މާފަންނު ސަހަރާގައި ހުރި ސްޓޯމް ވޯޓާ ޕަމްޕް ސްޓޭޝަންތައް ހަލާކުވެފައި ހުންނަތާ ފަސް މަސް ދުވަސް ވެދާނެ ކަމަށާއި އެ މައްސަލަ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބުގެ ސަމާލު ކަމަށް ގެނައި ކަމަށް މާލެ ސިޓީ ކައުންސިލުގެ މޭޔަރު އާދަމް އާޒިމް ވިދާޅުވެއްޖެ އެވެ.
އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ އެ ޕަމްޕް ސްޓޭޝަންގައި ހުރި ހުރިހާ އިލެކްޓްރިކް ސާމާނެއް ހަލާުކޮށްލައި ވަގަށް ގެންގޮސްފައިވާ ކަމަށާއި ހިދުމަތް މެދުކެނޑިފައި ހުންނަތާ ފަސް މަސް ދުވަސް މިހާރު ވެދާނެ ކަމަށެވެ.
"ޕަމްޕް ސްޓޭޝަންތަކުގެ މައްސަލައިގައި މިނިސްޓްރީގެ ސަމާލު ކަމަށް ލިޔުމުން ގެނައިން. އަދި ވީހާވެސް އަވަހަށް ޕަމްޕް ސްޓޭޝަންތައް ހައްލު ކުރަން އެދުނިން،" އާޒިމް ވިދާޅުވި އެވެ. އެ ސިޓީތައް ވެސް އެކްސްގައި އާޒިމް ހިއްސާކުރެއްވި އެވެ.
އާޒިމް ވިދާޅުވީ މިފަދަ ކަންކަން ގުޅިގެން ހައްލު ކުރަން ބޭނުންވާ ކަމަށާއި ބޭނުންވާ އެހީތެރިކަމާއި އެއްބާރުލުންދީ ހައްލުތައް ގެންނަން ބޭނުންވާ ކަމަށެވެ.
މުއްތަލިބުއަށް ޑިސެމްބަރު 25، ގައި އާޒިމް ފޮނުއްވި ސިޓީގައި ޕަމްޕް ސްޓޭޝަން މެއިންޓެއިންކޮށް ބެލެހެއްޓުމަށް އެމްޑަބްލިއުއެސްސީއާ ހަވާލުކޮށްފައިވާ އެއްބަސްވުން ހަމަވެ، އެތަން ބަލަހައްޓާނެ ބަޔަކު ނެތްކަން ފާހަގަކޮށްފައިވެ އެވެ.
އެގޮތުން ވާރޭވެހޭ ދުވަސްތަކުގައި މާލޭގައި ފެންބޮޑުވާ ދުވަސްތަކުގައި ރައްޔިތުންނަށް ތަކުލީފުތައް ކުރިމަތިވެ، ބޮޑެތި ގެއްލުންވާކަން ފާހަގަކޮށް އާޒިމް ވަނީ ވީހާ ވެސް އަވަހަށް އެކަން ހައްލުކޮށްދޭން އެދި، ބައްދަލުވުމެއް ބާއްވައި ދިނުމަށް ވެސް އެދިފަ އެވެ.
އޭގެއިތުރުން ޖެނުއަރީ 8، ގައި ވެސް އާޒިމް ވަނީ ސްޓޯމް ވޯޓާ ޕަމްޕް ސްޓޭޝަންތައް ހައްލު ކޮށްދިނުމަށް ދެވަނަ ސިޓީއެއް މުއްތަލިބުއަށް ފޮނުއްވާފަ އެވެ.
ނަމަވެސް މިއަދު މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ މާފަންނު ސަހަރާގައި މާލެ ސިޓީ ކައުންސިލުން ކުރިއަށްދިޔަ އެކްސްކަވޭޝަން މަސައްކަތެއްގައި އެ ތަނުގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބިފައިވާ ކަމަށެވެ.
"މާފަންނު ސަހަރާގައި މާލެ ސިޓީ ކައުންސިލާއި އެ ކައުންސިލުގެ ކޮންޓްރެކްޓަރުން އެކްސްކަވޭޝަން މަސައްކަތް ކުރިއަށް ގެންދިޔައީ ވަރަށް ޒިންމާދާރުކަން ކުޑަކޮށް. އެ މަސައްކަތުގައި ސްޓޯމްވޯޓާ ޕަމްޕް ސްޓޭޝަނަށް ވަނީ ގެއްލުންތަކެއް ލިބިފައި. އެކަން ކުރީ މިނިސްޓްރީއަށް ނާންގައި،" އޭނާ ވިދާޅުވި އެވެ.
މާލެއަށް ރޭ ވެސް ބޯކޮށް ވާރޭވެހި ފެންބޮޑުވެ ގެއްލުންތަކެއް ވެފައިވެ އެވެ. އެގޮތުން ބައެއް ގެތަކަށް ފެންވަދެ އާންމު ދިރިއުޅުމަށް ބުރޫ އަރާފައިވާތީ ބައެއް މީހުންނަށް ވަގުތީ ބޯހިޔާވެހިކަން ވެސް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ހަމަޖައްސާފަ އެވެ.
މާލެއަށް ބޯކޮށް ވާރޭވެހި ފެންބޮޑުވާ ދުވަސްތަކުގައި ފެން ހިންދަން ގިނަ އިރުތަކެއް ނެގުމަކީ އާންމުންގެ ބޮޑު ޝަކުވާއެކެވެ. ފެންބޮޑުވާއިރު އެންމެ ބޮޑަށް ފެންބޮޑުވެ ގެއްލުންތައް ލިބެނީ މާފަންނު ސަރަހައްދަށެވެ.
