ރާއްޖޭގައި މަސައްކަތް ކުރަމުން ދިޔަ ބިދޭސީއެއްގެ އަތުން ގިނަ އަދަދެއްގެ ފައިސާތަކެއް ނެގި މައްސަލައިގައި ތުހުމަތުކުރެވޭ އިމިގްރޭޝަން އޮފިސަރުން ހިންގި އޮޕަރޭޝަނުގައި, ބަންދަށް ގެންދިޔަ ބިދޭސީންގެ އަތުގައި ސައްހަ ލިޔެކިޔުން ހުރި ކަމަށް ފުލުހުން މިއަދު ބުނެފި އެވެ.
ފުލުހުން ނެރުނު ނޫސް ބަޔާނެއްގައި ބުނީ އިމިގްރޭޝަނުން މި އޮޕަރޭޝަން ހިންގީ އެ އިދާރާއިން ކަނޑައަޅާފައިވާ އުސޫލުތަކާ ހިލާފަށް, ލިޔެކިޔުންތައް ފުރިހަމަނުކޮށް ކަމަށެވެ. އަދި މި އޮޕަރޭޝަނާ ބެހޭ މައުލޫމާތު, މި މައްސަލައާ ގުޅިގެން މަގާމުން ވަކިކޮށްފައިވާ އިމިގްރޭޝަން ކޮންޓްރޯލަރު ޝަމްއާން ވަހީދަށް ކުރިން އެނގިފައިވާކަން ތަހުގީގަށް ދެނެގަނެވިފައިވާ ކަމަށް ވެސް ފުލުހުން ބުންޏެވެ.
ފުލުހުން ބުނި ގޮތުގައި އިމިގްރޭޝަނުން އެ އޮޕަރޭޝަން ފުރަތަމަ ހިންގި ތިން މުވައްޒަފުންނަކީ އެފަދަ މަސްއޫލިއްޔަތުތަކެއް އަދާކުރުމުގެ ހުއްދަ ލިބިފައިވާ ތިން މުވައްޒަފުން ނޫނެވެ. އެ މުވައްޒަފުންނަކީ ކޮންޓްރޯލާ ޖެނެރަލްގެ ބިއުރޯ އަދި ބިއުރޯގެ ދަށުން ހިންގާ ޕްލޭނިން އަދި މީޑިއާގައި މަސައްކަތް ކުރާ ތިން މުވައްޒަފުން ކަމަށް ފުލުހުން ބުންޏެވެ.
"މި އޮޕަރޭޝަންގައި ހަތް ބިދޭސީ މަސައްކަތްތެރިން ހުއްޓުވައި، ވަޒީފާގެ އެ މަސްއޫލިއްޔަތު ނެތް ކުރިން ދެންނެވި އިމިގްރޭޝަންގެ ތިން މުވައްޒަފުން އެ ގެ ބަލައި ފާސްކޮށްފައިވޭ. އޭގެ ފަހުން އެ ރޭ އެފަދަ އޮޕަރޭޝަންތަކަށް ހާއްސަކޮށްފައިވާ އިމިގްރޭޝަންގެ ޓީމެއް ގެނެސް، އަލުން ސީން ޕްރޮސެސްކޮށް، ހައްޔަރު ކުރެވުނު ބިދޭސީންގެ ތަކެތި ސީލްކޮށް، އަދި އެ މީހުން އިމިގްރޭޝަންގެ ޑިޓެންޝަން ސެންޓަރަށް ގެންގޮސްފައިވޭ،" ފުލުހުންގެ ބަޔާނުގައިވެ އެވެ.
އިމިގްރޭޝަންގެ ބެލުމުގެ ދަށަށް ގެންދިޔަ ހަތް ބިދޭސީންގެ ލިޔެކިޔުންތައް ވެސް ސައްހައިރު، އޭގެ ތެރެއިން ގިނަ އަދަދެއްގެ ފައިސާ ފެނުނު މީހާ ޝަމްއާންގެ އިރުޝާދުގެ ދަށުން ދޫކޮށްލިކަން ތަހުގީގަށް ޔަގީން ކުރެވިފައިވާކަން ފުލުހުން ބުންޏެވެ.
ބަންދުން ދޫކޮށްލި ބިދޭސީ މީހާއާ ސްޕޮންސަރުގެ ހައިސިއްޔަތުން ހަވާލުވި މީހާއަކީ ދިވެއްސެއް ކަމަށާއި އެއީ މައްސަލައާ ގުޅިގެން ހައްޔަރުކުރި އިމިގްރޭޝަންގެ މުވައްޒަފެއްގެ އާއިލާ މެންބަރެއް ކަމަށް ފުލުހުން ބުންޏެވެ.
ބިދޭސީ މީހާ ހައްޔަރު ކުރެވުނު އިރު އޭނާގެ އަތުން އިމިގްރޭޝަންގެ ބެލުމުގެ ދަށަށް ގެނައި ފައިސާ، އޭނާ ދޫކޮށްލިއިރު ކޮތަޅަކަށް އަޅާފައި އަނބުރާ ހަވާލުކުރިކަން ތަހުގީގަށް އެނގިފައިވާ ކަމަށް ފުލުހުން ބުންޏެވެ. އޭނާ ދޫކޮށްލިއިރު, އުސޫލާ ހިލާފަށް އޮޕަރޭޝަން ހިންގި އިމިގްރޭޝަނުގެ މުވައްޒަފުން ރެއިޑުކުރި ގެ ހިމެނޭ ސަރަހައްދުގައި ތިބި ކަމަށް ފުލުހުން ބުންޏެވެ.
"ބިދޭސީ މީހާ ދޫކޮށްލުމަށްފަހު، އޭނާ ފުރަތަމަ ދިޔައީ އޭނާއާ ސްޕޮންސަރުގެ ހައިސިއްޔަތުން ހަވާލުވި މީހާއާ އެކު ސައިކަލެއްގައި. ނަމަވެސް ޝަހީދު އަލީ ހިނގުމުން، މި މައްސަލައިގައި ފަހުން ފުލުހުން ހައްޔަރުކުރި އިމިގްރޭޝަން މުވައްޒަފަކާ އެކު އޭނާ އިމިގްރޭޝަންގެ ވެހިކަލަށް އެރި،" ފުލުހުން ބުންޏެވެ.
މީގެ އިތުރުން ފުލުހުން ބުނީ އިމިގްރޭޝަންގެ މުވައްޒަފަކު ފައިސާ އެޅި ކޮތަޅެއް ހިފައިގެން ޝަމްއާންގެ ގެއަށް ގޮސްފައިވާކަން ތަހުގީގަށް އެނގިފައިވާ ކަމަށެވެ. އެގޮތުން އެ މުވައްޒަފު ގެއަށް ވަދެ ނިކުންނައިރު ފައިސާ އެޅި ކޮތަޅު މުށު ތެރޭގައި ބޮނޑިކޮށްލާފައި އޮތްތަން ސީސީޓީވީ ފުޓޭޖުން ފެންނަ ކަމަށެވެ.
ކޯޓު އަމުރެއްގެ ދަށުން ޝަމްއާންގެ ގެ ބަލައި ފާސްކުރިއިރު 257،475ރ. އާއި 10،000 ޑޮލަރު އަދި އެހެން ބައެއް ގައުމުތަކުގެ ފައިސާ ވެސް ފެނުނުކަން ފުލުހުން ހާމަކޮށްފައިވެ އެވެ.
