވިދާޅުވީ ހަރަދުތައް ކުޑަނުކޮށް ޓެކްސް ބޮޑުކުރިޔަސް ލިބޭނެ އެއްވެސް އިގުތިސޯދީ އަދި މާލީ މަންފާއެއް ނެތް ކަމަށެވެ.
"އަޅުގަނޑުމެން އެމްޑީޕީގެ ފަރާތުން، އަޅުގަނޑުމެން މި ފާހަގަކުރަން ބޭނުންވަނީ ހަރަދު ކުޑަނުކޮށް ޓެކްސް ބޮޑުކުރުމާ އަޅުގަނޑުމެން ދެކޮޅު ކަމަށް. އަދި ހަރަދު ކުޑަ ނުކޮށް ޓެކްސް ބޮޑު ކުރިޔަސް އޭގެން ލިބޭނެ ފައިދާއެއް، އިގުތިސޯދަށް އަދި މާލީ ކަންކަން މެނޭޖުކުރުމަށް، އޭގެން ލިބޭނެ އެއްވެސް ފައިދާއެއް ނެތް ކަމަށް އަޅުގަނޑު ފާހަގަކުރަން،" އޭނާ ވިދާޅުވި އެވެ.
ހަރަދު ކުޑަކުރުމުގެ ގޮތުން ކުރަން ޖެހޭ އެންމެ ފުރަތަމަ ކަމަކީ، އަމީރު ވިދާޅުވި ގޮތުގައި، ބޭނުންވާ ވަރަށް ވުރެ އިތުރަށް ނަގާފައިވާ ސިޔާސީ މަގާމުތައް މަދުކުރުމެވެ. ސަރުކާރުގެ ސިޔާސީ މަގާމުތަކުގެ ބައެއް ތަފާސްހިސާބުތައް ހިއްސާކުރައްވަމުން އަމީރު ވިދާޅުވީ، ސަރުކާރުގެ ލިޔެކިޔުންތަކުން 2280 މީހުން ސިޔާސީ މަގާމުތަކުގައި އެބަ ތިބި ކަމަށެވެ.
މިއީ ވައުދުވެފައިވާ 700 ސިޔާސީ މަގާމަށް ވުރެ އިތުރަށް 1580 މީހުން ކަން ފާހަގަކުރައްވާ އަމީރު ވިދާޅުވީ އިތުރަށް ހުރި ސިޔާސީ މަގާމުތަކުގައި ތިބި މީހުންގެ މުޒާރަ ދޭން މަހަކު 40 މިލިއަން، އަދި އަހަރަކު 480 މިލިއަން ރުފިޔާ ހަރަދުވާ ކަމަށެވެ. މިހެންކަމުން ސަރުކާރުން 228 މީހުން، އެއީ ސިޔާސީ މަގާމުތަކުގައި ތިބި ކަމަށް ބުނާ މީހުންގެ 10 ޕަސެންޓު، ވަކިކޮށްގެން ފަސް މިލިއަން ސަލާމަތްކުރެވޭނެޔޭ ބުންޏަސް އެއީ އޮޅުވާލުމެއް ކަމަށް އޭނާ ތުހުމަތުކުރެއްވި އެވެ.
ސަރުކާރުން އިތުރުކުރަން ނިންމާފައިވާ ޓެކްސްތަކާއި ފީތަކަކީ ޓޫރިޒަމް ސިނާއަތާ ގުޅުންހުރި ޓެކްސްތަކާއި ފީތަކެވެ. އެއީ ޓީޖީއެސްޓީ 16 ޕަސެންޓުން 17 ޕަސެންޓަށް، ގްރީން ޓެކްސް ހަ ޑޮލަރުން 12 ޑޮލަރަށް އަދި އެއާޕޯޓު ޑިވެލޮޕްމަންޓް ފީ އާއި ޑިޕާޗާ ޓެކްސްގެ އެކި ގިންތިތަކުން އެކި ނިސްބަތުން ބޮޑުކުރަން ގާނޫނު ބަދަލުކުރަން މިހާރު ވަނީ ރައްޔިތުންގެ މަޖިލީހަށް ހުށަހަޅާފަ އެވެ.
