އޭޕްރީލް 18، ވަނަ ދުވަހު މާލޭގެ އުސް އިމާރާތެއްގެ މަތިން ފުރާޅެއްގެ މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު, 21، ވެއްޓުނު މައްސަލައިގައި ރައުދު އަހުމަދު ޒިލާލް، 21، ހައްޔަރު ކުރުމަށް ކްރިމިނަލް ކޯޓުން ހަމަ އެ ދުވަހު ކުރި އަމުރު ފުލުހުން ތަންފީޒުކޮށްފައި ނެތްކަން އެނގިއްޖެ އެވެ.
އަދަދު އަށް މައުލޫމާތު ލިބިފައިވާ ގޮތުގައި ޔުމްނު ވެއްޓިފައި އޮއްވައި ފެނުނު މައްސަލައިގައި، ޔުމްނުއާއެކު އެރޭ އެންމެ ފަހުން އުޅުނު ރައުދު ތަހުގީގަށް އެންމެ ފުރަތަމަ ހާޒިރު ކުރީ ހެންވޭރު ފުލުހަށެވެ. މި ހާދިސާ ހިނގީ ހ. ފެންޓެނޯއީ ގޭގައި ކަމުން މައްސަލަ ބަލަން ފުރަތަމަ ހަވާލުވީ ހެންވޭރު ފުލުހުންނެވެ.
އެކި މަސްދަރުތަކުން މި ނޫހަށް މައުލޫމާތު ދިން ގޮތުގައި، އެންމެ ކުޑަ މިންވަރަކަށް 24 ގަޑިއިރު ބަންދުގައި ބެހެއްޓޭ ވަރަށް ރައުދުގެ މައްޗަށް އޭރު ވެސް ތުހުމަތު ކުރެވުނެވެ. ނަމަވެސް ގިނަ އިރުތަކެއް ނުވެ އޭނާ ދޫކޮށްލީ، ހައްޔަރު ކުރަން ކޯޓު އަމުރެއް ވެސް ފުލުހުން ހޯދާފައި އޮއްވަ އެވެ.
ފުލުހުން އޭނާ ހައްޔަރު ކުރުމުގެ އަމުރަކަށް އެދުމުން ކްރިމިނަލް ކޯޓުން ދިނީ 72 ގަޑިއިރުގެ އަމުރެކެވެ. ނަމަވެސް އެ މުއްދަތުގައި ވެސް އޭނާ ހައްޔަރެއް ނުކުރެ އެވެ.
ދެވަނަ ފަހަރަށް ފުލުހުން ރައުދު ހައްޔަރު ކުރަން ބެލިއިރު ފުރަތަމަ އަމުރުގެ ވަގުތު އޮތީ ހަމަވެފަ އެވެ.
ފުލުހުން ރައުދު އަލުން ހައްޔަރު ކުރަން މަސައްކަތް ފެށީ, ހާއްސަ ގޮތަކުން އޭނާއާ މެދު އަމަލުކޮށްފައިވާ ކަމުގެ ތުހުމަތުތައް ކުރެވި ތަހުގީގާ މެދު އާންމުންގެ ނުރުހުން އަމާޒުވުމުންނެވެ.
އަދަދު ނޫހަށް މައުލޫމާތު ދިން ބައެއް މަސްދަރުތަކުން ބުނި ގޮތުގައި ރައުދުގެ މައްސަލައާ ގުޅިގެން، އޭނާގެ ބޭބެ، ދައުދު އަހުމަދު ސަރުކާރުގެ ބައެއް ވެރިންނަށް ގުޅާފައިވެ އެވެ. ނަަމަވެސް އެ މުއާމަލާތްތަކުގެ ތަފުސީލެއް ކިޔައެއް ނުދެ އެވެ.
ރައުދު ބަންދު ނުކޮށް ދޫކޮށްލުމަކީ ފުލުހުން އަމަލުކުރާ، އަދި އަމަލުކުރަން ޖެހޭ ގޮތެއް ނޫން ކަމަށާއި ނުފޫޒެއް ނެތި އެ ގޮތަށް އަމަލު ކުރުމަކީ ދުރު ކަމެއް ކަމަށް މި ނޫހަށް މައުލޫމާތު ދިން ބައެއް ބޭފުޅުން ވިދާޅުވި އެވެ.
އެހެންވެ، ފުރަތަމަ ދުވަހު ކޯޓު އަމުރު ހޯދުމަށް ފަހު ރައުދު ހައްޔަރު ނުކޮށް ދޫކޮށްލި ސަބަބު ބެލުމަށް ނިންމާފައިވާ ކަމަށް މި ނޫހާ ވާހަކަ ދެއްކި މަސްދަރަކުން ބުންޏެވެ.
"އެއީ ހަގީގަތުގައި ވެސް ބަލަންޖެހޭ ކަމެއް،" އޭނާ ބުންޏެވެ.
ފުލުހުންނާއި ސަރުކާރަށް އާންމުންގެ ނުރުހުމާއި ފާޑުކިޔުން އިންތިހާއަށް އަމާޒުވުމުން ރައުދު ހައްޔަރުކުރީ އޭޕްރީލް 24 ވަނަ ދުވަހު އެވެ. އެއަށް ފަހު އޭނާގެ ބަންދަށް ކޯޓުން ފުރަތަމަ ފަސް ދުވަސް ބަންދު ޖެހުމަށް ފަހު، މުއްދަތު ހަމަވަވުމުގެ ކުރިން އޭނާގެ ބަންދު 10 ދުވަހަށް ވަނީ އިތުރުކޮށްފަ އެވެ.
