އިޒްރޭލުން ހިންގާ ލާއިންސާނީ ގަތުލުއާންމު ހުއްޓާލުމަކަށް ގެނެސް، ހަމަލާތައް މެދުކަނޑާލުމަށް ފަލަސްތީނުގެ މިނިވަންކަމަށް ޖިހާދުކުރާ ހަމާސް ޖަމާއަތާއެކު އެއްބަސްވުމަކަށް އައިސްފައިވާ ކަމަށް އިޒްރޭލުގެ އަދި ބައިނަލްއަގުވާމީ މީޑިއާތަކުން ރިޕޯޓުކޮށްފި އެވެ.
ރިޕޯޓުތައް ބުނާގޮތުން މިރޭ އިއުލާނުކުރާ އެއްބަސްވުމަކީ ގަތަރު އިން މެދުވެރިވެގެން އެތައް މަސްދުވަހަކަށް ދިގުދެމިގެންދިޔަ މަޝްވަރާތަކުގެ ނަތީޖާ އެވެ. އެއްބަސްވުމަކަށް އާދެވިފައިވާކަން އިޒްރޭލުގެ ޗެނަލް 12 ނިއުސް އިން ވަނީ ރިޕޯޓުކޮށްފަ އެވެ.
އެއްބަސްވުމުގެ ތަފުސީލުތައް މިހާތަނަށް އާންމުވެފައިނުވި ނަމަވެސް އަލް ގުދުސް އިން ރިޕޯޓުކޮށްފައިވާ ގޮތުގައި ކުރިއަށް އޮތް 24 ގަޑިއިރުގެ ތެރޭގައި މި އެއްބަސްވުމަށް އަމަލުކުރަން ފަށާނެ އެވެ.
އަލްޖަޒީރާ މެދުވެރިކޮށް ހަމާސް އިންވެސް ވަނީ ގަތަރު މެދުވެރިވެގެން އެކުލަވާލާފައިވާ އެއްބަސްވުމަށް އެ ޖަމާއަތުން ރުހޭކަން އިއުލާނުކޮށްފަ އެވެ.
ރިޕޯޓުތައް ބުނާގޮތުން މި އެއްބަސްވުމުގެ ދަށުން ގާޒާއަށް ވެރިވަގެނެފައިވާ އިޒްރޭލުގެ ސިފައިންގެ ފައުޖުތަކުން އެ ބިންތައް ދޫކޮށް ފައިބާނެ އެވެ. އަދި ހަމާސްގެ ބެލުމުގެ ދަށުގައި ތިބީ އިޒްރޭލުގެ ރައްޔިތުންތައް ދޫކޮށްލެވޭނެ އެވެ. ބަދަލުގައި އިޒްރޭލުގެ ޖަލުތަކުގައި ތިބި ފަލަސްތީނުގެ ރައްޔިތުންތަކެއްވެސް ދޫކޮށްލެވޭނެ އެވެ.
މީގެކުރިންވެސް މިފަދަ އެތައް އެއްބަސްވުންތަކެއް އެކުލަވާލި ނަމަވެސް އިޒްރޭލުން ވަނީ އެ ހުރިހާ އެއްބަސްވުމަކާ ހިލާފުވެފަ އެވެ.
ފަލަސްތީނުގެ ބިންތަކަށް މީގެ 75 އަހަރަށްވުރެ ގިނަ ދުވަސްކުރި އިޒްރޭލުން އަރައި ހިންގަމުންދާ ޖެނޮސައިޑުގެ ބާރު ގަދަވީ އޮކްޓޯބަރު 2023، ގަ އެވެ. އެގޮތުން ހަމާސް އިން އިޒްރޭލަށް ދިން ހަމަލާއެއްގެ ބަދަލުގައި ކަމަށް ބުނެ މިއަދާ ހަމައަށް އިޒްރޭލުން ވަނީ ގާޒާއަށް ވައިގެ މަގުންނާއި ބިމުގެ މަގުން އެތައް ހަމަލާއެއް ދީފަ އެވެ.
މި ހަމަލާތަކުގައި މަރުވި ފަލަސްތީނު ރައްޔިތުންގެ އަދަދު 200،000 އާ ގާތް ކުރާނެ ކަމަށް ރިޕޯޓުތައް ބުނެ އެވެ. އޭގެތެރޭގައި ގިނައީ އަންހެނުންނާއި ކުޑަކުދިންނެވެ. ގާޒާގެ ގިނަ އިމާރާތްތަކާއި އިންފްރާސްޓަކްޗާ މިހާރު ވަނީ ބޭނުން ނުކުރެވޭ މިންވަރަށް ސުންނާފަތިވެފަ އެވެ.
ވޭތުވެދިޔަ 24 ގަޑިއިރުގެ ތެރޭގައިވެސް އިޒްރޭލުން ވަނީ އެކި ހަމަލާތަކުގައި ގާޒާއިން 62 މީހަކު މަރާލާފަ އެވެ.
އިޒްރޭލުން ދެމުންދާ ލާއިންސާނީ ހަމަލާތައް ހުއްޓާލުމަށް މުޅި ދުނިޔޭގައި ބޮޑެތި މުޒާހަރާތަކެއް ކޮށް އެއްވުންތަކެއް ވަނީ ބާއްވާފަ އެވެ. ރާއްޖޭގައިވެސް އެފަދަ އެއްވުންތަކެއް ބޭއްވި އެވެ. އަދި އިޒްރޭލުގެ ރައްޔިތުން ރާއްޖެ އައުން މަނާކުރަން ގޮވާލި އެވެ. މިހާތަނަށް ސަރުކާރަށް އެކަން ކުރެވިފައެއް ނުވެ އެވެ.
