އިންޑިއާގެ ވެރިރަށް ނިއު ދިއްލީގައި މުޒާހަރާ ކުރުމަށް ތައްޔާރުވަމުން ދަނިކޮށް ހައްޔަރުކުރި "ޖެން-ޒީ" ނުވަތަ ޒުވާނުން އިސްވެ އުފައްދާފައިވާ "ކޮކްރޯޗް ޖަންތާ ޕާޓީ" (ސީޖޭޕީ) ގެ އިސް ލީޑަރުން މިނިވަންކުރުމަށް އެ ގައުމުގެ ކޯޓަކުން އަމުރުކޮށްފި އެވެ.
ކޯޓުން މި އަމުރު ނެރުނުއިރު، މުޒާހަރާތަކާ ގުޅިގެން ދިއްލީގެ ސަލާމަތީ ކަންކަން ވަރުގަދަކޮށް، އެތައް ހާސް ފުލުހުން މަގުތަކަށް ނެރެ، ބޮޑެތި މަގުތަކުގައި ވަނީ ބެރިކޭޑް ޖަހައި ބަންދުކޮށްފަ އެވެ.
އިންޑިއާގެ އުއްތަމަ ފަނޑިޔާރު، ވަޒީފާއެއް ނެތް ބައެއް ޒުވާނުންނަކީ "ކޮކްރޯޗް" ނުވަތަ ކުރަފިތަކެއްގެ ގޮތުގައި ސިފަކުރެއްވުމާ ގުޅިގެން، މިދިޔަ މޭ މަހު މި ހަރަކާތް ފެށި އަބީޖީތު ދިޕްކޭ އާއި އެ ހަރަކާތުގެ އެހެން ލީޑަރުން ހައްޔަރުކުރީ އިންތިޚާބީ އިސްލާހުތަކަށް ގޮވާލައި މުޒާހަރާ ކުރުމަށް ހޮނިހިރު ދުވަހު ދިއްލީއަށް ދިޔުމުންނެވެ.
މި މުޒާހަރާ ބޭއްވުމުގެ ހުއްދަ ފުލުހުން ދީފައިނުވާއިރު، މުޒާހަރާގެ ބައިވެރިންނަށް އެ ސަރަހައްދަށް ނުވަދެވޭނެ ގޮތް ހެދުމަށްޓަކައި މީގެ ކުރިން ދުވަހަކު ވެސް އަޅާފައިނުވާ ފަދަ ހަރުކަށި ފިޔަވަޅުތަކެއް ސަލާމަތީ ބާރުތަކުން ވަނީ އަޅާފަ އެވެ.
ނަމަވެސް، ހުރަސްތަކާއެކު ވެސް އެތައް ހާސް ބަޔަކު މުޒާހަރާގެ ސަރަހައްދަށް ވަނުމަށް މަސައްކަތް ކޮށްފައިވެ އެވެ. މީޑިއާ ރިޕޯޓްތައް ބުނާ ގޮތުން، އެ ސަރަހައްދުން 7,000 އެއްހާ މީހުން ހައްޔަރުކުރުމަށް ފަހު، ރޭގަނޑުވީ ފަހުން ވަނީ ދޫކޮށްލާފަ އެވެ.
އިންޑިއާގައި ސިޔާސީ ޕާޓީއެއްގެ ގޮތުގައި ރަސްމީކޮށް ރަޖިސްޓްރީކޮށްފައި ނުވާ ސީޖޭޕީން މަސައްކަތް ކުރަމުންދަނީ، ކުރިއަށް އޮތް މުހިންމު ސްޓޭޓް އިންތިޚާބުތަކުގެ ކުރިން އިންތިޚާބީ ނިޒާމަށް އިސްލާހުތަކެއް ގެނައުމަށެވެ.
