އިންޑިއާގައި ކުރަމުންދާ މުޒާހަރާތަކުގެ ތެރެއިން، "އުސޫލުން ބޭރުން ހައްޔަރުކޮށްފައިވާ" މީހުން ވަގުތުން މިނިވަންކުރުމަށް އދ. ގެ ހިއުމަން ރައިޓްސް ކޮމިޝަނަރުގެ އޮފީހުން ހޮނިހިރު ދުވަހު އިންޑިއާ ސަރުކާރަށް ގޮވާލައިފި އެވެ.
އދ. ގެ އިންސާނީ ހައްގުތަކާ ބެހޭ އޮފީހުން ނެރުނު ބަޔާނެއްގައި ބުނެފައިވަނީ، ދިއްލީގައި މިއަދު ބޭއްވި ބޮޑު މުޒާހަރާގެ ކުރިންނާއި މުޒާހަރާގެ ތެރެއިން، ގިނަ އަދަދެއްގެ އާންމުންނާއި، މުޒާހަރާގެ އިސްވެރިންނާއި، މަދަނީ ޖަމިއްޔާތަކުގެ މެންބަރުންނާއި، ވަކީލުންގެ އިތުރުން ނޫސްވެރިން ހައްޔަރުކުރަމުންދާ ކަމުގެ ރިޕޯޓުތަކާ މެދު ނުހަނު ކަންބޮޑުވާ ކަމަށެވެ.
އެ ބަޔާނުގައި އިތުރަށް ބުނެފައިވަނީ، އެއްވެސް އުސޫލެއް ނެތް ގޮތަށް ހައްޔަރުކޮށްފައިވާ އެންމެހައި ފަރާތްތައް އެއްވެސް ޝަރުތަކާ ނުލައި ވަގުތުން މިނިވަންކުރަން ޖެހޭނެ ކަމަށެވެ.
އިންޑިއާގެ އިންތިޚާބީ ނިޒާމަށް އިސްލާހު ގެނައުމަށް ގޮވާލައި، ޒުވާނުން އިސްވެ އުފައްދާފައިވާ "ކޮކްރޯޗް ޖަންތާ ޕާޓީ" (ސީޖޭޕީ) އިން ދިއްލީގައި ކުރިއަށްގެންދާ މުޒާހަރާތަކުގެ ތެރެއިން މިހާތަނަށް އެތައް ހާސް ބަޔަކު ވަނީ ހައްޔަރުކޮށްފަ އެވެ.
އިންޑިއާގެ ޗީފް ޖަސްޓިސް ވަޒީފާއެއް ނެތް ޒުވާނުންނަކީ "ކޮކްރޯޗް" ނުވަތަ ކުރަފިތަކެއްގެ ގޮތުގައި ސިފަކުރެއްވުމާ ގުޅިގެން، މިދިޔަ މޭ މަހު މި ހަރަކާތް ފެއްޓެވި އަބީޖީތު ދިޕްކޭ، ދިއްލީއަށް ފޭބިތާ ކުޑަވަގުތުކޮޅެއްގެ ތެރޭގައި އެ ހަރަކާތުގެ އެހެން އިސްވެރިންނާއެކު ވަނީ ހައްޔަރުކޮށްފަ އެވެ.
މުޒާހަރާއާ ދިމާކޮށް ދިއްލީގެ މަގުތައް ބަންދުކޮށް، އެތައް ހާސް ފުލުހުން ވަނީ މަގުތަކަށް ނެރެފަ އެވެ.
މި ހައްޔަރުކުރުންތަކާ ގުޅޭ ގޮތުން ދިއްލީ ފުލުހުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ. ނަމަވެސް، އިންޑިއާގެ ވެރިރަށް ދިއްލީގެ މަޝްހޫރު "ޖަންތަރު މަންތަރު" ސަރަހައްދުގައި މުޒާހަރާ ކުރުމުގެ ހުއްދަ ދިނުމަށް ފުލުހުން ކުރިން ވަނީ އިންކާރުކޮށްފަ އެވެ.
އިންޑިއާގައި ސިޔާސީ ޕާޓީއެއްގެ ގޮތުގައި ރަސްމީކޮށް ރަޖިސްޓްރީކޮށްފައި ނުވާ މި ޖަމާއަތުން އިންތިޚާބީ އިސްލާހުތަކަށް ގޮވާލަމުން މިދަނީ، އިންޑިއާގެ ސްޓޭޓްތަކުގެ މުހިންމު އިންތިޚާބުތަކެއް ބޭއްވުމަށް މަދު މަސްތަކަކަށް ވެފައި ވަނިކޮށެވެ.
މީގެ އިތުރުން، ވޯޓުލާ މީހުންގެ ލިސްޓަށް އޮޅުވާލުންތަކެއް ގެނެސްފައިވާ ކަމަށް ބުނެ، އިންޑިއާގެ ޗީފް އިލެކްޝަން ކޮމިޝަނަރު (ސީއީސީ) ގްޔަނޭޝް ކުމާރު އިސްތިއުފާ ދިނުމަށް ވެސް އެ ޖަމާއަތުން ދަނީ ގޮވާލަމުންނެވެ. ނަމަވެސް އިންޑިއާގެ އިލެކްޝަން ކޮމިޝަނުން ވަނީ މި ތުހުމަތުތައް ދޮގުކޮށްފަ އެވެ.
