އިއްޔެއާ ހަމައަށް ހުސްކޮށް އޮތް ޓޫރިޒަމް މިނިސްޓަރުގެ މަގާމަށް ބޭފުޅަކު އައްޔަނު ކުރުމުގެ ބަދަލުގައި އެ މިނިސްޓްރީ, އެންވަރަމެންޓް މިނިސްޓްރީއާ އެއްކޮށްލަން ރައީސް ޑރ. މުހައްމަދު މުއިއްޒު ނިންމެވި ނިންމެވުމަށް ގިނަ ބަޔަކު ފާޑުކިޔައިފި އެވެ.
ޓޫރިޒަމް މިނިސްޓަރުކަމުގެ މަގާމު ހުސްވީ އެ މަގާމުގައި ހުންނެވި އިބްރާހިމް ފައިސަލް މިދިޔަ އަންގާރަ ދުވަހު އެ މަގާމުން ވަކި ކުރުމުންނެވެ. ދެ މިނިސްޓްރީ އެއްކޮށްލައި ޓޫރިޒަމް އެންޑް އެންވަރަމެންޓްގެ މިނިސްޓަރުކަމަށް އިއްޔެ އައްޔަނު ކުރެއްވީ އެންވަރަމެންޓް މިނިސްޓްރީގެ މަގާމުގައި ހުންނެވި ތާރިގު އިބްރާހިމް އެވެ.
މި ހަބަރު ނޫސްތަކުން ގެނެސްދިނުމާއެކު، ސޯޝަލް މީޑިއާގައި ގިނަ ބަޔަކު ވަނީ އެ ނިންމުމަށް ފާޑުކިޔައި މަލާމާތް ވެސް ކޮށްފަ އެވެ. ހާއްސަކޮށް ރާއްޖޭގެ އެންމެ ބޮޑު ސިނާއަތް ކަމަށްވާ ޓޫރިޒަމަށް ވަކި ވުޒާރާއެއް ނެތުމުން، އެ ސިނާއަތަށް ސަރުކާރުން ދޭ އަހަމިއްޔަތުކަން ހާމަވާކަމަށް ގިނަ ބަޔަކު ބުނެފައިވެ އެވެ.
"ދަނޑުވެރިކަމަށް ވަކި ވުޒާރާއެއް. ކުޅިވަރާއި ޒުވާނުންނަށް ވަކި ދެ ވުޒާރާއެއް. ނަމަވެސް އެންމެ ބޮޑު ސިނާއަތާއި ގުޅޭ ވުޒާރާ އެއްކޮށްލީ،" އާންމުންގެ މީހަކު އެކްސްގައި ލިޔުނެވެ.
ރާއްޖޭގެ ޓޫރިޒަމަކީ ވަކި ވުޒާރާއެއް އޮންނަން ޖެހޭ ވަރަށްވުރެ ކުޑަ ސިނާއަތެއްތޯ ސުވާލުކޮށް ގިނަ ބަޔަކު ރައީސް މުއިއްޒު ޓެގު ވެސް ކޮށްފައިވެ އެވެ. މަލާމާތްކޮށް، ހުރިހާ ވުޒާރާއެއް ރައީސް އޮފީހުގެ ދަށަށް ބަދަލުކުރުމަކީ ރަނގަޅު ގޮތެއް ކަމަށް ވެސް ބައެއް މީހުން ބުނެފައިވެ އެވެ.
"ޓޫރިޒަމް އިންޑަސްޓްރީ އަށް ހާއްސަ ވަޒީރެއް މުހިންމު. މި ނިންމުމާއެކު ސިނާއަތް ބަލިކަށިވެ ރާއްޖެއަށް ލިބެމުންދާ އާމްދަނީ ދަށްވުމަކީވެސް އެކަށީގެންވާ ކަމެއް،" ޓޫރިޒަމް ސިނާއަތުގައި މަސައްކަތްކުރާ މީހަކު އޭނާގެ އެކްސް އެކައުންޓުން ލިޔެފައިވެ އެވެ.
އާންމުންގެ މީހަކު ފޭސްބުކުގައި ލިޔެފައިވަނީ އިތުރު ވާހަކަ އެކެވެ. ނިންމުމަށް ފާޑުކިޔާ އޭނާ ފާހަގަކުރީ މިކަމުން ހާމަވަނީ ރައީސް މުއިއްޒުއަށް އިތުބާރު ކުރެވޭ ވަރުގެ ބޭފުޅުން އެތެރެ ކޮއިލުގައި މަދު މިންވަރު ކަމަށެވެ. އަދި، ދުވަސްކޮޅަކުން ވަޒީރުންނަށް ވެސް އިތުބާރު ގެއްލޭނެ ކަމަށް އޭނާ ލިޔެފައިވެ އެވެ.
"[ވެހިކަލް ދުއްވަން ދަސްކުރާއިރު ޖަހާ] އެލް ބޯޑު ޖަހައިގެން ވެރިކަން ކުރާތާ ދޮޅު އަހަރު މިވީ،" އިއްޔެގެ ނިންމުމަށް ފާޑުކިޔައި މަޖިލީހުގެ އުނގުފޫރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑޭ) އެކްސްގައި ލިޔުއްވާފައިވެ އެވެ.
ވައްޑޭގެ އިތުރުން ވެސް ގިނަ ސިޔާސީން ވަނީ އިއްޔެގެ ނިންމުމަށް ފާޑުކިޔައިފަ އެވެ. ރައީސް މުއިއްޒުގެ ސަރުކާރުގައި އެއްވެސް ޕްލޭނެއް ނެތް ކަމަށާއި އަދިވެސް ސަރުކާރު އެކުލަވާލާ ނުނިމޭ ކަމަށް ވެސް ބައެއް ބޭފުޅުން ލިޔުއްވާފައި ހުއްޓެވެ.