މީގެ އިތުރުން، ވޯޓުލާ މީހުންގެ ލިސްޓަށް އޮޅުވާލުންތަކެއް ގެނެސްފައިވާ ކަމަށް ތުހުމަތުކޮށް، ޗީފް އިލެކްޝަން ކޮމިޝަނަރު (ސީއީސީ) ގްޔަނޭޝް ކުމާރު އިސްތިއުފާ ދެއްވުމަށް ވެސް އެ ޖަމާއަތުން ވަނީ ގޮވާލާފަ އެވެ. ނަމަވެސް އިލެކްޝަން ކޮމިޝަނުން ވަނީ އެ ތުހުމަތުތައް ދޮގުކޮށްފަ އެވެ.
އާދީއްތަ ދުވަހުގެ ހެނދުނު ސީޖޭޕީގެ ވަކީލު ރަތުނާ ސިންގް ވިދާޅުވީ، ދިޕްކޭ އާއި އެ ޕާޓީގެ އިސް ދެ ލީޑަރުން ކަމަށްވާ ސޯރަވް ދާސް އަދި އަޝުތޯޝް ރަންކާ، "އާންމު މަސްލަހަތު ހިފެހެއްޓުމަށްޓަކައި" ބަންދުގައި ބޭތިއްބުމުގެ އަމުރަކަށް އެދި މެޖިސްޓްރޭޓް ކޯޓަށް ހާޒިރުކުރާނެ ކަމަށް ފުލުހުން އަންގާފައިވާ ކަމަށެވެ.
އޭގެ ފަހުން ރަތުނާ ސިންގް އެކްސްގައި ކުރެއްވި ޕޯސްޓެއްގައި ވިދާޅުވީ، "ކުރިއަށް އޮތް އެއް އަހަރު ދުވަހުގެ ތެރޭގައި އަމާންކަން ނަގާލުމުގެ އެއްވެސް އަމަލެއްގައި ބައިވެރިނުވުމަށް ޝަރުތުކޮށް" ކޯޓުން އެ ތިން މީހުން މިނިވަންކޮށްފައިވާ ކަމަށެވެ. ނަމަވެސް އެ ޝަރުތުގެ މާނައަކީ ކޮބައިކަމެއް އަދި ސީޖޭޕީގެ ލީޑަރުންނަށް މުޒާހަރާތަކުގައި ބައިވެރިވެވޭނެ ކަމެއް ނުވަތަ ނޫންކަމެއް އަދި ސާފެއް ނުވެ އެވެ.
ހޮނިހިރު ދުވަހު ކަންތައްތައް ހިނގައިދިޔަ ގޮތަށް ބަލާއިރު، ދިޕްކޭ، ދާސް އަދި ރަންކާ ދަތުރުކުރި ބޯޓު އެއާޕޯޓަށް ޖެއްސުމާއެކު ފުލުހުން ވަނީ ބޯޓަށް އަރައި އެ މީހުން ހައްޔަރުކޮށްފަ އެވެ.
އިންޑިއާގެ ވެރިރަށުގެ މަޝްހޫރު ސަރަހައްދެއް ކަމަށްވާ ޖަންތަރު މަންތަރުގައި މުޒާހަރާ ކުރުމުގެ ހުއްދަ ފުލުހުން ނުދިނުމުގެ އިތުރުން، މުޒާހަރާގެ ބައިވެރިންނަށް އެ ސަރަހައްދަށް ނުދެވޭނެ ގޮތް ހެދުމަށް މުޅި ސިޓީ އޮތީ އެއްކޮށް ބަންދުކޮށްފަ އެވެ.
ހޮނިހިރު ދުވަހު ދިއްލީގެ ބޮޑު ބައެއް ފެނުނީ ހަނގުރާމައިގެ މައިދާނެއްގެ ގޮތުގަ އެވެ. މަގުތައް ބެރިކޭޑް ޖަހައި ބަންދުކޮށްފައިވާއިރު، އޮފީސްތަކާއި، ފިހާރަތަކުގެ އިތުރުން ރެސްޓޯރަންޓްތައް ވެސް ހުރީ ބަންދުކޮށްފަ އެވެ. ސީޕީޖޭއިން ބުނީ ހުރަސްއެޅި ނަމަވެސް، އިތުރު އެއްވުންތައް ބާއްވާނެ ކަމަށެވެ.
