ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް އެއް ލައްކަ މެންބަރުން ހަމަކުރަން ކުރިއަށް ގެންދިޔަ ހަރަކާތުގެ ތެރެއިން ވަގު ފޯމު ފުރައިގެން ވެރިކަން ކުރާ ޕީއެންސީއަށް ވެއްދި މީހުންގެ ތެރޭގައި ފުލުހުންނާއި ސިފައިން ވެސް ހިމެނޭކަން އެނގިއްޖެ އެވެ.
"އަދަދު" ނޫހަށް އެނގިފައިވާގޮތުގައި އެ ދެ މުއައްސަސާއިން ޕީއެންސީއަށް 17 މީހަކު، އެ މީހުންނަށް ނޭނގި ވައްދާފައިވާކަން މިހައިތަނަށް ވަނީ ކަށަވަރުވެފަ އެެވެ. މީގެ ބައެއް ފޯމުތަކުގެ ކޮޕީ ވެސް މި ނޫހަށް ލިބިފައިވެ އެވެ.
މިކަމާ ގުޅިގެން ފުލުހުން ވެސް އަދި އެމްއެންޑީއެފުން ވެސް ރަސްމީކޮށް މިހައިތަނަށް އެއްޗެއް ބުނެފައެއް ނުވެ އެވެ. ނަމަވެސް ގުޅިގެން މި ނޫހަށް މައުލޫމާތު ދިން ފުލުހުންގެ ބައެއް އޮފިޝަލުން ބުނީ މިހައިތަނަށް ފުލުހުންގެ ތެރެއިން 10 މީހަކު ޕީއެންސީއަށް ވަގަށް ވައްދާފައިވާކަން އެނގިފައިވާ ކަމަށެވެ.
"10 ފުލުހަކު ޕީއެންސީއަށް ވައްދާފައިވާ ކަމަށް ފާހަގަ ކުރެވިފައި ވަނީ މިހައިތަނަށް،" ފުލުސް އޮފިޝަލް ބުންޏެވެ.
އޭގެ އިތުރުން ނަން ނުޖެހުމަށް ޝަރުތުކޮށް މި ނޫހަށް މައުލޫމާތު ދިން އެމްއެންޑީއެފްގެ އޮފިޝަލެއް ބުނީ ސިފައިންގެ ތެރެއިން ވެސް ހަތް މީހަކު ވަގަށް ޕީއެންސީއަށް ވައްދާފައިވާކަން ފާހަގަ ކުރެވިފައިވާ ކަމަށެވެ.
ފުލުހުންނާއި ސިފައިންނަށް ސިޔާސީ ޕާޓީއަށް ވަނުން އެ މުއައްސަސާތަކުގެ ގާނޫނުން މަނާކުރެ އެވެ.
ފުލުހުންނާއި ސިފައިންގެ ތެރެއިން ވެސް ބަޔަކު ވަގަށް ޕީއެންސީއަށް ވައްދާފައިވާއިރު، ދިވެހި ރައްޔިތުންގެ ޒާތީ މަައުލޫމާތު ބަލަހައްޓާ ޑީޕާޓްމެންޓް އޮފް ނެޝަނަލް ރެޖިސްޓްރޭޝަންގެ ތެރޭގައި ޕީއެންސީއަށް ފޯމު ފުރި ކަމަށް ހޯމް މިނިސްޓްރީގެ އިސްވެރިން ވަނީ މިދިޔަ އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އެއްބަސްވެފަ އެވެ.
ނަމަވެސް އެ އިއުތިރާފާ ގުޅިގެން ނޫސްވެރިން ކުރި ސުވާލުތަކަށް ޖަވާބު ދިނުމަށް ދެކޮޅު ހަދައި އެ ބޭފުޅުން ވަނީ މީޑިއާއަށް ފިއްލަވައިފަ އެވެ.
އޭގެ ފަހުން ރައީސް މުއިއްޒުގެ އާއިލާގެ ބޭފުޅުންތަކެއް ވެސް ވަގަށް ޕީއެންސީއަށް ވައްދާފައިވާކަން ވަނީ ފަޅާ އަރައިފަ އެވެ. ރައީސް މުއިއްޒުއާ ދެބޭންގެ ދެދަރި މީހެއް ކަމުގައިވާ އަހުމަދު ގާލިބު އެކްސްގައި ކޮށްފައިވާ ޕޯސްޓެއްގައި ބުނެފައި ވަނީ ގާލިބު މަންމަ އާއި ބައްޕަ އަދި ކޮއްކޮ ވަގަށް ޕީއެންސީ އަށް ވައްދާފައިވާ ކަމަށެވެ.
އޭގެ އިތުރުން ކުރީގެ ރައީސް ޔާމީން އިސްވެ ހުންނަވައި އުފެއްދެވި ޕީޕަލްސް ނެޝަނަލް ފްރަންޓު (ޕީއެންއެފް) ގެ އިސް ބައެއް ބޭފުޅުން ހިމެނޭހެން އެ ޕާޓީގެ ވެސް އެތައް ބަޔަކު ޕީއެންސީއަށް ވެއްދުމުން ޕީއެންއެފްގެ މެންބަރުންގެ އަދަދު ވަނީ 2800 އަށް ވެއްޓިފަ އެވެ.
މި ހުރިހާ މައްސަލައެއް ފެންމަތިވުމުން، އިލެކްޝަންސް ކޮމިޝަނުން މިދިޔަ ބުރާސްފަތި ދުވަހު ވަނީ ޕާޓީތަކުގެ ދަފުތަރު އާންމުކޮށް، ޝަކުވާ ހުށަހެޅުމުގެ ފުރުސަތު އާންމުކޮށް ހުޅުވާލައިފަ އެވެ.
ޝަކުވާ ހުށަހަޅަން ޖެހޭނީ މައި އިލެކްޝަން ޕޯޓަލް ނުވަތަ ޝަކުވާ ޕޯޓަލް މެދުވެރިކޮށެވެ.
އިއުލާނުކޮށްފައިވާ ދަފުތަރަށް ޝަކުވާ ހުށަހެޅުމުގެ ސުންގަނޑިއަކީ ފެބުރުވަރީ 10 ވާ ހޯމަ ދުވަހުގެ މެންދުރު ފަހު 3:00 އެވެ. އިލެކްޝަންސް ކޮމިޝަނަށް ގޮސްގެން ވެސް ޝަކުވާ ހުށަހެޅޭނެ އެވެ.
