މިދިޔަ އެޕްރީލް ހަތަރު ވަނަ ދުވަހު ބޭއްވި އިންތިހާބުގައި ސަރުކާރު ހިންގާ ޕީޕަލްސް ނޭޝަންލް ކޮންގްރެސް (ޕީއެންސީ) ޓިކެޓުގައި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސްގެ މަގާމަށް ވާދަކޮށް ނާކާމިޔާބުވި އާޝިޔަތު އަލައިކާއަށް ސަރުކާރުގެ އިސް މަގާމެއް ދިނުމުން ގިނަ ބަޔަކު ނުރުހުން ފާޅުކޮށްފި އެވެ.
ބައެއް ނޫސްތަކުން ރިޕޯޓުކޮށްފައިވާ ގޮތުގައި އަލައިކާ އައްޔަންކޮށްފައި ވަނީ ޓޫރިޒަމް މިނިސްޓްރީގެ ސްޓޭޓް މިނިސްޓަރު ކަމަށެވެ. ސޯޝަލް މީޑިއާ ޕޯސްޓުތަކުގައި ގިނަ ބަޔަކު ވަނީ އެކަމާ ހިތްހަމަނުޖެހުން ފާޅުކޮށްފަ އެވެ.
އެގޮތުން ވޯޓުން ބަލިވާ މީހުންނަށް އިސް މަގާމުތައް ދިނުމަކީ ހަމަޖެހޭ ކަމެއް ނޫން ކަމަށާއި އީރާން ހަނގުރާމައާ ހެދި އިގްތިސާދު ވެއްޓިފައި ވަނިކޮށް އިތުރު ސިޔާސީ ވަޒީފާތަކުގެ ސަބަބުން ސަރުކާރުގެ ހަރަދު އިތުރުވާތީ ވެސް މީހުން ކަންބޮޑުވުން ފާޅުކުރި އެވެ.
"ރާއްޖެ އަންނަ ފަތުރުވެރިން މަދުވެ، އިގްތިސާދު ދަށްވާތީ ހަރަދު ކުޑަކުރަން ސަރުކާރުން ފަށައިފި،" ސަރުކާރަށް ހަޖޫޖެހުމުގެ ގޮތުން މީހަކު ކުރި ޕޯސްޓެއްގައި ބުންޏެވެ.
"ސިޔާސީ މީހުންނަށް އޮތް ކަހަލަ ރައްކާތެރިކަން އަހަރުމެން އެންމެންނަށް ވެސް ބޭނުންވޭ. އިންތިހާބުން ބަލިވިޔަސް ހާސްވާކަށް ނުޖެހޭ. ރައްޔިތުންގެ ޓެކްސް ފައިސާއިން މުސާރަދޭ ގޮތަށް ވަރުގަދަ ސިޔާސީ މަގާމެއް ލިބޭނެ،" މަދޫ ރަހްމާންގެ ނަމުގައި މީހަކު ކުރި ޕޯސްޓެއްގައި ބުންޏެވެ.
އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ފެނުމަށް ފަހު، އެމްޑީޕީން ވަކިވި ބަޔަކު އުފެއްދި ޑިމޮކްރެޓްސް ޕާޓީގައި އުޅުމަށް ފަހު، އަލައިކާ ފަހުން ވަނީ ޕީއެންސީގެ އިސް ސަފުން ފެންނަން ފަށާފަ އެވެ.
އޭނާއަށް އިސް މަގާމެއް ދީފައިވާ އިރު، މި ސަރުކާރުން ގެންދަނީ ސިޔާސީ މަގާމުތަކުގައި ތިބި މީހުންގެ އަދަދާއި ރައްޔިތުންގެ ފައިސާއިން އެމީހުންނަށް ކުރާ ހޭދަ ހާމަކުރަން ތަކުރާރުކޮށް ދެކޮޅު ހަދަމުންނެވެ.
އިންތިހާބުން ލިބުނު ނާކާމިޔާބަށް ފަހު "ރައްޔިތުންގެ ވިންދާ އެއް ގޮތަށް" ކަންކަން ކުރައްވާނެ ކަމަށް ރައީސް މުހައްމަދު މުއިއްޒު ވިދާޅުވި ނަމަވެސް، އެމަނިކުފާނުގެ ސަރުކާރުން އަދިވެސް ގެންދަނީ ގިނަ ބަޔަކު ނުރުހޭ ގޮތަށް އިތުރު ސިޔާސީ މަގާމުތަކަށް މީހުން އައްޔަނުކުރަމުންނެވެ.
