އަންކާރާ، ތުރުކީ (އެޕްރީލް 1) - އިސްތަންބޫލްގެ މޭޔަރު އެކްރެމް އިމާމޮގްލޫ ޖަލުގައި ބަންދުކޮށް ހުދުމުހުތާރުކަން އިސްކުރަމުންދާތީ އެ ގައުމުގެ ރައީސް ރަޖަބް ތައްޔިބު އުރުދުގާންއާ ދެކޮޅަށް ކުރަމުންދާ މުޒާހަރާތަކުގެ އިސް ސަފުގައި ހަރަކާތްތެރިވަމުންދަނީ ޒުވާނުން ކަމަށް ބޭރުގެ މީޑިއާތަކުން ރިޕޯޓުކޮށްފި އެވެ.
ތުރުކީގައި 2028 ވަނަ އަހަރު އޮންނަ ރިޔާސީ އިންތިހާބުގައި އިދިކޮޅު ޕާޓީގެ ފަރާތުން ވާދަކުރާނެ ކަމަށް ބެލެވުނު އިމާމޮގްލޫ ހައްޔަރުކުރުމާ ގުޅިގެން ކުރަމުންދާ މުޒާހަރާތަކުގައި މިހާތަނަށް 2,000 އަށްވުރެ ގިނަ މީހުން ވަނީ ހައްޔަރުކޮށްފަ އެވެ.
""އެންމެ ވެރިއެއްގެ ދަށުން ބޮޑުވި ޖީލަކަށްވުމަކީ ޑިމޮކްރަސީއެއްގައި އުޅޭކަމުގެ ހެއްކެއް ހޯދަން ބޭނުންވި ސަބަބު. އަބަދަށް ދެމިއޮންނާނެ ބާރެއްގެ ހިޔާލަކީ ބިރުވެރި ހިޔާލެއް،" އުމުރުން 20 އަހަރުގެ ދަރިވަރަކު ރޮއިޓާސްއަށް ބުންޏެވެ.
"މިއީ އަހަރުމެންނަށް ލިބޭނެ އެންމެ ފަހު ފުރުސަތުހެން ހީވަނީ. ކާމިޔާބެއް ނުލިބިއްޖެނަމަ އަހަރުމެންގެ ތެރެއިން ގިނަ ބަޔަކު ތުރުކީ ދޫކޮށް ދާން ޖެހިދާނެ."
ސިޔާސީ މާޔޫސްކަމުގެ ބޭރުން އިގުތިސޯދީ ތަކުލީފުގެ ސަބަބުން ތުރުކީގެ ޒުވާނުންގެ މެދުގައި ސަރުކާރާ މެދު އޮތް ހިތްހަމަނުޖެހުންތައް އިތުރުވި އެވެ. ތަކެތީގެ އަގުތައް ބޮޑުވުމާއި ވަޒީފާ ނުލިބޭތީ ޒުވާނުންގެ މުސްތަގުބަލު ފުނޑުފުނޑުވަމުންދާ ކަމުގެ ބިރުވެރިކަން ވެސް ޒުވާން އާބާދީގެ މެދުގައި އެބައޮތެވެ.
"އަހަރެން 2024 ވަނަ އަހަރު ގްރެޖުއޭޓްވި ނަމަވެސް ވަޒީފާއެއް ނުލިބޭ، އާއިލާއަށް މާލީ ގޮތުން އެތައް ގޮންޖެހުމެއް އެބައޮތް. މޫނު ދައްކާކަށް ބޭނުމެއް ނޫން ފުލުހުން އައިސްދާނެ އަހަރެން ގެންދަން،" އުމުރުން 25 އަހަރުގެ މުޒާހަރާވެރިޔަކު ބުންޏެވެ.
އިމާމޮގްލޫގެ ގާނޫނީ ވަކީލު ވެސް ވަނީ ހައްޔަރުކޮށްފަ އެވެ. އޭނާ ވެސް ހައްޔަރުކޮށްފައި ވަނީ ފްރޭމް ކޮށްފައި ކަމަށް ތުހުމަތު ކުރެވެ އެވެ. އޭގެ އިތުރުން އެއްވުންތައް ކަވަރު ކުރަމުންދިޔަ ނޫސްވެރިންތަކެއް ވެސް ވަނީ ހައްޔަރުކޮށްފަ އެވެ.
