އެމެރިކާގައި މަރުގެ އަދަބު އިއްވާފައިވާ ކްރިސްޓާ ޕައިކްގެ ގަޔަށް ވިހަ އިންޖެކްޝަން ޖަހައިގެން މަރާލުމަށް މިދިޔަ މަހުގެ ފަހުކޮޅު ކުރި މަސައްކަތް ނާކާމިޔާބުވުމާ ގުޅިގެން، އޭނާއަށް ހޮސްޕިޓަލުގައި ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށް އޭނާގެ ވަކީލުން ބުނެފި އެވެ.
އުމުރުން 50 އަހަރުގެ ޕައިކްގެ ވަކީލުން ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ، ހޮސްޕިޓަލުން ދޫކޮށްލުމަށްފަހު އޭނާ މިހާރު އަނބުރާ ޖަލަށް ފޮނުވާލާފައިވާ ކަމަށެވެ. ޕައިކް ފާއިތުވި 30 އަހަރު ހޭދަކުރި އެ ޖަލުގައި އޭނާއަށް އަދިވެސް ސިއްހީ ފަރުވާ ދެމުންދާ ކަމަށް އެ ބަޔާނުގައިވެ އެވެ.
ސެޕްޓެމްބަރު މަހުގެ 30 ވަނަ ދުވަހު ޕައިކް މަރާލުމަށްޓަކައި "ޕެންޓޯބާބިޓަލް" ކިޔާ ޑްރަގެއްގެ ދެ އިންޖެކްޝަން އޭނާގެ ގަޔަށް ޖެހި ނަމަވެސް، އޭނާ މަރުނުވެ ސަލާމަތްވި އެވެ. އެހެންނަމަވެސް، އެ ހާދިސާއަށްފަހު އޭނާގެ ހާލު ވަރަށް ބޮޑަށް ސީރިއަސްވި އެވެ.
މި ހަފުތާގެ ކުރީކޮޅު ޕައިކް ހޭއަރައި ވާހަކަދައްކަން ފެށުމުން، އެކަމާ މެދު ތަޖުރިބާކާރުންނާއި، މެޑިކަލް ސްޓާފުންގެ އިތުރުން އޭނާގެ ވަކީލުން ވެސް ތިބީ ހައިރާންވެފަ އެވެ.
ވިހަ އިންޖެކްޝަން ޖަހައިގެން މަރުގެ އަދަބު ތަންފީޒުކުރަން އުޅުމުގެ ތެރޭގައި މަރުނުވެ ސަލާމަތްވި ހަމައެކަނި މީހަކީ ޕައިކް ކަމަށް ބެލެވޭތީ، މިއީ ގާނޫނީ ގޮތުންނާއި އިޖުރާއީ ގޮތުން މީގެ ކުރިން ކުރިމަތިވެފައި ނުވާ ފަދަ އާދަޔާ ހިލާފު ހާލަތެކެވެ.
ޕައިކްގެ ވަކީލުން ނެރުނު ބަޔާނުގައި ބުނެފައިވަނީ، މިފަދަ އާދަޔާ ހިލާފު ހާލަތެއްގައި އޭނާއަށް ފަރުވާ ދިނުމުގައި ހަރަކާތްތެރިވި މެޑިކަލް ޓީމަށާއި ފުރަތަމަ އެހީތެރިކަން ފޯރުކޮށްދިން ފަރާތްތަކަށް ޕައިކް ޝުކުރު އަދާކުރާ ކަމަށެވެ.
އަނބުރާ ޖަލަށް ބަދަލުކުރުމަށްފަހު ޕައިކަށް މިހާރު ދެމުންދަނީ ކޮން ކަހަލަ ސިއްހީ ފަރުވާއެއްކަން ސާފެއް ނުވެ އެވެ. ނަމަވެސް، އޭނާގެ ސިއްހީ ހާލަތު ރަނގަޅުވުމަށްޓަކައި އަދި ވަރަށް ގިނަ ދުވަސް ނަގާނެ ކަމަށް ވަކީލުން ކުރިން ބުނެފައިވެ އެވެ.
ޓެނެސީ ޑިޕާޓްމަންޓް އޮފް ކަރެކްޝަނުން މަރުގެ އަދަބު ތަންފީޒުކުރުމަށް ބޭނުންކުރި އުސޫލު ދިފާއުކުރި ނަމަވެސް، އެކަން ރޭވިގޮތަށް ކުރިއަށް ނުދިޔަ ސަބަބެއް މިހާތަނަށް ހާމަކޮށްފައެއް ނުވެ އެވެ.
