އިރާނާއެކު ކުރަމުންދާ ހަނގުރާމަ ހަ މަސް ދުވަހަށް ދިގުލައިގެން ގޮސްފައިވާ އިރު، އެ ހަނގުރާމަ ހުއްޓާލުމުގެ އެއްބަސްވުމަކަށް ދިއުމަށްޓަކައި އިރާނަށް ހަމަލާދިނުން މަޑުޖައްސާލުމަށް ނިންމަވައި، މިއަދު އެ ގައުމާއެކު އާ މަޝްވަރާތަކެއް ފައްޓަވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އިއްޔެ ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، މި މަޝްވަރާތަކުގައި ދުނިޔޭގެ ހަކަތަ ސަޕްލައިކުރުމުގައި މުހިންމު ދައުރެއް އަދާކުރާ އަދި މިހާރު ހިނގަމުންދާ ހަމަނުޖެހުންތަކުގެ މައިގަނޑު މައްސަލައަކަށް ވެފައިވާ ހޯރްމޫޒް ކަނޑުއޮޅީގެ މައްސަލަ އާއި، އިރާނުން ނިއުކްލިއާ ހަތިޔާރު ނައްތާލުމާ ގުޅޭ ގޮތުން ވާހަކަދެކެވޭނެ ކަމަށެވެ.
އިރާނުން ބުނި ގޮތުގައި، ހޯރްމޫޒް ކަނޑުއޮޅި މެދުވެރިކޮށް އާ މަގެއް ހޯދުމަށް އޮމާންއާއެކު ކުރިއަށްދާ މަޝްވަރާތަކުގައި އެއްބަސްވުމަކާ ވަނީ ގާތްވެފަ އެވެ. ނަމަވެސް، އިއްޔެ އެ ސަރަހައްދުން ދަތުރުކުރި ތެޔޮ ޓޭންކަރެއްގެ ކައިރީގައި އެއްޗެއް ގޮވުމާ ގުޅިގެން، އެ ކަނޑުގައި ދަތުރުކުރުމުގެ ނުރައްކާ އަދިވެސް އޮތްކަން ވަނީ ހާމަވެފަ އެވެ.
އާ މަޝްވަރާތައް ފަށާނެކަން ޓްރަމްޕް އިއުލާން ކުރެއްވުމާ ގުޅިގެން، މިއަދު އޭޝިއާގެ ބާޒާރުތައް ހުޅުވުނުއިރު ތެލުގެ އަގު ވަނީ ދަށަށް ގޮސްފަ އެވެ. އެގޮތުން ވެސްޓް ޓެކްސަސް އިންޓަމީޑިއޭޓްގެ އަގު 4.7 އިންސައްތަ ދަށަށް ގޮސް، ތެޔޮ ފީފާއެއްގެ އަގު ވަނީ 80.72 އެމެރިކާ ޑޮލަރަށް ވެއްޓިފަ އެވެ.
ވޮޝިންޓަނާއި ތެހެރާނާ ދެމެދު ހަނގުރާމަ ފެށުނީ ފެބްރުއަރީ 28 ގައެވެ. އެއީ އެމެރިކާ އާއި އިސްރާއީލުން ކުއްލި ގޮތަކަށް އިރާނަށް ހަމަލާދޭން ފެށި ހިސާބުންނެވެ. ނަމަވެސް ފާއިތުވި މަސްތަކުގައި ދޭތެރެ ދޭތެރެއިން ކުރިއަށްދިޔަ ޑިޕްލޮމެޓިކް މަސައްކަތްތަކުގެ ސަބަބުން ބައެއް ދުވަސްވަރު މަސްލަހަތު އޮތީ ކޮންމެވެސް ވަރަކަށް ފިނިވެފަ އެވެ.
