މާޒިޔާ ސްޕޯޓްސް އެންޑް ރެކްރިއޭޝަންގެ ހެޑް ކޯޗުކަމާ ހަވާލުވެ ކުރަން ބޭނުންވާ މަސައްކަތުގެ ތެރެއިން، މާޒިޔާގެ އިތުރުން ރާއްޖޭގެ ފުޓްބޯޅަ އަށް ވެސް އެހީވާން ބޭނުންވާ ކަމަށް މާޒިޔާގެ ކޯޗުކަމާ ހަވާލުވި، ސްޕެއިނުގެ ލުއިސްމާ ހެނާންޑޭޒް ބުނެފި އެވެ.
މީގެ ފަސް މަސް ކުރިން މާޒިޔާ އިން ގެނައި، ސާބިއާގެ ކޯޗު ޑްރަގަން ޑުކަނޯވިޗްގެ އެގްރީމެންޓް ހަމަވުމުން މާޒިޔާ އިން ލުއިސްމާ ކޯޗަކަށް ހަމަޖެއްސީ މިއަދު އެވެ.
މާޒިޔާގެ ކޯޗެއްގެ ގޮތުގައި ތައާރަފްވެ، މީޑިއާ އިން ކުރި ސުވާލުތަކަށް ޖަވާބުދެމުން، ލުއިސްމާ ބުނީ، ރާއްޖޭގެ ފުޓްބޯޅައިގެ ހާލަތު އޮތްގޮތުގެ މައުލޫމާތު އޭނާ އަށް މާޒިޔާ އިން ދީފައިވާ ކަމަށާއި ޒިންމާއާ ހަވާލުވީ، ޗެލެންޖެއްކަން އެނގިހުރެ ކަމަށެވެ.
"މި ވޭތުވެދިޔަތަނުގައި ހިނގާފައި ހުރި ކަމުގެ މައުލޫމާތު އަހަންނަށް އެބަހުރި ލިބިފައި، ހާލަތު ބަދަލުކުރަން އަހަރެންގެ މަސައްކަތް ކޮށްދޭން އަހަރެން ތައްޔާރު، މިއީ ހަމައެކަނި މާޒިޔާ އަށް ކޮށްދޭ ކަމެއް ވެސް ނޫން، ރާއްޖެ އަށް (ފުޓްބޯޅަ އަށް) ވެސް ކޮށްދޭ ކަމެއް،" އޭޝިއާގެ ތިން ގައުމެއްގައި ކޯޗިންގެ މަސައްކަތް ކުރި ލުއިސްމާ ބުންޏެވެ.
މިދިޔަ އަހަރު ލިތުއޭނިއާގައި މަސައްކަތްކުރި ލުއިސްމާ ވަނީ ދެކުނު ކޮރެއާގައި ތިން އަހަރު، ކުވެއިތާއި އުޒްބެކިސްތާނުންގެ ކުރެ ކޮންމެ ގައުމެއްގައި ދެ އަހަރު ކޯޗިންގެ މަސައްކަތްކޮށްފަ އެވެ. އެ ގައުމުތަކުގައި ވެސް ކުރަން ލިބުނު މަސައްކަތުގައި އޭނާ އަށް އޮތް ހިތްހަމަޖެހުމަކީ، ތަފާތު މާހައުލެއްގައި ފުޓްބޯޅަ ރަނގަޅުކުރަން ކުރެވުނު މަސައްކަތް ކަމަށް ލުއިސްމާ ވަނީ ބުނެފަ އެވެ.
ދުނިޔޭގެ ފުޓްބޯޅައިގެ ގަދަ ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑްގެ އެކެޑަމީގައި ޓެކްނިކަލް މަސައްކަތްތަކެއް ކުރުމުގެ ތަޖުރިބާ ވެސް ހާސިލްކޮށްފައިވާ ލުއިސްމާ ބުނީ، ބޭނުންވަނީ ވަކި ހިސާބެއްގެ އެ އޮތް ސިސްޓަމެއް ގެނައުން ނޫން ކަމަށާއި އެ ގައުމަކަށް އެންމެ ރަނގަޅު ގޮތަކަށް ކުރިއަށް ދިއުން ކަމަށެވެ.
"ތެދެއް، އަހަރެންގެ ވިސްނުމަކީ ސްޕެނިޝް ފުޓްބޯޅަ، އެކަމަކު، އަހަރެން ވިސްނާނީ ސްޕެނިޝް ފުޓްބޯޅައިގެ އެ ވިސްނުންތަކުގެ ތެރެއިން ވެސް ރާއްޖެ އަށް މީގެ އެންމެ ރަނގަޅީ ކޮން ގޮތެއްތޯ، މީީގެ އެންމެ ރަނގަޅު ވިސްނުމެއް، އެންމެ ފައިދާ ކުރާނެ ގޮތަކަށް ކުރިއަށްދާނީ،" ލުއިސްމާ ބުންޏެވެ.
