ހުކުރު ދުވަހުގެރޭ ހ. ފެންޓޯނިއާގެ ނުވަ ވަނަ ފަންގިފިލާއިން ވެއްޓުނު ހައްވާ ޔުމްނު ރަޝީދު 21، ހޯދަން އޭނާ އާއެކު އެ ގޭގައި ހުރި ރައުދު އަަހުމަދު ޒިލާލް 21، 28 މިނެޓު ހޭދަކުރިކަން ފުލުހުން އާންމުކުރި ސީސީޓީވީ ފުޓޭޖުން އެނގިއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން އާންމުކުރި ސީސީޓީވީ ފުޓޭޖުން ފެންނަ ގޮތުގައި އެ އިމާރާތުގެ ނުވަ ވަނަ ފަންގިފިލާއިން ޔުމްނު ވެއްޓުނު ކަމަށް ބެލެވެނީ ހުކުރު ދުވަހުގެ ފަތިހު 4:52 ހާއިރު އެވެ. އޭރު ރައުދު ހުންނަނީ އެ އިމާރާތުގެ އަށްވަނަ ފަންގިފިލާގަ އެވެ.
ފުލުހުން އެންމެ ފުރަތަމަ ބޭއްވި ސިއްރު ނޫސްވެރިންގެ ބައްދަލުވުމުގައި ބުނީ ޔުމްނު ވެއްޓުނު ވަގުތު ބާރު އަޑެއް ވީޑިއޯ ފުޓޭޖުން އިވޭ ކަމަށެވެ. ނަމަވެސް މިއަދު އެ ފުޓޭޖު އާންމުކުރި އިރު، އެ އިމާރާތުގައި ހަރުކޮށްފައި ހުރި އެލާމް ސިސްޓަމުން އެ ވަގުތު އެލާމް އަޅަމުން ދާތީ ޔުމްނު ވެއްޓުނުއިރު އިވޭ ކަމަށް ފުލުހުން ބުނާ އަޑު އެހައި ސާފުކޮށް ނުއިވެ އެވެ.
ޔުމްނު ވެއްޓުނު ކަމަށް ފުލުހުން ލަފާ ކުރާ ވަގުތު، ހ. ފެންޓޯނިއާގެ ނުވަ ވަނަ ފަންގިފިލާއަށް ރައުދު ސިޑިން އަރާ މަންޒަރު ފެނެ އެވެ. އެއަށްފަހު އަނެއްކާވެސް 4:53 ގައި ރައުދު އަށްވަނަ ފަންގިފިލާއަށް ފައިބައި ލިފްޓަށް އަރާ މަންޒަރު ވީޑިއޯއިން ފެނެ އެވެ. ރައުދުގެ އަމަލުތައް ހުރިގޮތުން އޭނާ އުޅުނީ ޔުމްނު ހޯދަންކަން އެނގެ އެވެ.
ސީސީޓީވީ ފުޓޭޖުން ދެން ފެންނަނީ 4:57 ގައި ހަތްވަނަ ފަންގިފިލާ އާއި އަށްވަނަ ފަންގިފިލާ އާ ދެމެދު ސިޑިގޮޅީގައި ހުރި ފެންލައިޓަކުން ރައުދު ތިރި ބަލައި ހޯދާ މަންޒަރެވެ. އެއަށްފަހު ދެން އަނެއްކާވެސް ރައުދު ފައިބަނީ ސިޑިން ތިރިއަށެވެ.
އޭގެ އަށް ވަރަކަށް މިނެޓު ފަހުން 5:05 ގައި ރައުދު އަށްވަނަ ފަންގިފިލާއަށް އަރައި ޔުމްނު ހޯދާ މަންޒަރު ފެނެ އެވެ. އެއަށްފަހު އަނެއްކާވެސް ހަތްވަނަ ފަންގިފިލާ އާއި އަށްވަނަ ފަންގިފިލާ އާ ދެމެދު ސިޑިގޮޅީގައި ހުރި ފެންލައިޓަކުން ތިރި ބަލައި "ޔުމްނޫ" އޭ ކިޔާ ރައުދު ގޮވާ އަޑު ވީޑިއޯއިން އިވެ އެވެ.
