މާލޭ ސަރަހައްދުގައި ހިންގަމުންދާ ސްކޫލެއްގައި ތައުލީމު ހާސިލު ކުރަމުންދިޔަ ނުކުޅެދުންތެރިކަން ހުރި ދަރިވަރަކަށް އަނިޔާކުރި ޓީޗަރެއްގެ މައްސަލަ އެޑިއުކޭޝަން މިނިސްޓްރީން ފުލުހަށް ހުށަހަޅައިފި އެވެ.
އެޑިއުކޭޝަން މިނިސްޓަރު، ޑރ. އިސްމާއިލް ޝަފީއު "އަދަދު" ނޫހަށް މައުލޫމާތު ދެއްވަމުން ވިދާޅުވީ އެ މައްސަލަ އެޑިއުކޭޝަނުން ބެލުމުގެ ބަދަލުގައި ފުލުހަށް ހުށަހެޅީ މައްސަލައިގެ ބާވަތުން ކަމަށެވެ.
"މައްސަލަ ހުށަހަޅާފައި އޮންނާނީ މިނިސްޓްރީގެ ސީދާ ނިޒާމުގެ ތެރެއިން، ދެން އަޅުގަނޑު ވަރަށް ބޮޑަށް ހިތްހަމަ ވެސް ޖެހޭ، އެއީ ސްކޫލުގެ ފަރާތުން ޕްރޮމްޓްކޮށް އަޅުގަނޑުމެންނާ ހަމައަށް އައުން [ސިއްރު ނުކޮށް]، އައީމާ އަޅުގަނޑު އޭގެ މައުލޫމާތަށް ބަލާފައި އަޅުގަނޑަށް ގަބޫލު ކުރެވުނީ ކުއްޖަކަށް ޖިސްމާނީ އަނިޔާއެއްކޮށް ގައިގައި ޖަހާފައި ވާތީވެ އެ ކަންތައްތަކަށް ބެލީމާ މިއީ ހަމަ ޕޮލިހަށް ހުށަހަޅައިގެން ކުރިއަށް ގެންދަން ޖެހޭނެ ކަމެއް ވީމާ ޕޮލިހަށް ހުށަހެޅީ،" މިނިސްޓަރު ޝަފީއު ވިދާޅުވި އެވެ.
އެ މައްސަލައަކީ ކުޑަކުއްޖަކު ހިމެނޭ މައްސަލައަކަށް ވާތީ ސީދާ އެއީ ކޮން ސްކޫލެއްގެ ދަރިވަރެއްކަން މިނިސްޓަރު ހާމައެއް ނުކުރައްވަ އެވެ. ނަމަވެސް އަނިޔާ ލިބުނު ދަރިވަރަކީ ޕްރައިމަރީ ގްރޭޑުގައި ކިޔަވަމުންދާ ދަރިވަރެއް ކަމަށް ޝަފީއު ވިދާޅުވި އެވެ.
އެކަމާ ގުޅިގެން ފުލުހުން ބުނީ އެޑިއުކޭޝަނުން އެ މައްސަލަ ހުށަހެޅުމާ ގުޅިގެން ތަހުގީގު ކުރަމުންދާ ކަމަށެވެ. އިތުރު މައުލޫމާތު ފުލުހުން ހާމައެއް ނުކުރެ އެވެ.