ލުއިސްމާ ހެނާންޑޭޒް: މާޒިޔާގެ ކޯޗުކަމާ ހަވާލުވެ ޖޯޒީ ދައްކާލަނީ.--- ފޮޓޯ: އަހުނަފް މުހައްމަދު / އަދަދު ސްޕޯޓްސް
ފުޓްބޯޅައިގެ މަސައްކަތް ކުރަން އޭނާ ދިޔަ ކޮންމެ ގައުމެއްގައި ވެސް ކޮންމެ ބަޔަކު ވެސް ބޭނުންވަނީ އާ ކަންތައްތަކެއް ކުރުމަށް ކަމަށާއި އެ ކަންކަން ކުރުމުގައި އެންމެ މުހިންމު ކަމަކީ ރަނގަޅު ކަންކަން ކުރަން ފައިސާ ހޯދައި ރަނގަޅު އިންވެސްޓްތައް ކުރުން ކަމަށް ލުއިސްމާ ބުނެފައިވެ އެވެ.
"މިއީ ޗެލެންޖެއް، މީގެ އިރުކޮޅެއް ކުރިން އަހަރެން ދިޔައިން އަހަރެމެން ޕްރެކްޓިސްކުރަން އޮތް ޕިޗަށް. އެތަނުގެ ޕިޗް ވެސް އެބަ ބަދަލުކުރަން ޖެހޭ ވީ އެންމެ އަވަހަށް، މި ކަންކަން އަހަންނަށް އެނގިފައި އޮތީ އައިއިރު ވެސް، މީގެ އަހަރެެމެން އެންމެ ގުޅިގެން މަސައްކަތްކުރަން ޖެހޭ، މިއީ ހަމައެކަނި އަހަރެމެންގެ ކްލަބުންނެއް ނޫން، ފެޑެރޭޝަނުން ދެން މުޅި ގައުމުގެ އެންމެން ގުޅިގެން ކުރަން ޖެހޭ ކަމެއް. އެންމެ ފުރަތަމަ އަހަރެމެން ގަބޫލުކުރަންވީ ކަންކަން ބަދަލުކުރެވޭނެކަން،" ލުއިސްމާ ބުންޏެވެ.
އޭނާ އަކީ ރާއްޖޭގެ ޗެމްޕިއަން، މާޒިޔާ އަށް އިރުޝާދުދޭނެ ބިދޭސީ ހަތް ވަނަ ކޯޗެވެ. މާޒިޔާ އަށް ކޯޗުކޮށްދިން ބިދޭސީ ކޯޗުންނަކީ، މި ސީޒަނުގައި ކުރިން ހުރި، ސާބިއާގެ ޑްރަގަންގެ އިތުރުން، މީގެ ކުރިން ހުރި، މެސެޑޯނިއާގެ މަރުޖާން ސެކުލޮސްކީ، ސާބިއާގެ މިއޮޑްރަގް ޖެސިކް އާއި ރިސްޓޯ ވިޑަކޮވިޗްގެ އިތުރުން މިދިޔަ ސީޒަނުގައި ކޯޗުކޮށްދިން ދެ ކޯޗުން ކަމަށްވާ ބަލްގޭރިއާގެ އިވާން ކޮލޭވް އާއި ބޮސްނިއާގެ މިލޮމީރް ސެސްލިޖާ (މިލޯ) އެވެ.
މާޒިޔާ އަށް އައި ހުރިހާ ކޯޗަކަށް ދިމާވި ޗެލެންޖަކީ ރާއްޖޭގައި ވަރުގަދަ ލީގެއް ނެތުމުން، އޭއެފްސީ ލެވަލްގައި ގޮސް ނަތީޖާ ނުނެރެވުމެވެ. ލުއިސްމާ ބުނީ، މި އަހަރުގެ ސީޒަނުގެ ކަންކަން ޖެނުއަރީ މަހު ފަށައިގެން، އޮކްޓޫބަރާ ހަމައަށްދާއިރު، 10 ވަރަަކަށް މަހުގެ ތައްޔާރީތައް ލިބޭނެ ކަމަށާއި އުންމީދަކީ ހާލަތު ރަނގަޅުކުރެވޭ ވަރަށް ޓީމު ރަނގަޅު ލެވަލެއްގައި އޮންނާނެ ކަމަށެވެ.
އެ ގޮތުން، އެންމެ ފުރަތަމަ ފޯކަސް އަކީ، އަންނަ މަހު ފަށާ ޕްރެޒިޑެންޓްސް ކަޕަށް ޓީމު އެންމެ ވަރުގަދަ އަށް ތައްޔާރުކުރުން ކަމަށެވެ. އަދި މާޒިޔާގައި ގައުމީ ޓީމުގެ ކުޅުންތެރިން ގިނަ އަދަދަކަށް ހިމެނޭތީވެ، ގައުމީ ޓީމުގެ ކޯޗާ ވެސް ވަރަށް އަވަހަށް ބައްދަލުކޮށްލައި، މަޝްވަރާތަކެއް ކުރަން ބޭނުންވާ ކަމަށް ލުއިސްމާ ވަނީ ބުނެފަ އެވެެ.
ފުޓްބޯޅަ ސީޒަން ފަށާނެ ކަމަށް އެފްއޭއެމް އިން އިއުލާނުކޮށްފައިވާ ކަލަންޑަރުގައިވަނީ، އަންނަ މަހު 14 އެވެ.
