މާލޭގެ އުސް އިމާރާތަކުން ވެއްޓުނު ހައްވާ ޔުމްނު ރަޝީދު، 21، އަށް އިންސާފު ހޯދައިދިނުމަށް ޒުވާނުން ކުރާ މުޒާހަރާ ހުއްޓުވަން ފުލުހުން ރޭ ބާރުގެ ބޭނުންކޮށް, ދެ ޒުވާނަކު ހައްޔަރުކުރި އެވެ.
ފުލުހުން ހައްޔަރުކޮށްފައި ވަނީ މުޒާހަރާގައި އިސްކޮށް ހަރަކާތްތެރިވަމުން ދިޔަ މީހުންގެ ތެރެއިން އަބްދުﷲ މަހުޒޫމް މާޖިދު، 28, އާއި އާއިޝަތު ޝިމަން އަހުމަދު، 19 އެވެ.
އެ ދެ ޒުވާނުން ހައްޔަރުކުރުމުގެ ކުރިން ފުލުހުން ވަނީ މުޒާހަރާގެ ތެރެއަށް ޕެޕާ ސްޕްރޭ ޖަހައި، މުޒާހަރާގެ ބައިވެރިން ބޭނުންކުރަމުންދިޔަ ސްޕީކަރުތައްވެސް އަތުލައިފަ އެވެ.
"އާދަމް ހަލީމް ކްރިމިނަލް އިންވެސްޓިގޭޝަން ބިލްޑިން" ކައިރީގައި ޒުވާނުން ކުރަމުން ދިޔަ މުޒާހަރާ ބާރުގެ ބޭނުންކޮށްގެން ރޫޅާލުމުން، ޒުވާނުން ރުޅި އައިސްގެން، މާލޭގެ ބައެއް ސަރަހައްދުތަކަށް ހިނގައިން، ރައީސް ޑރ. މުހައްމަދު މުއިއްޒުގެ އިސްތިއުފާ އަށް ގޮވާފައިވެ އެވެ.
ނިމިގެންދިޔަ އޭޕްރީލް މަހުގެ 18 ވަނަ ދުވަހު ހ. ފެންޓެނޯއީ ގޭގެ ނުވަ ފަންގިފިލާއިން، އެގެއާ އިންވެގެން ހުރި ގުދަނެއްގެ ފުރާޅު މައްޗަށް ޔުމްނު ވެއްޓުނު ހާދިސާގައި މީހަކު ހައްޔަރުކޮށް، ތަހުގީގަށް ފޯނުތައް އަތުލައި، މައްސަލައާ ގުޅުން ހުރި ކަމަށް ތުހުމަތު ކުރެވުނު ތަންތަން ބަލައި ފާސްކުރީ ޒުވާނުން މަގު މައްޗަށް ނުކުމެ މުޒާހަރާ ކުރަން ފެށުމުންނެވެ.
މުޒާހަރާ ކުރާތާ ހަފުތާއަކަށް ވުރެ ގިނަ ދުވަސް ވެގެންދިޔައިރު ރޭ ފިޔަވައި ފުލުހުން މުޒާހަރާއަށް ހުރަހެއް ނާޅަ އެވެ. މީހަކު ހައްޔަރެއް ވެސް ނުކުރެ އެވެ.
މުޒާހަރާ ކުރާ ޒުވާނުން ވަނީ ސަރުކާރަށް 10 ޑިމާންޑެއް ކޮށްފަ އެވެ. އޭގެތެރޭގައި ހޯމް މިނިސްޓަރު، އަލީ އިހުސާން އާއި ޓްރާންސްޕޯޓު މިނިސްޓަރު، މުހައްމަދު އަމީން އިސްތިއުފާ ދިނުމަށް ގޮވައިލުން ހިމެނެ އެވެ.
ޒުވާނުން ކުރި ޑިމާންޑުތަކުގެ ތެރެއިން މިހައިތަނަށް ފުއްދާފައި ވަނީ ޕޮލިސް ކޮމިޝަނަރު، އަލީ ޝުޖާއު އިސްތިއުފާ ދިނުމާއި ޔުމްނުގެ މައްސަލަ ތަހުގީގު ކުރަން ރިޔާސީ ކޮމިޝަނެއް އުފެއްދުމެވެ.
titledesc
ނަމާދު ވަގުތު
- ފަތިސް 04:39
- އިރުއަރާ 05:54
- މެންދުރު 12:07
- އަޞްރު 15:23
- މަޣްރިބް 18:13
- ޢިޝާ 19:27
