ގެދޮރުވެރިޔާ ސްކީމްގެ ދަށުން ވެރިފައި ކުރަނީ ހަމައެކަނި އެ ސްކީމްގެ ދަށުން ދޫކުރި 4،000 ފޯމު އެކަނި ކަމަށް ހައުސިން އެންޑް ކޮންސްޓްރަކްޝަން މިނިސްޓްރީން ބުނެފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހައުސިން އެންޑް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އިއްޔެ ވިދާޅުވީ ފްލެޓަށް އެދި ހުށަހެޅި ހުރިހާ ފޯމެއް ވެރިފައި ކުރުމުގެ ބަދަލުގައި ހަމައެކަނި ވެރިފައި ކުރާނީ ފްލެޓު ލިބުނު 4،000 މީހުންގެ ފޯމުތައް އެކަނި ކަމަށެވެ.
"މިއީ ފޯމުލީ ފަރާތްތަކުގެ ރީއިވެލުއޭޝަނެއް ނޫން. އަޅުގަނޑުމެން 20،000 ފޯމު އަލުން ރީއިވެލުއޭޓެއް ނުކުރާނަން. މިއީ ފްލެޓް ލިބޭނެ ކަމަށް ނޮވެމްބަރު 15، 2023 ގައި ކުރެވުނު ލިސްޓުގައިވާ 4،000 ފަރާތްތައް ވެރިފައި ކުރުމަށް ކުރެވޭ މަސައްކަތެއް،" އޭނާ ވިދާޅުވި އެވެ.
މުއްތަލިބު ވިދާޅުވީ އެ ވެރިފިކޭޝަން ޕްރޮސެސް އަންނަ ރޯދަ މަހުގެ ކުރިން ނިންމައި ގެޒެޓް ކުރުމަށް އަމާޒު ހިފާފައިވާ ކަމަށައި ލިސްޓު ގެޒެޓް ކުރެވޭއިރު ހޮވުނު ގޮތާއި ނުހޮވޭ ނަމަ ނުހޮވުނު ގޮތް ވެސް ތަފްސީލާ އެކު ހިމަނާނެ ކަމަށެވެ.
ފްލެޓް ލިބޭ މީހުންގެ ލިސްޓުގައި އުސޫލާ ހިލާފަށް ފްލެޓް ލިބިފައިވާނަމަ، އެ މީހެއް ލިސްޓުން އުނި ކުރުމަށް ކަމާބެހޭ އިދާރާތަކުން އިރުޝާދު ލިބިފައިވާކަން އޭނާ ފާހަގަކުރެއްވި އެވެ.
މިގޮތުން މުއްތަލިބު ވިދާޅުވީ މިހާރު ކުރެވޭ މަސައްކަތަކީ ފްލެޓް ލިބުނު އެންމެންގެ ފޯމުތައް ވެރިފައި ކުރުމަށްފަހު ވީހާ ވެސް އަވަހަށް ފްލެޓް ލިބޭ އެންމެންނާ އެކު އެއްބަސްވުމުގައި ސޮއިކުރުން ކަމަށެވެ.
ޝަރުތު ހަމަނުވެގެން 4،000 ފްލެޓުގެ ތެރެއިން ބާކީވާ ފްލެޓްތަކާ މެދު އަމަލު ކުރާނެ ގޮތަކާ މެދު ގޮތެއް ނިންމާނީ ވެރިފިކޭޝަން ޕްރޮސެސް ނިންމުމަށް ފަހު ކަމަށް ވެސް މުއްތަލިބު ވިދާޅުވި އެވެ.
"އަޅުގަނޑުމެންނަށް އަލުން މިދެންނެވި ކަނޑައެޅިފައި އޮތް އުސޫލެއް އާންމުންނަށް އެ މައުލޫމާތު ދެވިގެން އަޅުގަނޑުމެންނަށް އެބަ އެނގޭ އެއްވެސް ފަރާތެއް މީގެ ތެރެއިން ބޭރުވާނެތޯ ނޫންތޯ. އެނގުނީމަ ދެން އަޅުގަނޑުމެންނަށް އެނގޭނީ އެ ބާކީވާ ފްލެޓްތަކާ މެދު އަމަލުކުރާނެ ގޮތެއް. މިވަގުތު އަޅުގަނޑުމެން މި ކުރާ މަސައްކަތަކީ 4،000 ފްލެޓް ވެރިފައި ކުރުމުގެ މަސައްކަތް،" އޭނާ ވިދާޅުވި އެވެ.
ފޯމުތަކުގެ ސައްހަކަން ކަށަވަރު ކުރާނީ ފްލެޓު ދޫކުރާ އުސޫލާއި ގެދޮރުވެރިޔާ ޕޯޓަލްގައި ދީފައިވާ އިރުޝާދުތަކަށް އެކަނި ކަމަށް ވެސް އޭނާ ވިދާޅުވި އެވެ. އެހެންކަމުން ފޯމުގައި ހުށަހަޅަން ބުނެފައިވާ ލިޔުންތައް ފިޔަވައި އިތުރު ލިޔުމެއް ހުށަހަޅާފައިވާ ނަމަ ފޯމު ވެރިފައި ކުރާއިރު އެ ލިޔުމަށް ނުބަލާނެ އެވެ.
