މާފަންނުގައި ފެންބޮޑުވަނީ މާލެ ސިޓީ ކައުންސިލުގެ އިހުމާލުން ސްޓޯމްވޯޓާ ޕަމްޕް ސްޓޭޝަނަކަށް ގެއްލުންވެގެން ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.
މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ މާފަންނު ސަހަރާގައި މާލެ ސިޓީ ކައުންސިލުން ކުރިއަށްދިޔަ އެކްސްކަވޭޝަން މަސައްކަތެއްގައި އެ ތަނުގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބިފައިވާ ކަމަށެވެ.
ކޮންސްޓްރަކްޝަން މިނިސްޓްރީގެ ހުއްދަ ނުހޯދައި މާލެ ސިޓީ ކައުންސިލުން ކުރިއަށް ގެންދިޔަ އެ މަސައްކަތުން ލިބުނު ގެއްލުމުގެ ސަބަބުން، މާފަންނު ސަރަހައްދުގައި ފެންބޮޑުވުމުގެ މައްސަލަ ދިމާވަމުންދާ ކަމަށް މުއްތަލިބު ވިދާޅުވި އެވެ.
"މާފަންނު ސަހަރާގައި މާލެ ސިޓީ ކައުންސިލާއި އެ ކައުންސިލުގެ ކޮންޓްރެކްޓަރުން އެކްސްކަވޭޝަން މަސައްކަތް ކުރިއަށް ގެންދިޔައީ ވަރަށް ޒިންމާދާރުކަން ކުޑަކޮށް. އެ މަސައްކަތުގައި ސްޓޯމްވޯޓާ ޕަމްޕް ސްޓޭޝަނަށް ވަނީ ގެއްލުންތަކެއް ލިބިފައި. އެކަން ކުރީ މިނިސްޓްރީއަށް ނާންގައި،" އޭނާ ވިދާޅުވި އެވެ.
މުއްތަލިބު ވިދާޅުވީ ޕަމްޕް ސްޓޭޝަނަށް ލިބުނު ގެއްލުން ހައްލުކޮށް، އެތަން އާންމު ހާލަތަށް ގެނައުމުގެ މަސައްކަތް ކުރަމުންދާ ކަމަށެެވެ.
މާލެއަށް ރޭ ވެސް ބޯކޮށް ވާރޭވެހި ފެންބޮޑުވެ ގެއްލުންތަކެއް ވެފައިވެ އެވެ. އެގޮތުން ބައެއް ގެތަކަށް ފެންވަދެ އާންމު ދިރިއުޅުމަށް ބުރޫ އަރާފައިވާތީ ބައެއް މީހުންނަށް ވަގުތީ ބޯހިޔާވެހިކަން ވެސް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ހަމަޖައްސާފަ އެވެ.
މާލެއަށް ބޯކޮށް ވާރޭވެހި ފެންބޮޑުވާ ދުވަސްތަކުގައި ފެން ހިންދަން ގިނަ އިރުތަކެއް ނެގުމަކީ އާންމުންގެ ބޮޑު ޝަކުވާއެކެވެ. ފެންބޮޑުވާއިރު އެންމެ ބޮޑަށް ފެންބޮޑުވެ ގެއްލުންތައް ލިބެނީ މާފަންނު ސަރަހައްދަށެވެ.