ދެން ވެސް ޔުމްނުގެ ހަބަރެއް ނުވުމުން ރައުދު އަނެއްކާ ވެސް ހަތްވަނަ ފަންގިފިލާއަށް ސިޑިން ފައިބާ މަންޒަރު ވީޑިއޯއިން ފެނެ އެވެ. އޭރު ވެސް ހުއްޓުމެއް ނެތި އެ ގެއިން އެލާމް އަޅަމުންދެ އެވެ.
ފުލުހުން ބުނީ އެ ވަގުތުގެ ތެރޭގައި އެކި ފަހަރު މަތިން ޔުމްނު ހޯދުމަށް ރައުދު ތިރިއަށް ފައިބައި މައްޗަށް އެރި ކަމަށެވެ. ރައުދު މަގުމައްޗަށް ނުކުމެ ޔުމްނު ހޯދުމަށް މަސައްކަތް ކުރާ މަންޒަރު ވެސް ފުލުހުން ދެއްކި ސީސީޓީވީ ފުޓޭޖުން ފެނެ އެވެ.
އެގޮތުން 5:12 ގައި ހ. ފެންޓޯނިއާ ގެއިން ނުކުމެ އެތަނުގައި ޕާކު ކޮށްފައި ހުރި ސައިކަލެއްގެ މަތީގައި އިށީނދެލައިގެން މައްޗަށް ބަލަން ރައުދު އިންނަ މަންޒަރު ވީޑިއޯއިން ފެނެ އެވެ. އެއަށްފަހު އެ ގޭ ކުރިމަތިން މަގުގެ ދެ ފަރާތަށް ރައުދު ހިނގާ މަންޒަރު ފެނެ އެވެ. އަލުން ގޮސް ރައުދު ފެންޓޯނިއާ ގެއަށް ވަންނަ މަންޒަރު ފެންނަނީ 5:16 ގަ އެވެ. އެއީ ރައުދު އެ ގެއަށް ވަންނަ މަންޒަރު ފެންނަ އެންމެ ފަހު ފަހަރެވެ.
ސީސީޓީވީ ފުޓޭޖުން ދެން ފެންނަނީ 5:20 ގައި އަނެއްކާ ވެސް ރައުދު ބޭރަށް ނުކުންނަ މަންޒަރެވެ. އެގެއިން ނުކުތުމަށްފަހު މައްޗަށް ބަލައިގެން އިރުކޮޅަކު ހުރުމަށްފަހު ރައުދު އެ ސަރަހައްދު ދޫކޮށް ދާ މަންޒަރު ފެނެ އެވެ.
ޔުމްނު ވެއްޓުނު ހާދިސާއާ ގުޅިގެން އެންމެ ފުރަތަމަ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ރައުދު އާ ސުވާލުކޮށް އޭނާގެ ސާމްޕަލް ނެގި ކަމަށާއި ޓެސްޓު ކުރިއިރު، ކެނެބިސްއަށް އޭނާ ޕޮޒިޓިވްވި ކަމަށެވެ. ފުލުހުން އޭނާ ހައްޔަރެއް ނުކުރެ އެވެ.
ނަމަވެސް މިއަދު އޮތް ނޫސްވެެރިންގެ ބައްދަލުވުމުގައި ފުލުހުން ބުނީ ތަހުގީގަށް ރައުދު އެއްބާރުލުން ނުދޭތީ އޭނާ ހައްޔަރު ކުރުމުގެ އަމުރަކަށް މިހާރު އެދެފައިވާ ކަމަށެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ޑެޕިއުޓީ ކޮމިޝަނާ އޮފް ޕޮލިސް އިސްމާއިލް ނަވީން ވިދާޅުވީ މައްސަލައިގައި ރިވިއު ޓީމުން ކުރާ މަސައްކަތަށް ރައުދުގެ ފަރާތުން އެއްބާރުލުން ނުލިބުމުގެ މައްސަލަ އެބައުޅޭ ކަމަށެވެ.
ހ. ފެންޓެނޯއީ ގެއިން ޔުމްނު ވެއްޓި، ޖެހިގެން ހުރި ގުދަނުގެ ފުރާޅުމަތީގައި އޮއްވައި ފެނުނީ ހުކުރު ދުވަހު ހެނދުނު އެވެ.
