މާލޭގެ އުސް އިމާރާތަކުން ފުރާޅެއްގެ މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު، 21، އަށް އިންސާފު ހޯދައިދިނުމަށް އެދި ކުރަމުންދާ ސިލްސިލާ މުޒާހަރާގެ ތެރެއިން ރޭ ހައްޔަރު ކުރި ދެ ޒުވާނުން ވަގުތުން މިނިވަން ކުރުމަށް ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ގޮވައިލައްވައިފި އެވެ.
ޔުމްނު އަށް އިންސާފު ހޯދައިދޭން ކުރަމުންދާ ސިލްސިލާ މުޒާހަރާގެ ތެރެއިން ރޭ ހައްޔަރު ކުރީ އައިޝަތު ޝިމަން އަހުމަދު، 19، އާއި އަހުމަދު މަހްޒޫމް މާޖިދު، 28، އެވެ. މުޒާހަރާތައް ލީޑު ކުރަމުންދިޔަ އެ ދެ ޒުވާނުން ހައްޔަރު ކުރީ ކުރިން އިންޒާރު ދިނުމަކައި ނުލަ އެވެ.
އެ މައްސަލައިގައި މިއަދު ސޯޝަލް މީޑިއާގައި ވާހަކަ ދައްކަވަމުން ސުއޫދު ވިދާޅުވީ ސުލްހަވެރިކޮށް މުޒާހަރާ ކުރަމުންދިޔަ ބަޔަކު ހައްޔަރު ކުރަން ދެއްކޭނެ އުޒުރެއް ނޯންނާނެ ކަމަށެވެ.
"ސުލްހަވެރިކޮށް މުޒާހަރާ ކުރަމުންދިޔަ ބަޔަކު ހައްޔަރު ކުރަން ދެއްކޭނެ އުޒުރެއް ނޯންނާނެ. އެމީހުން ހަމައެކަނި ގޮވައިލަމުންދިޔައީ އިންސާފުވެރި ފުލުހުންގެ ތަހުގީގަކަށް. ސަރުކާރުން އެމީހުން ވަގުތުން މިނިވަން ކުރަންޖެހޭ،" އެކްސްގައި ކުރެއްވި ޕޯސްޓެއްގައި ސުއޫދު ވިދާޅުވި އެވެ.
ސުޕްރީމް ކޯޓުގެ ފަނޑިޔާރުގެ މަގާމުން ސުއޫދު އިސްތިއުފާ ދެއްވީ މާޗް މަހުގެ ތެރޭގަ އެވެ. އިސްތިއުފާ ދެއްވީ ކޯޓުގެ ފަނޑިޔާރުންނަށް ރައީސް މުހައްމަދު މުއިއްޒާއި ބަންޑާރަނައިބު އަހުމަދު އުޝާމް ބިރު ދައްކަވާތީ އެކަމަށް އިހުތިޖާޖު ކުރެއްވުމުގެ ގޮތުންނެވެ.
މުޒާހަރާއިން ހައްޔަރު ކުރި ޝިމަން އާއި މަހްޒޫމް މިނިވަން ކުރުމަށް ކުރީގެ ރައީސް މުހައްމަދު ނަޝީދު ވެސް ވަނީ މިއަދު ގޮވާލައިފަ އެވެ.
"އެއްވެ އުޅުމާއި ހިޔާލު ފާޅު ކުރުމުގެ އަސާސީ ހައްގުގެ ބޭނުން ހިފަމުން ދަނިކޮށް ހައްޔަރު ކުރި ޝިމަން އާއި މަހްޒޫމް ވަގުތުން މިނިވަން ކުރަން އަޅުގަނޑު ގޮވައިލަން،" ނަޝީދު ވިދާޅުވި އެވެ.
ރޭ މުޒާހަރާއިން ހައްޔަރު ކުރި ދެ މީހުން ދޫކޮށްލަން ސުއޫދާއި ނަޝީދުގެ އިތުރުން ދަ ޑިމޮކްރެޓްސް އާއި އެމްޑީޕީއިން ވެސް ވަނީ ގޮވާލައިފަ އެވެ. އަދި ބާރުގެ ބޭނުންކޮށްގެން މުޒާހަރާ ރޫޅާލާފައިވާތީ ކުރީގެ ރައީސް އިބްރާހިމް މުހައްމަދު ސޯލިހު ވެސް ވަނީ އެކަން ކުށްވެރި ކުރައްވައިފަ އެވެ.
މާލޭގެ މަގުތަކަށް ނުކުމެ ޒުވާނުން މުޒާހަރާ ކުރަން ފެށީ ޔުމްނުގެ މައްސަލައިގައި ފުލުހުން ހިންގާ ތަހުގީގައި ފާޅުކަން ބޮޑު ހިލާފުތަކެއް ފާޅުވުމުންނެވެ. އެންމެ ބޮޑު މައްސަލައަކީ ފުލުހުން ކިޔައިދީފައިވާ ވާހަކަތައް ދިމާނުވުމެވެ. އަދި އެ މައްސަލައިގައި ހިމެނޭ މީހުންނާމެދު އާންމު އުސޫލާ ހިލާފަށް ލުއި ގޮތަކަށް އަމަލު ކުރި ކަމަށް ވެސް ފުލުހުންނަށް ތުހުމަތު ކުރެވެ އެވެ.
ޔުމްނު ވެއްޓުނު ރޭ އެންމެ ފަހުން އޭނާއާއެކު އުޅުނު ރައުދު އަހުމަދު ޒިލާލް، 21، ހައްޔަރު ކުރީ ހާދިސާ ހިނގިތާ ހަ ދުވަސް ފަހުންނެވެ. އޭނާ ހައްޔަރު ކުރުމުގެ ކުރިން ފުލުހުން ބުނީ ޔުމްނު ވެއްޓުމުގައި އޭނާގެ ބައިވެރިވުމެއް ނެތް ކަމަށެވެ. އެކަމަކު އޭނާ ހައްޔަރު ކުރުމަށްފަހު ފުލުހުން ބުނީ، ޔުމްނު ވެއްޓުނުކަން ރައުދަށް އެނގޭ ކަމަށާއި އެ ރޭ އޭނާއާ ޔުމްނުއާ ދެމެދު ހަމަނުޖެހުންތަކެއް ހިނގާފައިވާ ކަމަށެވެ.
